Maoist:✒️চত্তিশগড়ত মাওবাদী দমনৰ ক্ষেত্ৰত পুনৰ সাফল্য লাভ কৰিছে নিৰাপত্তা বাহিনীয়ে। উত্তৰ-পশ্চিম বিজাপুৰ জিলাৰ জংঘলীয়া অঞ্চলত চলোৱা অভিযানত নিষিদ্ধ সংগঠন চিপিআই (মাওবাদী)-ৰ সশস্ত্ৰ শাখা পিএলজিএৰ অন্তত দুজন সদস্য নিহত হৈছে। মাওবাদী শীৰ্ষ নেতা পাপা ৰাওৰ সন্ধানত এতিয়াও অভিযান চলি আছে।
শুক্ৰবাৰে নিশা গোপন সূত্ৰৰ তথ্যৰ ভিত্তিত নিৰাপত্তা বাহিনীয়ে বিজাপুৰৰ জংঘলীয়া এলেকাত অভিযান আৰম্ভ কৰে। তথ্য অনুসৰি, অঞ্চলটোত মাওবাদীৰ এটা দল লুকাই আছে। ইয়াৰ পাছতে অঞ্চলটো ঘেৰাও কৰি তল্লাশি চলোৱাৰ সময়তে পিছুৱাই যোৱাৰ পথ নাপাই মাওবাদীয়ে নিৰাপত্তা বাহিনীক লক্ষ্য কৰি গুলীচালনা আৰম্ভ কৰে।
শনিবাৰে পুৱাৰ পৰা দু’পক্ষৰ মাজত তীব্ৰ গুলীযুদ্ধ হয়। সেই সংঘৰ্ষতে পিএলজিএৰ দুজন সদস্য নিহত হয়। ঘটনাস্থলৰ পৰা বৃহৎ পৰিমাণৰ অস্ত্ৰ-শস্ত্ৰ আৰু বিস্ফোৰকো উদ্ধাৰ কৰা হৈছে। এই অভিযানত কোনো নিৰাপত্তাৰক্ষী আহত হৈছে নে নাই, সেয়া এতিয়াও নিশ্চিত হোৱা নাই।
সূত্ৰৰ মতে, পাপা ৰাওসহ আন মাওবাদী নেতাসকলৰ সন্ধানত এলেকাত তল্লাশি অভিযান অব্যাহত আছে।