পাঁচ বছৰৰ ভিতৰত প্ৰমাণ দিব শ্ৰীলংকা প্ৰশাসনে
বিশ্বৰ প্রথমখন বিমান উৰাইছিল ৰাৱণে । লংকাধিপতি ৰাৱণে উৰাই দিয়া বিমানখনৰ প্ৰথম যাত্ৰী আছিল সীতা। ৰামায়ণত থকা এনে কথা সকলোৱে জানে যদিও শ্ৰীলংকাবাসীয়ে এই কথাক দাবীৰ ৰূপত উত্থাপন কৰিছে । সীতা হৰণৰ সমান্তৰালভাৱেই উত্থাপন হয় কেনেদৰে ৰাৱণে সীতাক লংকালৈ লৈ গৈছিল। ৰামায়ণত স্পষ্টভাৱেই উল্লেখ আছে যে ৰাৱণে সীতাক আকাশীপথেৰে লংকালৈ লৈ গৈছিল । দ্বীপৰাষ্ট্ৰখনৰ দাবীৰো প্ৰধান ভিত্তি হৈছে ৰামায়ণ। বিমান পৰিবহণৰ পথ প্ৰদৰ্শক হিচাপে ৰাৱণৰ নাম উত্থাপন কৰাই নহয়, এই সন্দৰ্ভত প্ৰমাণ দাখিল কৰিবলৈকো উঠি পৰি লাগিছে আধুনিক শ্ৰীলংকাই।
দেশখনৰ বিমান পৰিবহণ তথা পৰ্যটন দপ্তৰে এই বিষয়ত গৱেষণা কৰিব বিচৰাসকলৰ সন্ধানত সংবাদপত্ৰত বিজ্ঞাপনো প্ৰকাশ কৰিছে। বাল্মীকিৰ ৰামায়ণত ৰাৱণক খলনায়কৰ ৰূপত উপস্থাপন কৰিলেও শ্ৰীলংকাত ৰাৱণে বিশেষ আদৰ লাভ কৰে। শ্ৰীলংকাত ৰাৱণ অসাধাৰণ প্ৰতিভাধৰ হিচাপে পৰিচিত। ৰাৱণে বিমানযোগে সীতাক অপহৰণ কৰা ঘটনাই পাঁচ হেজাৰ বছৰ অতিক্ৰম কৰিছে। এই দাবী কৰা দেশখনৰ বিমান পৰিবহণ দপ্তৰৰ মতে ৰাৱণে প্রথমে আকাশীপথেৰে যাত্ৰা কৰাৰ কথা কাল্পনিক নহয়। বাস্তৱতেই এই ঘটনা ঘটিছিল। এই বিষয়ত গৱেষণা কৰি অহা পাঁচ বছৰৰ ভিতৰত উপযুক্ত প্ৰমাণ দাঙি ধৰা হ’ব। অৱশ্যে দশভূজা ৰাৱণক লৈ শ্ৰীলংকাত বহু ধৰণৰ কল্প কাহিনী অতীতৰে পৰা মুখে মুখে চলি আহিছে।
শ্ৰীলংকাই মহাকাশলৈ প্ৰেৰণ কৰা প্ৰথমটো চেটেলাইটৰ নামো সেয়ে ‘ৰাৱণ’ ৰাখিছিল । দেশখনৰ ইতিহাসবিদ, ভূতত্ববিদ, পুৰাতত্ববিদ তথা বিমান পৰিবহণ সংক্রান্ত বিশেষজ্ঞক লৈ এখন আলোচনাচক্ৰত ৰাৱণৰ আকাশীযানক লৈ মত বিনময়ো কৰা হয়। এই বিষয়টো মাজতে কিছুদিনলৈ গেঁঠেলা মাৰিছিল যদিও শেহতীয়াকৈ এইবাৰ প্ৰমাণ বিচাৰি পুনৰ তৎপৰতা চলোৱা হৈছে । বিষয়টোত গৱেষক বিচৰাৰ লগতে কোনো ব্যক্তিৰ ওচৰত কিবা তথ্য পাতি থাকিলে সেয়া দাখিল কৰিবলৈকো অনুৰোধ জনোৱা হৈছে। প্ৰয়োজনত নৃত্যবিদসকলৰো পৰামৰ্শ ল’বলৈ সিদ্ধান্ত লোৱা হৈছে। এতিয়া সকলোৱে অপেক্ষা কৰিছে শ্ৰীলংকাৰ বিমান পৰিবহণ দপ্তৰে উত্থাপন কৰা দাবীৰ সন্দৰ্ভত কি তথ্য-প্ৰমাণ দাখিল কৰিব পাৰে।
