নেপালত নবগঠিত বালেন্দ্র শ্বাহৰ চৰকাৰে দুর্নীতি প্রতিৰোধৰ বাবে কঠোৰ পদক্ষেপ গ্ৰহণৰ কথা ঘোষণা কৰিলে। ইতিমধ্যে শ্বাহ চৰকাৰে দেশখনৰ প্ৰাক্তন ৰাজনীতিক আৰু প্রশাসনিক নেতাৰ সম্পত্তিৰ তদন্তৰ বাবে এখন পাঁচজনীয়া সদস্যৰ ন্যায়িক আয়োগ গঠন কৰিলে।
এই আয়োগে ২০০৬ত দেশখনত ৰাজতন্ত্ৰৰ অৱসানৰ পাছৰে পৰা বিত্তীয় বর্ষ ২০২৫-২৬লৈকে সময়ছোৱাত ৰাজহুৱা পদত কৰ্মৰত সকলো লোকৰ সম্পত্তিৰ সবিশেষ তদন্ত কৰিব।
প্রাক্তন ৰজা জ্ঞানেন্দ্ৰ শ্বাহ, তিনিজন প্রাক্তন ৰাষ্ট্ৰপতি আৰু ২০০৫-০৬ৰ পাছৰ আটাইকেইজন প্রধানমন্ত্রী, মন্ত্রী, সাংবিধানিক পদবীধাৰী আৰু জ্যেষ্ঠ বিষয়াৰ সম্পত্তিৰ সন্দৰ্ভত তদন্ত চলাই সংসদীয় ন্যায়িক আয়োগে শ্বাহ চৰকাৰক দাখিল কৰিব।
উল্লেখ্য যে বিগত সময়ছোৱাত নেপালত ক্ষমতাত থকা ৰাজনীতিক আৰু প্ৰশাসনৰ শীর্ষ বিষয়াই ব্যাপক দুর্নীতি-ভ্ৰষ্টাচাৰত লিপ্ত হোৱাৰ অভিযোগ উত্থাপন হৈ আহিছিল।
আনকি যোৱা বছৰৰ ছেপ্টেম্বৰত নেপালত হোৱা জেন জিৰ বিপ্লৱতে কে পি শৰ্মা অলী চৰকাৰৰ পতন হৈছিল। অলী চৰকাৰৰ বিৰুদ্ধে ব্যাপক দুর্নীতি-ভ্রষ্টাচাৰৰ অভিযোগ উত্থাপন কৰি যুৱ প্ৰজন্মৰ লগতে জনতাই নেপালৰ ৰাজপথত সমবেত হৈ ব্যাপক বিক্ষোভপ্ৰদৰ্শন কৰিছিল।
ইয়াৰ পাছতে নেপালত অর্ন্তৱৰ্তী চৰকাৰ গঠন হৈছিল আৰু অৱশেষত শেহতীয়া নিৰ্বাচনৰ জৰিয়তে দেশখনৰ ক্ষমতা শ্বাহে দখল কৰিছিল। ক্ষমতা লাভৰ পাছতে যুৱ প্ৰজ প্রধানমন্ত্রী শ্বাহে একাধিক সংস্কাৰ কাৰ্যসূচী গ্ৰহণ কৰিছে। ইয়াৰে অন্যতম হৈছে পূৰ্বৰ চৰকাৰৰ দিনত সংঘটিত হোৱা দুর্নীতি-ভ্ৰষ্টাচাৰৰ তদন্ত আৰম্ভ কৰা। ইয়াৰ বাবে শ্বাহ চৰকাৰে ইতিমধ্যে ন্যায়িক আয়োগ গঠন কৰি দিলে।
দুর্নীতি-ভ্রষ্টাচাৰৰে সম্পত্তি আহৰণ কৰা প্ৰাক্তন নেতা-বিষয়াক ৰেহাই দিয়া নহ’ব বুলিও ইতিমধ্যে শ্বাহ চৰকাৰে ঘোষণা কৰিলে।