Artificial Flood:
দৈনিক অগ্ৰদূত ডিজিটেল ডেক্স:- তীব্র আতংকৰ সৃষ্টি কৰি জলমগ্ন মহানগৰীত বিগত ৪৮ ঘণ্টাৰ ভিতৰত উদ্ধাৰ হৈছে চাৰিটা মৃতদেহ। এই দুৰ্ভগীয়াসকলৰ মৃত্যুৰ বাবে জবাবদিহি কোন হ’ব? এই পর্যন্ত কোনো উত্তৰ নাই প্রশাসনৰ। গুৱাহাটী উন্নয়ন বিভাগ, গুৱাহাটী পৌৰ নিগম, লোকনির্মাণ বিভাগকে ধৰি সংশ্লিষ্ট সকলো বিভাগৰে চৰম ব্যৰ্থতা উদঙাই আজিও কৃত্রিম বানৰ জটিল পৰিস্থিতিৰ মাজত পৰা কক্কাইছে মহানগৰীৰ বিভিন্ন অঞ্চল।
ইয়াৰ মাজতে নৈ-নলাৰ পৰা ইটোৰ পাছত সিটো মৃতদেহ উদ্ধাৰৰ ঘটনাই তীব্র আতংকৰ সৃষ্টি কৰিছে। পৰহি কৃত্রিম বানত পায়েল নাথ নামৰ মহানগৰীৰ এখন অলংকাৰ বিপণীত কৰ্মৰত মহিলাৰ মালিগাঁৱৰ উন্মুক্ত নলাত পৰি দুৰ্ভাগ্যজনক মৃত্যুৰ পাছত মহানগৰীৰ পৃথক স্থানৰ পৰা আজি তিনিটা মৃতদেহ উদ্ধাৰ হয়। পানীত পৰি এই লোকসকলে মৃত্যুক সাবটি লোৱা বুলি আৰক্ষীয়ে সন্দেহ প্রকাশ কৰিছে।
উল্লেখ্য যে যোৱা ১৯ এপ্ৰিলৰ সন্ধিয়াৰ পৰা আৰম্ভ হোৱা ভয়াবহ কৃত্রিম বানৰ পাছত বিগত ৪৮ ঘণ্টাত মহানগৰীখনত চাৰিটাকৈ মৃতদেহ উদ্ধাৰ হয়। উদ্ধাৰ কৰা আটাইকেইটা মৃতদেহ পুৰুষৰ।
ইপিনে, মহানগৰীৰ কৃত্রিম বানৰ সমস্যা সমাধানত ব্যর্থ আৰু বানাক্রান্তক প্রয়োজনীয় সাহায্য প্রদান নকৰাৰ অভিযোগত মঙলবাৰে সদৌ গুৱাহাটী ছাত্র সন্থাই বিক্ষোভ কাৰ্যসূচী ৰূপায়ণ কৰে। সংগঠনটোৰ শতাধিক কর্মীয়ে এই বিক্ষোভৰ জৰিয়তে চৰকাৰ, পৌৰ নিগম আৰু গুৱাহাটী উন্নয়নৰ লগত জড়িত বিভাগবোৰক ধিক্কাৰ-গৰিহণা দিয়ে। ইয়াৰ লগতে বন্যার্তক প্রয়োজনীয় সা-সুবিধা প্রদানৰো দাবী জনায় ছাত্র সন্থাই।
ইপিনে, মহানগৰীৰ অধিকাংশ অঞ্চলৰ পৰিস্থিতি আজিও জটিল হৈ আছে। মনকৰিবলগীয়া যে আজিও পানীত ডুবি থকা ৰুক্মিণীগাঁও আৰু হাতীগাঁও চাৰিআলিৰ পৰিস্থিতি মহানগৰীৰ আন কে’বাটাও বানাক্ৰান্ত অঞ্চলৰ তুলনাত নতুন। অথচ ৰুক্মিণী গাঁও গুৱাহাটীৰ কৃত্রিম বানৰ নতুন অভিকেন্দ্ৰত পৰিণত হৈছে। বৃহত্তৰ ৰুক্মিণীগাঁৱৰ বাসিন্দা অসম চৰকাৰৰ বৰ্তমানৰ আৰু প্ৰাক্তন কে’বাজনো প্রভাৱশালী মন্ত্রী-বিধায়ক। স্থানীয় বাসিন্দা দিব্যজ্যোতি কলিতাই ক্ষোভেৰে কয় যে তেওঁলোকৰ অঞ্চলটোত যে মন্ত্রী-বিধায়কো বাস কৰে সেইকথা ক’বলৈও লাজ লাগে। কলিতাই লগতে কয়, ‘ৰক্মিণীগাঁও গুৱাহাটীৰ বৃহৎ অঞ্চলৰ পানীৰ ডাষ্টবিন হৈছে। দিছপুৰৰ বৃহৎ অঞ্চলৰ পানী বৈ আহি এতিয়া ৰুক্মিণীগাঁৱত জমা হয়। ছুপাৰ মার্কেটৰ উৰণ সেতুখন নিৰ্মাণৰ পাছৰে পৰা আমাৰ অঞ্চলটোৰ এই সমস্যা অধিক জটিল হয়। জমা হোৱা পানীভাগ ওলাই যাব পৰিলেও সমস্যাটো কিছু পৰিমাণে লাঘব হ’লহেঁতেন।
তাৰ বিপৰীতে ইঞ্জিনিয়াৰ, ঠিকাদাৰৰ কৃপাত ৰুক্মিণীগাঁৱৰ পানী কাষেৰে বৈ যোৱা বাহিনী নদীত নপৰি নদীৰ পানীহে ওলোটাই সোমাই আহে। কাৰণ আমাৰ অঞ্চলটোৰ পৰা নদীলৈ যোৱা নলাৰ মুখখন নদীৰ বুকুতকৈ তলত আছে।’ তেওঁ কয়, ‘তাৰমানে সেইখিনি হিচাপ কৰিবলৈ ইঞ্জিনিয়াৰৰ সক্ষমতা নাই। নতুনকৈ নিৰ্মাণ কৰা নলাবোৰ আমাৰ কাৰণে ভালুকৰ সাঙী হৈছে।’ কলিতাই লগতে কয় যে ৰুক্মিণীগাঁৱৰ উৰণ সেতুখন নিৰ্মাণ কৰাৰ পূৰ্বে সকলোৱে অন্ততঃ অঞ্চলটোৰ দুৰৱস্থা নিজে অনুধাৱন কৰিব পাৰিছিল। কাৰণ ৰক্মিণীগাঁৱৰ গুৱাহাটী-শ্বিলং পথটোও কৃত্রিম বানত বুৰিছিল। এতিয়া উৰণ সেতুখন হোৱাত আনৰ বাবে ৰুক্মিণীগাঁওবাসীৰ দুৰ্যোগ অনুধাৱন কৰাৰো মুদা মৰিলে। অঞ্চলটোৰ বানাক্ৰান্তক সহায়-সহযোগিতা কৰাতো অৱহেলাৰ অভিযোগ উত্থাপিত হৈছে।
একেদৰে বুধবাৰেও পানী শুকোৱা নাই দিছপুৰ ৱাৰলেছ, ছার্ভে আদি অঞ্চলত। লাষ্টগেট-বেলতলা সংযোগী পথটোৰে আজি যাতায়াত যথেষ্ট ব্যাহত হয়। একেদৰে হাতীগাঁও, সিজুবাৰী, দক্ষিণ গাঁও আদি অঞ্চলৰ বহু উপ-পথ আজিও পানীৰ তলত আছে। ৰাজধানী মছজিদ-হাতীগাঁও সংযোগী পথটোৰ বৃহৎ অংশ আজিও পানীৰ তলত আছে। গড়চুক আৰু বৰাগাঁৱৰ কে’বাটাও উপ-পথ পানীত বুৰ গৈ আছে। গাড়ীগাঁও, জালুকবাৰী, সদিলাপুৰৰ বহুকেইটা উপ-পথৰ পানী আজিও শুকোৱা নাই।
ইপিনে, পানী শুকোৱা অঞ্চলবোৰৰ ৰাইজে যমৰ যাতনা ভুগিবলগীয়া হৈছে। পানীয়ে নিমিষতে ঘৰৰ মজিয়া বুৰাই পেলোৱাৰ পাছত শ শ পৰিয়ালৰ সা-সম্পত্তি নষ্ট হয়। গতিকে ঘৰ পৰিষ্কাৰ কৰাৰ পৰা নষ্ট হোৱা সামগ্ৰী ঠিক কৰালৈকে সাধাৰণ মানুহৰ বিলাই বিপত্তি নোহোৱা হৈছে। পানীত নষ্ট হোৱা বাহনৰে গুৱাহাটীৰ ছাৰ্ভিচ চেণ্টাৰ, বহু গেৰেজ ভৰি পৰিছে।
আনহাতে বৃহৎ ঢাক-ঢোল কোবাই বিধানসভা নিৰ্বাচনৰ আগমুহূৰ্তত প্রধানমন্ত্রী নৰেন্দ্ৰ মোদীয়ে উদ্বোধন কৰিছিল লোকপ্রিয় গোপীনাথ বৰদলৈ আন্তৰাষ্ট্ৰীয় বিমানকোঠৰ নতুন টার্মিনেল। টার্মিনেলটোৰ আটকধুনীয়া ৰূপক লৈ চৰকাৰে আত্মপ্ৰচাৰত ব্যস্ত হয়। দেশৰ ভিতৰত অন্যতম সুন্দৰ বিমানকোঠ বুলি প্ৰচাৰ কৰা টার্মিনেলটোৰ গৌৰৱ ১৯ এপ্ৰিলৰ বৰষুণত একপ্ৰকাৰ ধূলিসাৎ হয়। কিয়নো টার্মিনেল ভৱনটোৰ কে’বাটাও স্থানেৰে পানী হোৰাহোৰে ভিতৰত প্ৰৱেশ কৰে। পানীৰ ডোঙাত ভৱনটোত ভৰি থ’বলৈ ঠাই নোহোৱা হয়।মঙলবাৰে ইয়াৰ মেৰামতি কৰি থকা হৈছে।
ইপিনে,মঙলবাৰে পুৱা সাউকুছি তিনিআলিৰ সমীপত বশিষ্ঠ নদীত এজন যুৱকৰ মৃতদেহ ভাহি থকা ৰাইজে প্রত্যক্ষ কৰে। লগে লগে সেই স্থানত অগণন লোকৰ সমাগম হয়। পাছত আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয় আৰু হাস্পতাললৈ প্ৰেৰণ কৰে। মৃতদেহটো যোৱা ১৯ এপ্ৰিলৰ সন্ধিয়াৰ পৰা সন্ধানহীন হৈ থকা নটবমাৰ যুৱক আখতাৰ আলীৰ বুলি পৰিয়ালৰ লোকে চিনাক্ত কৰে। যুৱকজনৰ মৃত্যু কৃত্রিম বানৰ ফলত হোৱা বুলি সন্দেহ কৰা হৈছে।
ইপিনে মঙলবাৰে আগবেলা জ্যোতিকুছিৰ মৰা ভৰলু নদীত দাতালপাৰাৰ অসীম কলিতা নামৰ এজন যুৱকৰ মৃতদেহ উদ্ধাৰ হয়। এই যুৱকজনো ১৯ এপ্ৰিলৰ সন্ধিয়াৰ পৰাই নিৰুদ্দেশ হৈ আছিল। গতিকে এইজন যুৱকৰো মৃত্যু কৃত্রিম বানৰ কৱলত পৰিয়েই হোৱা বুলি সন্দেহ কৰা হৈছে। তদুপৰি মঙলবাৰে দুপৰীয়া পামহীৰ লাচিতগড় অঞ্চলৰ এটা পৰিয়ালৰ ঘৰৰ পাছফালৰ নলাত আন এটা মৃতদেহ উদ্ধাৰ হয়। মৃতদেহটো চিনাক্ত হোৱা নাই। মৃতদেহটো পানীত উটি অহা বুলি সন্দেহ কৰা হৈছে।