Rahul Gandhi Rally in bokajan:
দৈনিক অগ্ৰদূত ডিজিটেল ডেক্স:–ৰাজ্যৰ বিধানসভা নিৰ্বাচনৰ প্ৰচাৰাভিযান অন্ত পৰিবলৈ মাজত মাত্ৰ পাঁচটা দিন থকা অৱস্থাত অসমলৈ সোঁত বৈছে ইজনৰ পিছত সিজনকৈ তাৰকা প্ৰচাৰক। বৃহস্পতিবাৰে বিৰোধী ঐক্য মঞ্চৰ সমৰ্থিত প্ৰাৰ্থীৰ হৈ প্ৰচাৰ সভাত অংশ ল’বৰ বাবে বোকাজানত উপস্থিত হয় কংগ্ৰেছ সাংসদ তথা বিৰোধী দলপতি ৰাহুল গান্ধী ৷ দিনৰ ১১-৩০ বজাত ডিমাপুৰত বিমানৰে অৱতৰণ কৰাৰ পিছত কটকটীয়া নিৰাপত্তাৰ মাজেৰে স্থল পথৰে উপস্থিত হয় বোকাজানৰ নিৰ্বাচনী সভাত।
সভাত বক্তব্যত বিজেপিৰ বিৰুদ্ধে সোচ্ছাৰ হৈ পৰে ৰাহুল গান্ধী ৷ তেওঁ কয়,দেশৰ প্ৰধানমন্ত্ৰী মোদী মাৰ্কিন ৰাষ্ট্ৰপতি ড’নাল্ড ট্ৰাম্পৰ পদলেহনকাৰী ৷ ট্ৰাম্পৰ ওচৰত মোৰ দোৱাই দেশক একপ্ৰকাৰ বিক্ৰী কৰিছে ৷ সেইজন প্ৰধানমন্ত্ৰীৰে আস্থাবাহী মুখ্যমন্ত্ৰী হিমন্ত বিশ্ব শৰ্মাই ৷ প্ৰধানমন্ত্ৰীয়ে অমিত শ্বাহৰ ভৰি চুব দিলে মুখ্যমন্ত্ৰীয়ে ভৰি চুবলৈ কুণ্ঠাবোধ নকৰিব ৷ এনে এজন মেৰুদণ্ডহীন মুখ্যমন্ত্ৰী ৰাজ্যৰ কি উপকাৰ সাধিব ৷ দেশৰ ভিতৰতে তেওঁ এজন ভ্ৰষ্টাচাৰ- আৰু দুৰ্নীতিৰ বোকাত লুটুৰিপুটুৰি হৈ থকা মুখ্যমন্ত্ৰী ৷ অসমৰ যদি উন্নতি হৈছে ৷ সেয়া তেওঁৰ পৰিয়ালৰ উন্নতি ৷ এনে প্ৰেক্ষাপটত দিছপুৰৰ মচনদত কংগ্ৰেছ মিত্ৰজোটৰ চৰকাৰ অহাৰ লগে লগে তেওঁৰ দুৰ্নীতি-ভ্ৰষ্টাচাৰৰ তদন্ত ঘোষণা কৰাৰ লগতে জেললৈ নিক্ষেপ কৰা হ’ব ৷ এই কথা আপোনালোকে লিখি ৰাখক ৷ বিগত পাঁচটা বৰ্ষত এটা নিদিষ্ট সম্প্ৰদায়ৰ টাৰ্গেট কৰি আতিশয্য চলাই অহা হৈছে। কংগ্ৰেছ আহিলেই এই আতিশয্যৰ হিচাপ লোৱা হ’ব আৰু একচনীয়া হিচাপে বসবাস কৰা ১০ লাখ লোকক ম্যাদি পট্টা দিয়া হ’ব ৷ জুবিনক লৈ নিজৰ এক পাৰ্চনেল গেৰান্টি বুলি উল্লেখ কৰি গান্ধীয়ে কয়,জুবিনক ১০০ দিনৰ ভিতৰত ন্যায় দিম।
অসমত উদ্যোগ প্ৰতিষ্ঠাৰ নামত কাৰ্বি পাহাৰৰ খিলঞ্জীয়া সকলক উচ্ছেদ কৰি তেওঁলোকৰ কে’বা হেজাৰ ভূমি আদানীক গতাই দিয়াৰ চেষ্টাৰ ব্ৰতী হৈছে মুখ্যমন্ত্ৰী গৰাকী । দলং – উৰণীয়া সেঁতু আৰু পথ আদি বনোৱাৰ নামত বৃহৎ কমিচন আদায় কৰিছে মুখ্যমন্ত্ৰী আৰু পদলেহনকাৰী সকলে ৷ প্ৰকৃতিৰ দান কাৰ্বি পাহাৰত দীৰ্ঘদিন ধৰি লুণ্ঠন কৰি থকা সকলৰ বিৰুদ্ধে অনাগন দিনত লোৱা হ’ব কঠোৰ ব্যৱস্থা । সেয়েহে বিজেপিক উৎখাতৰ স্বাৰ্থত কংগ্ৰেছ মিত্ৰজোঁটৰ প্ৰাৰ্থীক ভোট দি জয়যুক্ত কৰাৰ আহ্বান জনাই কংগ্ৰেছৰ শীৰ নেতা গৰাকীয়ে ।
সভাত উপস্থিত থকা এপিচিচিৰ সভাপতি গৌৰৱ গগৈয়ে মুখ্যমন্ত্ৰী ড:হিমন্ত বিশ্ব শৰ্মাক হুংকাৰ দি কয়,এইবাৰ দিছপুৰৰ পৰা বিজেপি বিদায় হোৱাটো খাটাং ৷ মুখ্যমন্ত্ৰী পৰ্বতসম দুৰ্নীতিৰ সকলো হিচাপ লোৱা হ’ব । সুদীৰ্ঘ সময় পার্বত্য জিলাখনত সংঘটিত হৈছে কেইবাকোটি টকাৰ কেলেংকাৰী। গৰু ছিণ্ডিকেট-কয়লা ছিণ্ডিকেটৰে জড়িত সকলক আঁকোৱালি লৈছে মুখ্যমন্ত্রীয়ে। বিজেপিক দিছপুৰৰ মচনদৰ পৰা বিদায় দিয়াৰ লক্ষ্যৰে কংগ্ৰেছৰ নেতৃত্বত গঠন হোৱা বিৰোধী ঐক্য মঞ্চই নতুন অসম, বৰ অসম গঢ়াৰ স্বাৰ্থত একত্রিত হৈছে ।
বোকাজানৰ কংগ্ৰেছ প্ৰাৰ্থী ৰতন ইংতিৰ হৈ চলোৱা নিৰ্বাচনী প্ৰচাৰ সভা খনত গগৈয়ে কাৰ্বি আংলং স্বায়ত্ত্বশাসিত পৰিয়দৰ মুৰব্বী থকা মুখ্যমন্ত্ৰীৰ কণী পৰা হাঁহৰূপী তুলিৰাম ৰংহাঙকো তীব্ৰ সমালোচনা কৰে ।
নতুন কার্বি আংলং গঢ়াৰ কথা উল্লেখ কৰি গৌৰৱ গগৈয়ে কংগ্ৰেছ চৰকাৰ আহিলে আনিব শান্তি- বিকাশ আৰু প্ৰগতি। পিতৃ তৰুণ গগৈৰ আদৰ্শৰে ৰাজনীতিত ভৰি দিছে বুলি উল্লেখ কৰি গৌৰৱ গগৈয়ে দুখীয়া-নিষ্পেষিতৰ কাষত কংগ্ৰেছ সদায় আছে আৰু থকাৰ কথা দোহাৰে ৷
জনসভা খনত এপিচিৰ তত্ত্বাৱধায়ক জীতেন্দ্ৰ সিং সহ কে’বা গৰাকী জ্যেষ্ঠ কংগ্ৰেছ নেতা উপস্থিত থাকে ৷