Doner Ministry:
দৈনিক অগ্ৰদূত ডিজিটেল ডেস্ক:নির্মাণ কার্যব লেহেমীয়া গতি, সময়মতে ক’ম আৰম্ভ নকৰা আদিৰ দৰে নেতিবাচক কাৰণতে অসমে হেৰুৱালে কমেও ২১১ কোটি টকাৰ আন্তঃগাঁথনি উন্নয়ন প্রকল্প। আন্তঃগাঁথনি উন্নয়ৰ অভাৱত ভোগা ৰাজ্যখনৰ কে’বাখনো জিলাত বিভিন্ন প্রকল্প ৰূপায়ণৰ বাবে এই পুঁজি আবণ্টন দিছিল উত্তৰ-পূর্বাঞ্চল উন্নয়ন বিভাগ (ড’নাৰ) মন্ত্রণালয়ে।
আনকি প্রকল্পবোৰৰ কামৰ অস্বাভাৱিক লেহেমীয়া গতিত ক্ষুণ্ণ মন্ত্রণালয় বিপৰীতে ধাৰ্য পুঁজিৰ এটা অংশ মোকলায়ো দিছিল; কিন্তু অসম চৰকাৰে বছৰ বছৰ ধৰি আবণ্টিত প্রকল্পবোৰ ৰূপায়ণ কৰিব নোৱৰাৰ পৰিপ্ৰেক্ষিতত অৱশেষত নিয়ম অনুসৰি তেনে মন্ত্রণালয়ে বন্ধ কৰি দিবলৈ তথা বাতিল কব্বিলৈ বাধ্য হ’ল। যোৱা আগষ্টৰ ভিতৰত বন্ধ কৰি দিয়া হয় এই বৃহৎ সংখ্যক প্রকল্প। ইয়াৰে ১৪টা প্রকল্প ‘নন লেপচেবল চেন্ট্রেল পুল অৱ বিছ’চেজ’ (এনএলচিপিআৰ) ৰ অধীনৰ আৰু ছটা প্রকল্প উত্তৰ-পূৱ পৰিষদ (এনইচি) ৰ আঁচনিৰ অধীনৰ প্ৰকল্প।
বন্ধ ঘোষণা কৰা এই প্রকল্পবোৰৰ অধিকাংশই যোৱা ১০ বছৰৰ ভিতৰত অনুমোদনপ্রাপ্ত। কিন্তু ইমান বছৰৰ পাছতো প্রকল্পবোৰৰ কোনো অগ্রগতি নহ’ল। আনকি কে’বাটাও প্ৰকল্পৰ কামৰ আৰম্ভণিয়েই নহ’ল। বিগত বৰ্ষত এই প্রকল্পবোৰৰ অগ্রগতিৰ দিশ ড’নাৰ মন্ত্রণালয়ৰ প্রতিনিধি বিশেষজ্ঞৰ দলে ক্ষেত্রভিত্তিক পর্যবেক্ষণ কৰে। তাৰ পাছত প্রকল্পবোৰৰ শেহতীয়া অৱস্থাৰ প্রতিবেদন নিয়ম অনুসৰি ৰাজ্যিক পৰ্যায়ৰ সৱলীকৰণ সমিতিৰ ওচৰত দাখিল কৰা হয়। প্রতিবেদনত প্রকল্প ৰূপায়ণৰ দুৰৱস্থাৰ ছবিখন তথ্যসহ দাঙি ধৰা হয়। প্রতিবেদনত এই কথা উল্লেখ কৰা হয় যে অসম চৰকাৰ আবণ্টিত প্রকল্পবোৰ ৰূপায়ণত সম্পূর্ণ ব্যর্থ হৈছে। প্রকল্পসমূহ ৰূপায়ণত অগ্রাধিকাৰ দিবলৈ বহুবাৰ সোঁৱৰাই দিয়া হৈছে। তথাপি চৰকাৰে বিষয়টোত প্রয়োজনীয় গুৰুত্ব প্রদান নকৰিলে।
ফলস্বৰূপে আবণ্টিত প্রকল্পবোৰ কাৰ্যতঃ এলাগী হৈ ৰয়। ইয়াৰ পৰিপ্ৰেক্ষিতত প্রকল্পসমূহৰ বিপৰীতে আবণ্টিত পুঁজিও অর্থহীনভাৱে আবদ্ধ হৈ ৰৈছে। এয়া পুঁজিৰ অপব্যৱহাৰৰ নামান্তৰ বুলিও মন্তব্য কৰা হয়। ৰাজ্যিক পৰ্যায়ৰ সবলীকৰণ সমিতিয়ে এই প্রতিবেদন পর্যালোচনা কৰি অৱশেষত প্রকল্পসমূহ বন্ধ কৰাত অনুমোদন জনায়। ইয়াৰ পাছতে ড’নাৰ মন্ত্রণালয়ে ২১১ কোটি টকাৰ প্রকল্পসমূহ পর্যায়ক্রমে বন্ধ কৰাৰ জাননী জাৰি কৰে। সেই অনুসৰি যোৱা জানুৱাৰীৰ পৰা আগষ্টলৈ ২০টা প্রকল্প বন্ধ কৰি দিয়ে।
সূত্ৰত প্রকাশ যে বন্ধ কৰি দিয়াবোৰৰ ভিতৰত আছে পথ নির্মাণ, দলং নির্মাণ, পানী যোগান, জলসিঞ্চন আদি প্রকল্প। এনে প্রকল্প বাতিল কৰাৰ ফলত বাজ্যখনৰ আন্তঃগাঁথনি নির্মাণ খণ্ডত বৃহৎ মাধমাৰ পৰে। উদাহৰণ স্বৰূপে তিনিচুকীয়াৰ ডুমডুমা নদীৰ ওপৰত এখন দলং নিৰ্মাণৰ এক গুৰুত্বপূৰ্ণ প্রকল্পত ড’নাৰ মন্ত্রণালয়ে অনুমোদন জনাইছিল। কিন্তু এটা দশকেও এই প্রকল্প ৰূপায়ণত অসম চৰকাৰে প্ৰয়োজনীয় গুৰুত্ব প্রদান নকৰিলে। ফলস্বৰূপে নিৰ্মাণৰ সমগ্র প্রক্রিয়াটো বাধাগ্রস্ত হয়।
অৱশেষত প্রকল্পটোৱেই বাতিল কৰিবলৈ কেন্দ্ৰীয় চৰকাৰৰ মন্ত্রণালয়টো বাধ্য হয়। শিৱসাগৰ জিলাতো দিহিং নদীৰ ওপৰত এখন পকী দলঙৰ নিৰ্মাণ বাতিল কৰা হয়। ডিমা হাছাওৰ মাহুৰ পথ সংমণ্ডলৰ অধীনৰ কে’বাটাও পথৰ নির্মাণো ড’নাৰ মন্ত্রণালয়ৰ শেহতীয়া সিদ্ধান্তত বাতিল কৰা হয়। বাতিলৰ তালিকাত আছে কে’বাটাও জলসিঞ্চন প্রকল্প।
উল্লেখনীয় যে প্রকল্প বাতিলৰ ফলত অসম চৰকাৰে পুঁজিও ঘূৰাই দিব লাগিব। কাৰণ কে’বাটাও প্ৰল্পৰ বিপৰীতে ধাৰ্য পুঁজিৰ কিয়দংশ ড’নাৰ মন্ত্রণালয়ে অসম চৰকাৰক মোকলাই দিছিল। এতিয়া প্রকল্পই বন্ধ কৰি দিয়াত তথা বাতিল কৰাত মোকলাই দিয়া পুঁজিও স্বাভাৱিক নিয়ম অনুসৰি ৰাজ্য চৰকাৰে ঘূৰাই দিবলৈ বাধ্য I
