কৃষক আন্দোলনৰ বাবে ভাৰত দ্বি-বিভক্ত হৈ থকাৰ সময়তে আন্তৰ্জাতিক স্তৰত ভাৰত চৰকাৰৰ স’তে থিয় দিলে আমেৰিকাই । মধ্যপন্থা গ্ৰহণ কৰিলে ব্ৰিটেইনে ।
কালি আমেৰিকাৰ গৃহমন্ত্ৰণালয়ৰ এজন মুখপাত্ৰই জনায়, ‘শান্তিপূৰ্ণ আন্দোলন উন্নত গণতন্ত্ৰৰ পৰিচয় । কৃষি আইনক লৈ ভাৰত চৰকাৰে যি পদক্ষেপ গ্ৰহণ কৰিছে ইয়াৰ ফলত ভাৰতৰ অৰ্থনীতিয়ে উন্নত হ’ব । লগতে বৈদেশিক বিনিয়োগৰ পথো মুকলি হ’ব ভাৰতত ।’ এই বক্তব্যৰ জৰিয়তে জ’ বাইডেন প্ৰশাসনে স্পষ্ট কৰি দিছে যে, ভাৰত চৰকাৰে কৃষিক্ষেত্ৰত যি সংস্কৰণ আনিছে সেয়া কৃষকৰ স্বাৰ্থতেই । এই সংস্কাৰৰ ফলত কৃষকসকল লাভান্বিত হ’ব বুলি দাবী কৰে আমেৰিকাই ।
আমেৰিকাই ভাৰতৰ স’তে থিয় দিলেও কিন্তু ব্ৰিটেইনে মধ্যপন্থা নীতি অৱলম্বন কৰিছে । বিষয়টো সন্দৰ্ভত ব্ৰিটেইনৰ সদনত এখন বিতৰ্কসভাৰ আয়োজন কৰিব বৰিছ জনছন প্ৰশাসনে । সূত্ৰ অনুসৰি, জনমতৰ ওপৰত ভিত্তি কৰিয়ে বিষয়টো সন্দৰ্ভত তেওঁলোকৰ অৱস্থান জনাব ।
Solidarity with all the farmers across India protesting for their livelihood.
India must protect their basic democratic rights, allow for the free flow of information, reinstate internet access, and release all the journalists detained for covering the protests. https://t.co/uOvwNkIu5n
— Ilhan Omar (@IlhanMN) February 3, 2021
বাইডেন প্ৰশাসন ভাৰত চৰকাৰৰ স’তে থাকিলেও কৃষক আন্দোলনক লৈ আমেৰিকাত যি দ্বিমত সৃষ্টি হৈছে, সেয়া এজন কংগ্ৰেছ সদস্যৰ কথাত স্পষ্ট পৰিলক্ষিত । কংগ্ৰেছ সদস্য হেলি ষ্টিভেন্সে কয়, ‘ভাৰতৰ কৃষক আন্দোলনৰ বিৰুদ্ধে যি পদক্ষেপ গ্ৰহণ কৰাৰ খবৰ লাভ কৰিছো, সেইটোক লৈ অতি উদ্বিগ্ন । মোদী চৰকাৰে উচিত আন্দোলনকাৰীসকলৰ স’তে বৈঠকত মিলিত হৈ সদৰ্থক পথ ওলিয়াব লাগে ।’ তেওঁ লগতে কয় যে, সমগ্ৰ পৰিস্থিতিটো পৰ্যৱেক্ষণ কৰি আছে তেওঁ । বিষয়টোক লৈ এটা জনমত গঢ়ি তোলাৰ ব্যৱস্থা কৰা হৈছে বুলিও জনায় তেওঁ ।
https://twitter.com/meenaharris/status/1356747965713371138?ref_src=twsrc%5Etfw%7Ctwcamp%5Etweetembed%7Ctwterm%5E1356747965713371138%7Ctwgr%5E%7Ctwcon%5Es1_c10&ref_url=https%3A%2F%2Fwww.anandabazar.com%2Fworld%2Fus-backs-the-steps-of-modi-govt-on-farm-bills-dgtl%2Fcid%2F1264813
কংগ্ৰেছৰ আন এজন সদস্য ইলহান অমৰে কৃষকসকলক সমৰ্থন কৰি কয়, ‘ভাৰতত গণতান্ত্ৰিক অধিকাৰ ৰক্ষা কৰা প্ৰয়োজন । কি হৈ আছে সকলোৰে আগত দাঙি ধৰা উচিত । যিদৰে ইণ্টাৰনেট বন্ধ কৰি দিয়া হৈছে, সাংবাদিকসকলক আটক কৰা হৈছে, সেইটো সঁচাই উদ্বিগ্নৰ বিষয় ।’ হেলি আৰু ইলহানৰ দৰে আমেৰিকাৰ বহু নেতাই কৃষক আন্দোলনৰ পক্ষত মত পোষণ কৰিছে । আমেৰিকাৰ উপ ৰাষ্ট্ৰপতি কমলা হেৰিছৰ ভতিজি মীনা হেৰিছেও কৃষক আন্দোলনক সমৰ্থন কৰিছে ।
কংগ্ৰেছ সদস্যসকলে বিৰোধিতা কৰিলেও আমেৰিকাৰ বৃহৎ আন্তৰ্জাতিক অৰ্থ ন্যাস (আইএমএফ)এ কৃষিক লৈ মোদী চৰকাৰে গ্ৰহণ কৰা পদক্ষেপক পূৰ্বেই স্বাগত জনাইছে । যোৱা মাহত আইএমএফৰ এজন শীৰ্ষ অধিকাৰী গেৰি ৰাইছে কয়, ‘আমাৰ দৃঢ় বিশ্বাস নতুন কৃষি আইন ভাৰতৰ কৃষিক্ষেত্ৰত এক যুগান্তকাৰী সংস্কাৰ । এই আইন কাৰ্যকৰী হ’লে কৃষকসকলেই উপকৃত হ’ব ।’
কৃষি আইন সন্দৰ্ভত বৰ্তমানেও অচলাৱস্থা সমাধা হোৱা নাই । অধিক তীব্ৰ আৰু বৃহত্তৰ আন্দোলনত নমাৰ প্ৰস্তুতি চলাইছে কৃষক সংগঠনবোৰে । তেওঁলোকৰ দাবী আইন প্ৰত্যাহাৰ নকৰা পৰ্যন্ত প্ৰতিবাদ অব্যাহত থাকিব । কৃষি আইন সন্দৰ্ভত সম্প্ৰতি পপ তাৰকা ৰিহানাই টুইট কৰিছে । তেওঁৰ টুইটে সম্প্ৰতি বিতৰ্ক আৰম্ভ কৰিছে । লগতে গ্ৰেটা থুনবাৰ্গ আৰু মিয়া খালিফাও কৃষি আইন সন্দৰ্ভত টুইট কৰিছে । চৰকাৰৰ সমৰ্থনত টুইট কৰিছে বলীউডৰ কুইন কংগনা ৰণাৱতেও ।
