বিনোদন জগত আৰু গ্লেমাৰ যেন ইটো সিটোৰ পৰিপূৰক । পৰ্দাতেই হওক বা পৰ্দাৰ বাহিৰত, মেকআপ অবিহনে আমি অভিনেতা-অভিনেত্ৰীসকলক কল্পনাই কৰিব নোৱাৰো । বিনোদন আৰু গ্লেমাৰৰ এই সমীকৰণৰ সম্পূৰ্ণ বিপৰীতে গৈ নজিৰ গঢ়িছে দক্ষিণৰ এগৰাকী তাৰকাই । তেওঁ কেতিয়াও মেকআপ নকৰে ।
এই অভিনেত্ৰীগৰাকী হৈছে ছাই পল্লৱী ছেন্ঠামাৰাই । ১৯৯২ৰ ন মে’ত তামিলনাডুৰ নীলগিৰি জিলাত তেওঁৰ জন্ম । সৰুকাল কাটে কোয়ম্বত্তুৰত । সম্প্ৰতি তেওঁ পিতৃ-মাতৃ আৰু ভগ্নীৰ স’তে কোচিত থাকে ।
তেওঁৰ পিতৃ আবকাৰী বিভাগত কৰ্মৰত । মাতৃ নৃত্যশিল্পী । মাতৃক দেখিয়ে সৰুৰ পৰা নৃত্যৰ প্ৰতি আগ্ৰহ জন্মে তেওঁৰ । ছাই পল্লৱীয়ে কেতিয়াও নৃত্যৰ প্ৰশিক্ষণ লোৱা নাই । কিন্তু প্ৰশিক্ষিত নহয় যদিও তেওঁৰ নৃত্যই দৰ্শকক মুগ্ধ কৰে ।
কেৱল অভিনয়েই নহয়, তেওঁৰ ব্যক্তিত্ব আৰু সৰলতাই দৰ্শকসকলক তেওঁক ভাল পাবলৈ বাধ্য কৰে । বিনোদন জগতত জাকজমকতাৰ স’তে খোজত-খোজ মিলাই চলিবলৈ যিসময়ত সকলো অভিনেতা-অভিনেত্ৰীয়ে প্ৰসাধনৰ ব্যৱহাৰ কৰে, ইয়াতেই নজিৰ ছাই পল্লৱীৰ ।
গালৰ দাগ আৰু কেকোৰা চুলিৰেই অভিনয় কৰে জনপ্ৰিয় অভিনেত্ৰীগৰাকীয়ে । তেওঁ গালৰ দাগো কেতিয়াও মেকআপৰ সহায়ত ঢাকিবলৈ চেষ্টা কৰা নাই । অৱশ্যে কেতিয়াবা স্ক্ৰিপ্তৰ চাহিদা অনুযায়ী মেকআপ কৰিবলগীয়া হ’লেও সামান্য মেকআপ কৰে ।
ছাই পল্লৱীয়ে এসময়ত নিজৰ চেহেৰাক লৈ হীনমান্যতাত ভুগিছিল । প্ৰথমাৱস্থাত অভিনয়ৰ সুযোগো লাভ কৰিছিল । কিন্তু তেওঁ চেষ্টা অব্যাহত ৰাখে । বাহিৰৰ ৰূপেই যে সকলো নহয়, সেই কথা প্ৰমাণ কৰাৰ অপ্ৰাণ চেষ্টাই আজি তেওঁক এই স্থানত উপনীত কৰিছে ।
ছাই পল্লৱী প্ৰথম চৰ্চাত আহে এটা গাৰ বৰণ উজ্বল কৰা ক্ৰিমৰ বিজ্ঞাপনক কেন্দ্ৰ কৰি । গাৰ বৰণ উজ্বল কৰা এটা ক্ৰিমৰ বিজ্ঞাপনৰ বাবে তেওঁ দুই কোটি টকাৰ প্ৰস্তাৱ লাভ কৰিছিল । কিন্তু এনে ধৰণৰ বিজ্ঞাপন ছোৱালীৰ বাবে অপমানজনক বুলি মন্তব্য কৰি তেওঁ এই কোটি টকাৰ প্ৰস্তাৱ নাকচ কৰে । ইয়াৰ পাছত ভাৰতৰ সংবাদ মাধ্যমৰ লগতে আন্তৰ্জাতিক মহলতো যথেষ্ট প্ৰশংসা হয় ।
২০০৩ৰ ‘কষ্টুৰিমান’ আৰু ২০০৮ৰ ‘ধাম ধুম’ ছবিত তেওঁ শিশু শীল্পীৰ অভিনয় কৰি নিজৰ আত্মপ্ৰকাশ কৰিছিল । পাছত পঢ়া-শুনাত ব্যস্ত থকাৰ বাবে দীৰ্ঘসময়ৰ বিৰতি লয় অভিনেত্ৰীগৰাকীয়ে ।
২০০৪ত জৰ্জিয়াত থকাকালীন পৰিচালক আলফোনছে পুঠাৰেনে তেওঁক ‘প্ৰেমাম’ ছবিৰ প্ৰস্তাৱ দিয়ে । ছাই পল্লৱী তেতিয়া জৰ্জিয়াতে পঢ়ি আছিল । ছুটিত ঘৰলৈ উভতি তেওঁ ছবিখনৰ শ্বুটিং কৰে । প্ৰথম ছবিৰ পৰাই তেওঁৰ অভিনয় ভাল পাবলৈ লয় দৰ্শকসকলে ।
প্ৰথম ছবিতেই ছাই পল্লৱীয়ে প্ৰমাণ কৰি দিছিল যে, মুখৰ খুঁত লুকাই ‘সুন্দৰী’ নহইয়ো দৰ্শকৰ মন জয় কৰিব পাৰি । ইয়াৰ পৰৱৰ্তী বছৰত পঢ়া-শুনাৰ পৰা এমাহৰ ছুটিত ঘৰলৈ আহি তেওঁ দ্বিতীয় ছবি ‘কালি’ৰ শ্বুটিং কৰে । ২০১৬ত ছবিখনে মুক্তি পায় । মালয়ালী ছবিত তেওঁৰ কাম ভাল পাইছিল দৰ্শকসকলে ।
সেয়ে কেৰিয়াৰৰ খুব কম সময়তে তেওঁ তেলেগু ছবিৰো সুযোগ লাভ কৰে । ২০১৭ত তেওঁৰ প্ৰথম তেলেগু ছবি ‘ফিদা’ মুক্তি পায় । ইয়াৰ পাছত ‘দিয়া’, ‘মাৰি-২’সহ একাধিক জনপ্ৰিয় ছবিত তেওঁ অভিনয় কৰে ।
২০২০ৰ ফ’ৰ্বছ ইণ্ডিয়া’জ ৩০ আণ্ডাৰ ৩০ত তালিকাভুক্ত হৈছিল তেওঁ । দক্ষিণৰ ইণ্ডাষ্ট্ৰীৰ তেঁৱেই একমাত্ৰ অভিনেত্ৰী যাৰ নাম এই তালিকাত অন্তৰ্ভুক্ত হৈছে ।
কেৱল মেকআপৰ অবিহনেই যে তেওঁ পৰ্দাত আহে তেনে নহয়, ইয়াৰ উপৰি তেওঁ নিজৰ বাবে আৰু দুটা নিয়ম বান্ধি ৰাখিছে । পৰ্দাত ছুটি বস্ত্ৰ একেবাৰে পিন্ধিব নিবিচাৰে তেওঁ । স্ক্ৰিপ্তৰ চাহিদা অনুযায়ী অতি প্ৰয়োজন নহ’লে ছুটি পোছাক এৰাইয়ে চলে তেওঁ । শ্বুটিং আৰম্ভ কৰাৰ পূৰ্বে তেওঁ এই বিষয়ে পৰিচালকক স্পষ্টভাৱে জনাইও দিয়ে ।
নিজৰ বাবে বন্ধা আন এটা নিয়ম হৈছে, পৰ্দাত কোনো ঘনিষ্ঠ দৃশ্যত অভিনয় নকৰে । বিশেষকৈ পৰ্দাৰ অভিনেতাৰ স’তে চুম্বন একেবাৰেই পছন্দ নকৰে তেওঁ ।
ছাই পল্লৱীৰ এক বিশেষ গুণৰ বিষয়ে বহুতেই নাজানে । তেওঁ সুদক্ষ অভিনেত্ৰী হোৱাৰ লগতে এগৰাকী চিকিৎসকো । ২০১৬ত তেওঁ জৰ্জিয়াৰ টিবিলিছি ষ্টেট মেডিকেল বিশ্ববিদ্যালয়ৰ পৰা এমবিবিএছ ডিগ্ৰী অৰ্জন কৰিছে ।
