সংখ্যাতত্ত্বৰ সকলো হিচাপক চেৰাই গৈ দ্ৰুত হাৰত বিয়পিছে কৰ’না ভাইৰাছৰ নতুন প্ৰজাতি অ’মিক্ৰন । ইয়াতে ক’ভিডৰ তৃতীয় লহকৰৰ আশংকা কৰিছে কেন্দ্ৰীয় চৰকাৰে । বিশেষজ্ঞৰ মতে, এই গতিত বিয়পি থাকিলে ভাৰতত অতি দ্ৰুতগতিত আছাৰ খাই পৰিব পাৰে সংক্ৰমণৰ তৃতীয় লহৰ । বুষ্টাৰ ড’জ আৰু শিশু-কিশোৰক প্ৰতিষেধক প্ৰদানক কেন্দ্ৰ কৰি কেন্দ্ৰীয় স্বাস্থ্য মন্ত্ৰণালয়ত কালি সবিস্তাৰে আলোচনা হয় যদিও কোনেও ঐক্যমতত উপনীত হ’ব নোৱাৰিলে ।
অৱশ্যে ছেৰাম ইনষ্টিটিউট আৰু ন’ভাভেক্স যৌথভাৱে ১৮ বছৰৰ তলৰ ল’ৰা-ছোৱালীৰ বাবে প্ৰস্তুত কৰা ‘ক’ভ’ভেক্স’ প্ৰতিষেধকক আজি বিশ্ব স্বাস্থ্য সংস্থা (হু)ৰ তৰফৰ পৰা স্বীকৃতি প্ৰদান কৰা হয় । আগন্তুক বছৰত শিশু-কিশোৰৰ বাবে ক’ভ’ভেক্স প্ৰতিষেধক বজাৰত এৰিব পৰা যাব বুলি আশা প্ৰকাশ কৰিছে ছেৰামৰ মুৰব্বী আদৰ পুনাৱালাই ।
দক্ষিণ আফ্ৰিকাত প্ৰথম চিহ্নিত হোৱা অ’মিক্ৰনক যোৱা ২৬ নৱেম্বৰত ‘হু’ৱে ‘ভেৰিয়েণ্ট অৱ কনচাৰ্ণ’ আখ্যা দিছিল । সেই দিনা পাঁচখন দেশত ৮৭ জন অ’মিক্ৰন আক্ৰান্তৰ সন্ধান পোৱা গৈছিল, কিন্তু মাত্ৰ তিনি সপ্তাহৰ ভিতৰতে সেই সংক্ৰমণ প্ৰায় ৯০খন দেশলৈ বিয়পি পৰে । সেইদৰে ভাৰতত যোৱা দুই ডিচেম্বৰত বাংগালুৰুত প্ৰথমজন অ’মিক্ৰন আক্ৰান্তৰ সন্ধান পোৱা গৈছিল যদিও বিগত ১৫ দিনত ১১জন ৰাজ্যত প্ৰৱেশ কৰে এই প্ৰজাতিয়ে ।
দেশত এই পৰ্যন্ত আক্ৰান্ত হৈছে ১০৮ জন । ইয়াৰ ভিতৰত মহাৰাষ্ট্ৰত ৪০জন আৰু দিল্লীত ২২জন আক্ৰান্ত হৈছে । আক্ৰান্তসকলৰ ভিতৰত বাংগালুৰুৰ এজন চিকিৎসকৰ বাহিৰে বাকী সকলোৰে সংক্ৰমণৰ উৎস চিনাক্ত হোৱা বুলি স্বাস্থ্য মন্ত্ৰণালয়ে দাবী কৰিছে ।
স্বাস্থ্য মন্ত্ৰণালয়ে ধাৰণা কৰিছে যে অ’মিক্ৰনত আক্ৰান্তসকলৰ অধিকাংশৰে মৃদু উপসৰ্গ দেখা গৈছে বাবেই দেশবাসীয়ে এই ক্ষেত্ৰত গা এৰা মনোভাৱ পোষণ কৰিছে । স্বাস্থ্য মন্ত্ৰণালয়ৰ যুটীয়া সচিব নৱ আগৰৱালাই এই প্ৰসংগত কয়, ‘দ্বিতীয় লহৰৰ পূৰ্বে ঠিক এইদৰেই সাধাৰণ জনতাই গা এৰা মনোভাৱ দেখুৱাইছিল । তাৰ পৰিণতি আমি জানো ।’
ইপিনে, স্বাস্থ্য বিভাগৰ একাংশ শীৰ্ষ বিষয়াই কয় যে ব্ৰিটেইন, ডেনমাৰ্কৰ দৰে দেশসমূহত যি গতিত অ’মিক্ৰনৰ সংক্ৰমণ বাঢ়িছে; সেয়া অতীতত কোনো প্ৰজাতিৰ ক্ষেত্ৰত দেখা নাই । নীতি আয়োগৰ সদস্য (স্বাস্থ্য) বিনোদ পলে কয়, ‘দক্ষিণ আফ্ৰিকাত ডেল্টা প্ৰজাতিৰ উপস্থিতি কম আছিল । আকৌ ব্ৰিটেইনত ইমানদিনে সংক্ৰমণৰ প্ৰধান কাৰণ আছিল ডেল্টা । দুয়োখন দেশতে এতিয়া অ’মিক্ৰন আধিপত্য বিস্তাৰ কৰিছে । জনগোষ্ঠীত সংক্ৰমণৰ প্ৰশ্নত এই প্ৰজাতিয়ে অতি সোনকালেই ডেল্টাকো চেৰাই যাব ।
কেন্দ্ৰই আশংকা কৰিছে যে অ’মিক্ৰনৰ সংক্ৰমণৰ হাৰ ইমানেই বেছি যে তাৰ ফলতে নতুনকৈ সমগ্ৰ প্ৰথিৱীতে সংক্ৰমণৰ ঢৌ অহাৰ উপক্ৰম ঘটিছে । এতিয়াৰ পৰাই সতৰ্ক নহ’লে আগন্তুক দিনত অ’মিক্ৰনৰ সংক্ৰমণে দেশৰ স্বাস্থ্য নতুনকৈ প্ৰত্যাহ্বানৰ মুখত পেলাব । নীতি আয়োগৰ সদস্য (স্বাস্থ্য) পলে কয়, ‘কেৱল প্ৰতিষেধকে এই লহৰক ৰুদ্ধ কৰিব নোৱাৰিব । অন্যান্য ক’ভিড বিধিও মানিব লাগিব ।’
আনহাতে, স্বাস্থ্য মন্ত্ৰণালয়ৰ যুটীয়া সচিব আগৰৱালে কয় যে তৃতীয় লহৰ অৱশ্যম্ভাৱী । ছাৰ্ছৰ লহৰ যিদৰে দুটা দশক ধৰি এতিয়াও আহি আছে, সেইদৰেই আগন্তুক দিনত কৰ’নাৰ তৃতীয় বা চতুৰ্থ লহৰ অহাটোও স্বাভাৱিক বুলি তেওঁ কয় ।
অৱশ্যে আগৰৱালে লগতে মন্তব্য কৰে যে ভাৰতত অ’মিক্ৰনৰ লহৰ আহিলেও অন্যান্য দেশৰ দৰে ইয়াতো অধিকাংশ ৰোগীৰ শৰীৰত মৃদু উপসৰ্গই দেখা যাব পাৰে । সেই ক্ষেত্ৰত বহুতকে হয়তো হাস্পাতালত ভৰ্তি কৰোৱাৰ প্ৰয়োজন নহ’ব । বৰঞ্চ সংক্ৰমণৰ লহৰ যিমান আহিব, সিমানেই জনগোষ্ঠীৰ মাজত ৰোগ প্রতিৰোধ ক্ষমতা (হাৰ্ড ইম্যিউনিটী) সৃষ্টি হ’ব । দেশৰ কিমান মানুহৰ মাজত হাৰ্ড ইম্যিউনিটী সৃষ্টি হৈছে, সেই বিষয়ে কোনো তথ্য দিব নোৱাৰিলে আগৰৱালে । অৱশ্যে ছবিখন ঠিক বিপৰীত হ’ব পাৰে বুলিও আশংকা ব্যক্ত কৰে আগৰৱালে ।
তেওঁ কয়, ‘তৃতীয় লহৰৰ বিস্তাৰ ইমানেই শক্তিশালী হৈছে যে দ্বিতীয় লহৰৰ চাৰি লক্ষ দৈনিক সংক্ৰমণৰ অভিলেখকো অতিক্ৰম কৰিব পাৰে । ডেল্টাৰ দৰে যদি অ’মিক্ৰনৰো মাৰণ ক্ষমতা থাকে; তেন্তে কৰ্কট, যক্ষ্মা বা এইড্ছ বিষয়াসকলে মন্তব্য কৰিছে যে ভাৰতীয় উপমহাদেশৰ মানুহৰ জিনত অ’মিক্ৰনে কেনে প্ৰভাৱ পেলাব, সেয়া এতিয়াও জানিব পৰা হোৱা নাই । সেয়া বুজিব পৰা হ’লেই অ’মিক্ৰন সম্পৰ্কে বহু ধাৰণাই স্পষ্ট হ’ব ।