Nagaon:
নগাঁও জিলাৰ খাগৰিজান শিক্ষাখণ্ডৰ অন্তৰ্গত ভকতগাঁও প্ৰাথমিক বিদ্যালয়ৰ সহকাৰী শিক্ষক সুভাষ ডেকাক আজি বিদ্যালয় কৰ্তৃপক্ষই বিদায় সম্বৰ্ধনা জ্ঞাপন কৰে । এই উপলক্ষে শিক্ষানুষ্ঠানখনত দিনৰ ১২ বজাৰ পৰা এখনি বিদায় সভাও অনুষ্ঠিত হয় । ভকতগাঁও প্ৰাথমিক বিদ্যালয় পৰিচালনা আৰু উন্নয়ন সমিতিৰ সভাপতি নাজিম উদ্দিনৰ সভাপতিত্বত অনুষ্ঠিত হোৱা এই গাম্ভীৰ্যপূৰ্ণ সভাখনৰ উদ্দেশ্য ব্যাখ্যা কৰে বিদ্যালয়ৰ প্ৰধান শিক্ষক টংকেশ্বৰ শৰ্মাই ।
বিদ্যালয় পৰিচালনা সমিতি, মাতৃগোট, স্থানীয় অঙ্গনবাডী কেন্দ্ৰৰ কৰ্মী-সহায়িকা, অভিভাৱক আৰু ছাত্ৰ-ছাত্ৰীৰ উপস্থিতিত অৱসৰী শিক্ষক গৰাকীক বিদায় সম্ভাষণ জনোৱা হয় । শিক্ষক গৰাকীৰ দীঘলীয়া কৰ্মময় জীৱনৰ স্বীকৃতি স্বৰূপে তেওঁক এখন শৰাই, গামোচা, জাপি, ধৰ্মগ্ৰন্থ গীতাৰ উপৰিও সম্বৰ্ধনা পত্ৰও প্ৰদান কৰা হয় । সম্বৰ্ধনা জ্ঞাপন কৰে বিদ্যালয়ৰ শিক্ষক ৰাজশ্ৰী চৌহান, ইছমাইল হুছেইন, ফাতেমা খাতুন, ঝৰ্ণা কলিতা, ইভাৰাণী দাস আৰু কংকনা বৰাই ।
সভাত শিক্ষকসকলৰ উপৰিও গৰৈমাৰী প্ৰাথমিক বিদ্যালয়ৰ অৱসৰপ্ৰাপ্ত প্ৰধান শিক্ষক ইদ্ৰিছ আলি, অভিভাৱক আব্দুল জলিলে শিক্ষক গৰাকীৰ মহান সেৱা আৰু ত্যাগক কৃতজ্ঞতা জনাই বক্তব্য প্ৰদান কৰে । অৱসৰপ্ৰাপ্ত শিক্ষক সুভাষ ডেকায়ো বিদ্যালয় কৰ্তৃপক্ষৰ পৰা এনে চেনেহ বুটলি আৱেগিক হৈ পৰে । তেওঁ চমু বক্তব্যৰ জৰিয়তে মহা জীৱনৰ আনন্দ লাভৰ অভিজ্ঞতা সদৰী কৰে ।
