চিকিৎসা বিজ্ঞানৰ জগতখনৰ এক অবিশ্বাস্য ঘটনা সম্প্রতি পোহৰলৈ আহিছে। একেৰাহে ৪০ ঘণ্টা প্রায় হৃৎস্পন্দন অবিহনেই বাচি থাকিল এজন ব্যক্তি। শেষ পর্যন্ত সুস্থ হৈ হাস্পতালৰ পৰা খোকজাঢ়িয়েই ওলাই আহিল সেই ব্যক্তি।
এই ঘটনাক চিকিৎসকসকলে ‘মেডিকেল মিৰাকল’ আখ্যা দিছে। এই ঘটনা চীনৰ পূৰ্বাঞ্চলৰ। প্রায় ৪০ বছৰীয়া লোকজনে প্রথমে বুকুত অস্বস্তি, চাপ অনুভৱ কৰা শ্বাস-প্রশ্বাসৰ সমস্যাত হাস্পতালত ভর্তি হয়। প্রথমে চিকিৎসকে সাধাৰণ হৃদযন্ত্ৰৰ সমস্যাৰ দৰেই চিকিৎসা আৰম্ভ কৰে; কিন্তু কিছু সময়ৰ ভিতৰতে তেওঁৰ অৱস্থাৰ দ্রুত অৱনতি হ’বলৈ ধৰে।
হঠাৎ লোকজনৰ কার্ডিয়াক এৰেষ্ট হয়। অর্থাৎ হৃদযন্ত্রই কাম কৰা বন্ধ কৰি দিয়ে।একে সয়মতে তেওঁৰ শ্বাস-প্রশ্বাসো প্রায় বন্ধ হৈ পৰে। এই অৱস্থাত চিকিৎসকে দ্রুত চিপিআৰ দিবলৈ আৰম্ভ কৰে। সমান্তৰালকৈ ডিফিব্রিলেটৰ ব্যৱহাৰ কৰি হৃৎস্পন্দন ঘূৰাই অনাৰ চেষ্টা কৰা হয়; কিন্তু বাৰম্বাৰ চেষ্টা কৰা সত্ত্বেও স্বাভাৱিক হৃৎস্পন্দন ঘূৰি অহা নাছিল ।
পৰিস্থিতি অত্যন্ত সংকটজনক হৈ উঠাত চিকিৎসকসকলে ইচিএমঅ’ (এক্সট্রাকপ’ৰিয়াল মেমব্রেন অক্সিজেনেচন) নামৰ এবিধ লাইফ ছাপ’র্ট ছিষ্টেম ব্যৱহাৰ কৰাৰ সিদ্ধান্ত লয়। এয়া এনে এক উন্নত প্রযুক্তি, য’ত শৰীৰৰ বাহিৰত এটা মেচিনত তেজত অক্সিজেন মিহলাই সেয়া আকৌ শৰীৰলৈ প্ৰেৰণ কৰা হয়।
ইয়াৰ ফলত হৃদযন্ত্ৰ আৰু হাওঁফাওঁরে কিছু সময় বিশ্রাম পায় আৰু শৰীৰৰ প্ৰয়োজনীয় কাম চলি থাকে।
প্রায় ৪০ ঘণ্টা ধৰি লোকজনৰ নিজৰ হৃদযন্ত্রই স্বাভাবিকভাৱে কাম কৰা নাছিল। ইমান দীঘলীয়া সময় হৃৎস্পন্দন বন্ধ থকাৰ পাছতো বাচি ঘূৰি অহাতো অত্যন্ত বিৰল ঘটনা।
চিকিৎসকসকলেও প্রথমে বৰ বেছি আশা দেখা নাছিল। কাৰণ ইমান সময়ে ৰক্ত সঞ্চালন সঠিকভাৱে নহ’লে মস্তিষ্ক, বৃক্ক আৰু শৰীৰৰ অন্যান্য গুৰুত্বপূৰ্ণ অংগ ক্ষতিগ্রস্ত হ’ব পাৰে। অথচ আশ্চর্যজনকভাৱে লাহে লাহে লোকজনৰ হৃদযন্ত্ৰই আকৌ নিজাকৈ কাম আৰম্ভ কৰে।
চিকিৎসকসকলে জনায় যে এয়া প্রায় অলৌকিক ঘটনা।ইয়াৰ পাছতো তেওঁক আৰু প্রায় ১০ দিন ইচিএমঅ’ৰ সহায়ত ৰখা হয়, যাতে শৰীৰ সম্পূৰ্ণৰূপে স্থিতিশীল হয়।
সবাতোকৈ ডাঙৰ স্বস্তিৰ খবৰটো আছিল, তেওঁৰ মস্তিষ্কৰ ডাঙৰ কোনো ক্ষতি নহ’ল। তেওঁ লাহে লাহে সম্পূর্ণ সচেতন হৈ উঠে, স্বাভাৱিকভাৱে কথা কয় আৰু শৰীৰো দ্রুত সুস্থ হ’বলৈ ধৰে। অৱশেষত লোকজনে হাস্পতালৰ পৰা খোজকাঢ়িয়েই বাহিৰলৈ ওলাই আহে। চিকিৎসকসকলে কয় যে আধুনিক প্রযুক্তি, দ্রুত চিকিৎসা আৰু চিকিৎস দলৰ নিৰলস প্রচেষ্টাৰ ফলতেই এই অসম্ভৱক সম্ভৱ কৰা হৈছে।
