Guwahati Ringroad Projects:
দৈনিক অগ্ৰদূত ডিজিটেল ডেক্স:অসম চৰকাৰে গুৱাহাটীক কেন্দ্ৰ কৰি গ্ৰহণ কৰা ৰি’ ৰোড প্রকল্প কার্যকৰী কৰোতে ৰাষ্ট্ৰীয় বন্যপ্রাণী পৰিষদৰ পৰামৰ্শক গুৰুত্ব দিয়া নাই। ৰি ৰোড প্রকল্প নিৰ্মাণৰ নামত আমচাং বন্যপ্রাণী অভয়াৰণ্যৰ কমেও ৫৪ বিঘা ভূমিৰ বনাঞ্চল ধ্বংস কৰা হ’ব। প্ৰকল্প ৰূপায়ণৰ বাবে নিয়ম অনুসৰি অসম চৰকাৰে ৰাষ্ট্ৰীয় বন্যপ্রাণী পৰিষদৰ অনুমতি বিচাৰি আবেদন দাখিল কৰিছিল। তেতিয়াই ৰাষ্ট্ৰীয় বন্যপ্রাণী পৰিষদে বন ধ্বংস ৰোধ আৰু বন্য জীৱ-জন্তুৰ সুচল আহ-যাহত বাধাৰ সৃষ্টি নহ’বলৈ এলিভেটেড কৰিড’ৰ নিৰ্মাণৰ পৰামৰ্শ দিছিল; কিন্তু তেনে পৰামৰ্শকো চৰকাৰে আজিলৈকে গ্রহণ নকৰিলে আৰু এই কথাই বৃহস্পতিবাৰে গুৱাহাটী উচ্চ ন্যায়ালয়ৰ মজিয়াত স্পষ্ট হয়।
খানাপাৰাৰ পৰা সোণাপুৰলৈকে এলিভেটেড কৰিড’ৰ নিৰ্মাণৰো উল্লেখ কৰিছিল বন্যপ্রাণী পৰিষদে। ৰিং ৰোড প্ৰকল্পৰ বিৰোধিতা নকৰিলেও প্রকল্প ৰূপায়ণৰ নামত আমচাং অভয়াৰণ্যৰ ক্ষতিসাধন নকৰাক লৈ মহেশ ডেকা আৰু আকর্ষিক চলিহা নামৰ দুজন যুৱকে গুৱাহাটী উচ্চ ন্যায়ালয়ত এখন ৰাজহুৱা স্বার্থজড়িত আবেদন (পিআইএল) দাখিল কৰিছিল। আবেদনখনৰ আজি শুনানি অনুষ্ঠিত হয়। শুনানিত চৰকাৰী পক্ষৰ অধিবক্তাই কয় যে প্রকল্পটো ৰূপায়ণৰ বাবদ বন্যপ্রাণী অভয়াৰণ্যখনৰ সৰ্বাধিক চাবিশ জোপা গছ কটা হ’ব।
অৱশ্যে ইয়াৰ বিপৰীতে আবেদনকাৰী পক্ষৰ পৰা জনোৱা হয় যে সেই সংখ্যা চাৰিশ নহয়, চাৰিশতকৈ কে’বা গুণ অধিক কে’বা হেজাৰ জোপা গছ প্রকল্প ৰূপায়ণৰ বাবদ কটা হ’ব। বিষয়টোক লৈ উচ্চ ন্যায়ালয়েও উদ্বেগ প্রকাশ কৰে। তেতিয়াই শুনানিত ৰাষ্ট্ৰীয় বন্যপ্রাণী পৰিষদৰ পৰামৰ্শক অসম চৰকাৰে গুৰুত্ব নিদিয়াৰ বিষয়টো উত্থাপন হয়। বন বিভাগৰ পৰা আদালতক জনোৱা হয় যে অহা ১৭ মে’লৈ বন্যপ্রাণী অভয়াৰণ্যখনৰ প্ৰস্তাৱিত অঞ্চলটোত কোনো গছ কটা নহয়।
উল্লেখ্য যে পিআইএলখনৰ পৰবৰ্তী শুনানিৰ দিন অহা ১৭ মে’ ধাৰ্য কৰা হয়। তাৰ পূৰ্বে বন বিভাগে গছ সুৰক্ষিত কৰি ৰখাক লৈ বিভাগীয় স্থিতি শপতনামাযোগে ন্যায়ালয়ত দাখিল কৰিব লাগিব।
