UttarakhandHelicopterCrash :দৈনিক অগ্ৰদূত ডিজিটেল ডেস্ক : উত্তৰাখণ্ডৰ হেলিকপ্টাৰ দুৰ্ঘটনাক লৈ পোহৰলৈ আহিছে নতুন তথ্য। বেয়া বতৰৰ সতৰ্কবাণী জাৰি কৰা হৈছিল। ইয়াৰ লগতে সকলো ধৰণৰ উৰণ বন্ধ কৰাৰো নিৰ্দেশ দিয়া হৈছিল। ৰাজ্যখনৰ অসামৰিক বিমান পৰিবহণ বিভাগে এই দাবী কৰিছে। ইয়াৰ পাছতে প্ৰশ্ন উত্থাপন হৈছে, সতৰ্কবাণী লাভ কৰাৰ পাছতো কিয় হেলিকপ্টাৰখনক উৰণৰ অনুমতি দিয়া হৈছিল? এই বিষয়টোক লৈ উৰণ সংস্থাটোক জবাবদিহি কৰিছে ৰাজ্য প্ৰশাসনে।
উত্তৰাখণ্ড অসামৰিক বিমান পৰিবহণ উন্নয়ন কৰ্তৃপক্ষৰ (UCADA) মুখ্য কাৰ্যবাহী বিষয়া সঞ্জয় তয়লাৰ উদ্ধৃতি দি ‘টাইমছ অৱ ইণ্ডিয়া’ই প্ৰকাশ কৰা অনুসৰি, গ্ৰুপ কেপ্টেইন অমিত শৰ্মাৰ তৰফৰ পৰা সতৰ্কবাণী জাৰি কৰা হৈছিল।
তয়লাৰ ভাষ্য, “UCADA-ই সদায় দেশৰ বিমান নিয়ন্ত্ৰক সংস্থা DGCA-ৰ নিয়ম মানি চলে। শুকুৰবাৰেও সেই নিয়ম অনুসৰিয়েই বেয়া বতৰৰ সতৰ্কবাণী জাৰি কৰা হৈছিল। চাৰধাম যাত্ৰাত হেলিকপ্টাৰ চলাচলত নিষেধাজ্ঞা আৰোপ কৰা হৈছিল। দুৰ্ঘটনাৰ এঘণ্টা পূৰ্বে এই সতৰ্কবাণী জাৰি কৰা হৈছিল।”
তয়লাৰ দাবী, এই নিষেধাজ্ঞা অমান্য কৰিয়েই উৰণ সংস্থাটোৱে হেলিকপ্টাৰ চলাইছিল। তেওঁ আৰু জনাইছে যে DGCA-ৰ নিয়ম অনুসৰি তদন্ত কৰি ঘটনাটোত ক’ত গাফিলতি হৈছিল, সেয়া পৰীক্ষা কৰা হৈছে। সতৰ্কবাণী জাৰি কৰাৰ পাছতো কিয় সেই নিৰ্দেশ অগ্ৰাহ্য কৰা হ’ল, সেয়াও পৰীক্ষা কৰা হ’ব।
এয়াৰক্ৰাফ্ট এক্সিডেণ্ট ইনভেষ্টিগেশ্যন ব্যুৰ’ (AAIB) আৰু DGCA-ৰ বিষয়াসকলে দুৰ্ঘটনাস্থলীত উপস্থিত হৈ সকলো দিশ পৰীক্ষা কৰিছে। তেওঁলোকৰ প্ৰতিবেদনৰ ভিত্তিতেই পৰৱৰ্তী পদক্ষেপ গ্ৰহণ কৰা হ’ব।
অৱশ্যে, UCADA-ৰ এই দাবী খণ্ডন কৰিছে উৰণ সংস্থাটোৰ সঞ্চালক এছ ভট্টাচাৰ্যই। ‘টাইমছ অৱ ইণ্ডিয়া’ক তেওঁ জনোৱা অনুসৰি, এনে কোনো নিৰ্দেশৰ বিষয়ে তেওঁ অৱগত নহয়। ঘটনা সন্দৰ্ভত তদন্ত অব্যাহত আছে। এই বিষয়ে UCADA-ইহে যি ক’বলগীয়া আছে, ক’ব পাৰিব।
উল্লেখ্য যে শুকুৰবাৰে বদ্ৰীনাথৰ পৰা পাঁচগৰাকী পুণ্যাৰ্থীক লৈ হেলিকপ্টাৰখনে ডেৰাডুন অভিমুখে যাত্ৰা কৰিছিল। যোশীমঠৰ হাতী পৰ্বতত হেলিকপ্টাৰখন দুৰ্ঘটনাগ্ৰস্ত হয়। এই দুৰ্ঘটনাত পাইলটসহ ছয়গৰাকী লোকৰ মৃত্যু হয়। নিহত পাঁচগৰাকী যাত্ৰীয়েই কৰ্ণাটকৰ বাসিন্দা। আনহাতে, পাইলটজন দিল্লীৰ বাসিন্দা আছিল।