পঞ্চায়ত আৰু গ্ৰামোন্নয়ন বিভাগৰ ধুবুৰী জিলাৰ গৌৰীপুৰ উন্নয়ন খণ্ডৰ দুগৰাকীকৈ বিভাগীয় স্বীকৃত অভিযন্তা আৰু ব্যৱসায়িক প্ৰতিষ্ঠান এটাৰ এজন স্বত্বাধিকাৰী অৰ্থাৎ ভেণ্ডৰকে ধৰি মুঠ তিনিগৰাকী ব্যক্তিৰ বিৰূদ্ধে ধুবুৰী সদৰ থানাত আজি এক এজাহাৰ দাখিল কৰে জিলা প্ৰশাসনে।
তথ্য অনুসৰি গৌৰীপুৰ উন্নয়ন খণ্ডত পঞ্চায়ত আৰু গ্ৰামোন্নয়ন বিভাগৰ এমজিএনৰেগা আঁচনিৰ অধীনৰ ৫২.৭২ লাখ টকীয়া আঁচনি ৰূপায়নত চৰম দুৰ্নীতিৰ অভিযোগ উত্থাপন হৈছিল।
তাৰ পাছতেই পঞ্চায়ত আৰু গ্ৰামোন্নয়ন বিভাগৰ শীৰ্ষ পৰ্য্যায়ৰ দুগৰাকী বিষয়াই ধুবুৰীত উপস্থিত হৈ চৰজমিন তদন্ত কৰি ঘটনাৰ তদন্তৰ নিৰ্দেশ দিয়া হৈছিল জিলা পৰিষদৰ মুখ্য কাৰ্যবাহী বিষয়া অনিমেশ তালুকদাৰক।
সেইমতে প্ৰায় এক হেজাৰ কামৰ এক চৰজমিন তদন্ত চলাইছিল ধুবুৰী জিলা পৰিষদৰ মুখ্য কাৰ্যবাহী বিষয়া তালুকদাৰে। ধুবুৰী জিলা উপায়ুক্ত আন্বামুথন এম পিৰ নিৰ্দেশ মৰ্মে চলোৱা তদন্তৰ পাছতেই জিলা উপায়ুক্তক এখন লিখিত প্ৰতিবেদন দাখিল কৰে।
তদন্তৰ প্ৰতিবেদনত গৌৰীপুৰ উন্নয়ন খণ্ডটোৰ দুগৰাকী স্বীকৃত অভিযন্তা ক্ৰমে ছাদ্দাম হুছেইন আৰু আব্দুল্লাহ অল মাছুদ মোল্লাহ আৰু গৌৰীপুৰৰ মধুশৌলমাৰীৰ ‘জাহিদূল এন্টাৰপ্ৰাইজ’’ নামৰ ব্যৱসায়িক প্ৰতিষ্ঠান এটাৰ স্বত্বাধিকাৰী অৰ্থাৎ ভেণ্ডৰ জনৈক জাহিদূল হ’ক দূৰ্নীতিত লিপ্ত থকা বুলি উন্মোচিত হয়।
তাৰ পাছতেই আজি ধুুবুৰী সদৰ থানাত উক্ত তিনিওগৰাকী ব্যক্তিৰ বিৰূদ্ধে ধুবুৰী জিলা পৰিষদৰ কাৰ্যনিৰ্বাহক বিষয়াগৰাকীয়ে এখন এজাহাৰ দাখিল কৰে। আৰক্ষীয়ে উক্ত এজাহাৰৰ ভিত্তিত ১০৯৭/২১ নম্বৰত ভাৰতীয় দণ্ডবিধি আইনৰ ১২০(বি)/৪০৬/৪২০/৪৬৮/৪৭১ ধৰাত এখন গোচৰ পঞ্জীয়ন কৰে। শীঘ্ৰেই গ্ৰেপ্তাৰ হব পাৰে ভেণ্ডৰ সহ দুই অভিযন্তা। কিন্তু উল্লেখযোগ্য যে জিলা প্ৰশাসনে এজাহাৰ দাখিল কৰাৰ লগে লগে তিনিও অভিযন্তা, ভেণ্ডৰ পলাতক অৱস্থাত ।