যানবাহনক ‘ৰাজহুৱা স্থান’ হিচাপে অভিহিত কৰি আজি দিল্লী উচ্চ ন্যায়ালয়ে জনায় যে, গাড়ীত অকলশৰে থাকিলেও মাস্ক পৰিধান কৰআ অনিবাৰ্য । মাস্ক হৈছে পৰিধান কৰা লোকৰ বাবে আৰু চাৰিওফালৰ লোকৰ বাবে এটা ‘সুৰক্ষা কৱচ’ । মাস্ক পৰিধান নকৰাকৈ গাড়ী চলোৱাৰ বাবে জৰিমনা ভৰা আবেদনকাৰীসকলৰ শুনানিৰ সময়ত ন্যায়াধীশ প্ৰতিভা এম সিঙে এই ঘোষণা কৰে ।
ন্যায়াধীশ সিঙে কয় যে, ট্ৰেফিক ছিগ্নেলত গাড়ী ৰখোৱাৰ পাছত কেতিয়াবা গাড়ী চালকসকলে গাড়ীৰ খিৰিকী নমাবলগীয়া হয় । কৰ’না ভাইৰাছ ইমানেই সংক্ৰামক যে সেই সময়তো কোনো লোক সংক্ৰমিত হ’ব পাৰে ।
মাস্ক পৰিধান নকৰাকৈ গাড়ী চলাই পাঁচশ টকাৰ জৰিমনা ভৰা সকলৰ ভিতৰত অধিবক্তা সৌৰভ শৰ্মাও এজন । শুনানি চলাকালীন কেন্দ্ৰীয় স্বাস্থ্য মন্ত্ৰণালয়ে উচ্চ ন্যায়ালয়ক কৈছিল যে, অকলশৰে মাস্ক পৰিধান কৰি বাহন চলোৱা ধৰণৰ কোনো নিয়ম নাই । অৱশ্যে, প্ৰতিটো ৰাজ্যৰে নিজস্ব নীতি-নিয়ম প্ৰস্তুত কৰাৰ আৰু প্ৰয়োগ কৰাৰ অধিকাৰ আছে ।
দিল্লীৰ আম আদমি পাৰ্টি (এএপি)য়ে সকলো ব্যক্তিগত আৰু চৰকাৰী বাহনত মাস্ক পৰিধান অপৰিহাৰ্য বুলি ঘোষণা কৰি বিগত বৰ্ষৰ এপ্ৰিলত এটা আইনো পাছ কৰিছিল । কিন্তু আবেদনকাৰীয়ে আঙুলিয়াই দিয়ে যে, দিল্লী চৰকাৰৰ নিয়ম স্বত্বেও, কেন্দ্ৰীয় স্বাস্থ্য মন্ত্ৰণালয়ে সেই সময়তে এক সংবাদ মেলত জনাইছিল যে, অলশৰে বাহন চলোৱা লোকে মাস্ক পৰিধান কৰা প্ৰয়োজনীয় নহয় ।
দিল্লীত চলিত বৰ্ষৰ সৰ্বাধিক পাঁচ হেজাৰ এশজন লোক ক’ভিড-১৯ত আক্ৰান্ত হোৱাৰ পাছতে এই ঘোষণা কৰা হয় ।