গোলাঘাটত বনৰীয়া হাতীৰ বাবে ১৮০ মাটিত ধান খেতি আৰম্ভ কৰিছে গঁঞা ৰাইজে । যি সময়ত হাতী-মানুহৰ সংঘাতে তীব্ৰতৰ ৰূপ ধাৰণ কৰিছে,তেনে সময়তে খাদ্য সংকটত ভোগা বনৰীয়া হাতীৰ বাবে গোলাঘাটত ৰাইজে ১৮০ বিঘা বিস্তৃত কৃষি ভূমিত আৰম্ভ কৰিছে ধান খেতি ।
এই ব্যতিক্ৰমী পদক্ষেপ গোলাঘাট জিলাৰ থুৰামুখ মিৰিপথাৰ গাঁৱৰ ৰাইজৰ । নামবৰ বনাঞ্চলৰ পৰা খাদ্যৰ অন্বেষণত ওলাই অহা বনৰীয়া হাতীৰ জাকে এই ১৮০ বিঘা মাটিত কৰা ধানখেতি মুকলি মনেৰে উদৰ পুৰাই খাই পেটৰ ক্ষোধা নিবাৰণ কৰিব ।
বন্যহস্তীৰ প্ৰতি থকা শ্ৰদ্ধা আৰু মৰমৰ উৎকৃষ্ট নিদৰ্শন ডাঙি ধৰি থুৰামুখ মিৰিপথাৰবাসী ৰাইজৰ এনে মহৎ পদক্ষেপে সকলোৰে বিশেষ দৃষ্টি আকৰ্ষণ কৰিছে । উল্লেখ্য যে, খাদ্যৰ অভাৱত বন্যহস্তীৰ দলে উপায়হীন হৈ পেটৰ ক্ষোধা নিবাৰণৰ বাবে বৃহত্তৰ অঞ্চলটোত দীৰ্ঘদিনৰ পৰা উপদ্ৰৱ চলাই আহিছে ।
অঞ্চলটোৰ ঘৰ-দুৱাৰ,সা-সম্পত্তি,শস্য আদি বনৰীয়া হাতীয়ে ধংস কৰাটো নিত্য নৈমত্তিক ঘটনাত পৰিণত হৈছে । হাতীৰ আক্ৰমণত বিভিন্ন সময়ত বহু লোকে কৰুণ মৃত্যুক আকোৱালি ল’বলগীয়া হৈছে । তেনে পৰিস্থিতিত বনৰীয়া হাতীৰ প্ৰতি সহমৰ্মিতা প্ৰকাশ কৰি প্ৰায় ১০ বছৰ ধৰি অঞ্চলটোত পৰিত্যক্ত অৱস্থাত থকা প্ৰায় ১৮০ বিঘা কৃষিভূমিত বন্যহস্তীকুলৰ বাবে ৰাইজে আৰম্ভ কৰিবলৈ লৈছে ধান খেতি ৷
ৰাইজে অনুভৱ কৰে যে, গভীৰ খাদ্য সংকটত ভূগি খাদ্যৰ সন্ধানত বনাঞ্চলৰ পৰা ওলাই অহা বন্যহস্তীৰ দলে ৰাইজে কৰা এই ধান খাই পেটৰ ক্ষোধা নিবাৰণ কৰিব আৰু পেটৰ ক্ষোধা নিবাৰণ হ’লেই কাৰো অনিষ্ট নকৰে নাইবা অঞ্চলটোত উপদ্ৰুৱ নচলায় ।
গাঁওবাসীৰ এই মহৎ পদক্ষেপত সহায়ৰ হাত আগবঢ়াইছে নগাঁৱৰ বিনোদ বৰা নামৰ এজন যুৱকে ৷ স্মৰ্তব্য যে, বিভিন্ন সময়ত বন বিভাগে হাতী-মানুহৰ সংঘাত ৰোধৰ বাবে নানা ধৰণৰ পৰিকল্পনা হাতত লৈছে যদিও আজি পৰ্যন্ত বনৰীয়া হাতীৰ উপদ্ৰুৱৰ পৰা সৰ্বসাধাৰণ ৰাইজ পৰিত্ৰাণ লাভ কৰিবলৈ সক্ষম হোৱা নাই ।
এনে প্ৰেক্ষাপটত গোলাঘাট জিলাৰ নামবৰ বনাঞ্চল সমিপৱৰ্তী থুৰামুখ মিৰিপথাৰবাসী ৰাইজে এনে ব্যতিক্ৰমী পদক্ষেপ গ্ৰহণ কৰি বনৰীয়া হাতীৰ বাবে ১৮০ বিঘা মাটিত ধান খেতিৰ কঠীয়া সিঁচা পৰ্বও আজি ৰাজহুৱাভাৱে আৰম্ভ কৰে ৷
থুৰামুখ মিৰিপথাৰ গাঁৱৰ ৰাইজৰ এনে ব্যতিক্ৰমী তথা বন্যহস্তীকুলৰ প্ৰতি দেখুওৱা মৰম-আদৰক সকলোৱে একমুখে আদৰণি জনাইছে ।