জন্ম মানে মৃত্যু অনিবার্য । মৃত্যুৰ পাছত পুনৰ উভতি আহিব পাৰি জানো ? আমেৰিকাৰ এদল বৈজ্ঞানীকে সেই অসাধ্যই সাধন কৰি দেখুৱালে । ৩৩ বছৰ আগতে মৃত্যু হোৱা এটা প্রাণীক জীৱন্ত কৰি তুলিলে তেওঁলোকে ।
ব্লেক ফুটেড ফেৰেট । বেজিৰ সদৃশ চাৰিঠেঙিয়া প্রাণী । ভৰিৰ একেবাৰে তলৰ অংশ ক’লা নোমেৰে ঢকা । সেয়ে ব্লেক ফুটেড অর্থাৎ ক’লা ভৰি বুলি নামাকৰণ কৰা হৈছে ।
উত্তৰ-মধ্য আমেৰিকাজুৰি এই প্রাণীৰ বাস । বৰ্ধিত জনবসতিৰ বাবে এই প্রাণীৰ মূল খাদ্য পেইৰি ডগ (বৃহৎ এন্দুৰ জাতীয় প্রাণী) ক্রমে লুপ্তপ্ৰায় হৈ পৰিছে । খাদ্য সংকটৰ ফলত এই প্রাণীৰ সংখ্যাও হ্রাস পাইছে ।
এই প্রজাতিটো ক্রমশঃ কমি আহিছে । ইহঁতক বচাবৰ বাবে আপ্রাণ চেষ্টা চলাইছে বৈজ্ঞানীকসকলে । এইবাৰ এটা মৃত ফেৰেটক জীৱন্ত কৰি তুলিলে তেওঁলোকে ।
বৈজ্ঞানীকসকলে জনায়, এই প্রাণীটোৰ ১৯৮৮ তে মৃত্যু হৈছিল । তাৰ পাছৰ পৰাই তাৰ দেহ সংৰক্ষণ কৰি ৰাখিছিল বৈজ্ঞানীকসকলে ।
ভৱিষ্যতৰ কথা ভাবি ১৯৮০ ত বৈজ্ঞানীকসকলে এই প্রাণীটোক জীৱিত অৱস্থাতেই নিজৰ সংগ্রহত ৰাখিছিল । তাৰ আঠ বছৰ পাছত প্রাণীটোৰ মৃত্যু হয় । আমেৰিকাৰ ফিছ এণ্ড ৱাইল্ডলাইফ ছাৰ্ভিচৰ বৈজ্ঞানীকসকলে সম্প্রতি সেই মৃত প্রাণীটোকেই জীৱিত কৰি তুলিছে ।
প্রকৃততে প্রাণীটোৰ ডিএনএ সংৰক্ষিত কৰি ৰাখিছিল বৈজ্ঞানীকসকলে । সেই ডিএনএ-ৰ ক্লোন বনাই হুবহু একেই দেখা প্রাণীৰ জন্ম দিছে তেওঁলোকে । প্রাণীটোৰ নাম এলিজাবেথ এন । এইটো এটা স্ত্রী ফেৰেট ।
চলতি বছৰ ফেব্রুৱাৰীত পুনর্জন্ম হয় ফেৰেটৰ । প্রাণীটোক সম্প্ৰতি গৱেষণাগাৰৰ উপযুক্ত পৰিৱেশত ৰখা হৈছে ।
কিছুদিন পর্যবেক্ষণৰ পাছত তাক বন্য পৰিৱেশত এৰি দিয়া হ’ব । বন্য পৰিৱেশত যদি ই বাচিবলৈ সক্ষম হয় তেনেহ’লে এই প্রজাতিৰ ক্রমহ্রাসমান সংখ্যাও নিয়ন্ত্রণত আনিব পৰা যাব, বিশ্বাস বৈজ্ঞানীকসকলৰ ।
১৯৮২ ত প্রথম এই প্রজাতি ‘বিপদগ্রস্ত’ হিচাপে তালিকাভুক্ত হয় । ১৯৯৬ ত ইয়াৰ সংখ্যা আৰু কমি গৈ লুপ্তপ্রায় পর্যায়ত পায় । তাৰ পাছত কেৱল সংৰক্ষণৰ ফলত ইয়াৰ কিছু সংখ্যা বৃদ্ধি পায় । ২০০৮ত পুনৰ এই প্রজাতিক ‘বিপদগ্রস্ত’ তালিকাভুক্ত কৰা হয় ।
সম্প্ৰতি মাত্র ৬৫০টা ফেৰেট জীৱিত আছে । ইহঁতৰ ভিতৰত স্ত্রীৰ সংখ্যা আৰু কম । নতুন ক্লোন প্রাণীটো যদি বংশবিস্তাৰত সক্ষম হয় তেনেহ’লে ক্রমহ্রাসমান প্রজাতিৰ সংখ্যা নিয়ন্ত্রণত বহু পৰিমাণে চিন্তামুক্ত হ’ব বৈজ্ঞানীকসকল ।
