Jaipur:✒️ফটোশ্বুটৰ বাবে এটা জীৱন্ত হাতীক গোলাপী ৰঙেৰে ৰং কৰাত ৰাজস্থানৰ জয়পুৰত (Jaipur)সৃষ্টি হৈছে তীব্ৰ বিতৰ্কৰ । ঘটনাটো সামাজিক মাধ্যমত প্ৰকাশ পোৱাৰ লগে লগে ব্যাপক প্ৰতিক্ৰিয়া দেখা যায় আৰু জন্তু সুৰক্ষা লৈ নতুনকৈ প্ৰশ্ন উত্থাপন হয়।
প্ৰাপ্ত তথ্য অনুসৰি, এজন বিদেশী ফটোগ্ৰাফাৰে নিজৰ শিল্পমূলক প্ৰজেক্টৰ বাবে এই ফটোশ্বুটটো আয়োজন কৰিছিল। ইয়াত এটা হাতীক সম্পূৰ্ণৰূপে গোলাপী ৰঙেৰে ৰঙাই তাত মডেল বহুৱাই ছবি তোলা হয়।
এই ছবিসমূহ অনলাইনত ভাইৰেল হোৱাৰ পিছতেই বহু লোক ক্ষোভ প্ৰকাশ কৰে আৰু ঘটনাটোক “জন্তুৰ ওপৰত অমানৱীয় ব্যৱহাৰ” বুলি অভিহিত কৰে।
বিতৰ্ক বাঢ়ি যোৱাৰ লগে লগে বিষয়টো কৰ্তৃপক্ষৰ দৃষ্টিগোচৰ হয়। বন বিভাগে ইতিমধ্যে এই ঘটনাৰ ওপৰত তদন্ত আৰম্ভ কৰিছে। বিশেষকৈ, হাতীক ৰং সানিবলৈ কোনো ধৰণৰ অনুমতি লোৱা হৈছিল নে নাই আৰু ইয়াৰ ফলত জন্তুটোৰ স্বাস্থ্য বা সুৰক্ষাত কোনো প্ৰভাৱ পৰিছিল নে নাই—সেই সকলো বিষয় খতিয়ান লোৱা হৈছে।
আনহাতে, ফটোগ্ৰাফাৰগৰাকীয়ে নিজৰ পক্ষত কৈছে যে, জয়পুৰত থাকোতে স্থানীয় সংস্কৃতি আৰু ঐতিহ্যৰ পৰা অনুপ্ৰাণিত হৈ তেওঁ এই ধাৰণাটো লৈছিল। তেওঁৰ মতে, ৰাজস্থানত হাতী এক গুৰুত্বপূৰ্ণ সাংস্কৃতিক প্ৰতীক, সেইকাৰণে তেওঁ ফটোশ্বুটত ইয়াক অন্তৰ্ভুক্ত কৰিছিল।
কিন্তু সামাজিক মাধ্যমত অধিকাংশেই এই যুক্তি মানি লোৱা নাই। বহুতে স্পষ্টকৈ কৈছে যে, শিল্প বা ফটোশ্বুটৰ নামত জীৱন্ত জন্তু ব্যৱহাৰ কৰাটো উচিত নহয়। এই ঘটনাই “animal welfare” আৰু “ethical tourism” বিষয়ত পুনৰ বৃহৎ বিতৰ্ক আৰম্ভ কৰিছে।