বড়ো ভূমিত যি সময়ত ইউপিপিএল, বিজেপি আৰু জিএছপিৰ এখন সুস্থিৰ চৰকাৰ চলি আছে তেনে সময়তে এতিয়া বড়োভূমিৰ ৰাজনীতিত এক চৰ্চিত বিষয় হৈ পৰিছে যে সলনি হ’ব নেকি প্ৰমোদ বড়ো চৰকাৰ আৰু পুনৰ ক্ষমতা দখল কৰিব নেকি বিপিএফৰ হাগ্ৰামা মহিলাৰীয়ে । আজি বাগসাৰ শালবাৰীৰ কামাৰদৈছা লক্ষীবজাৰত অনুষ্ঠিত যুৱ বিপিএফৰ কেন্দ্ৰীয় কাৰ্যনিৰ্বাহক সভাত তেনে ৰাজনৈতিক বক্তব্যই হৈ পৰিল সবাতোকৈ চৰ্চিত বিষয় ।
বিগত বড়ো ভূমিৰ পৰিষদীয় নিৰ্বাচনত বিপিএফ দলে ১৭ খন আসন লাভ কৰি বঞ্চিত হৈছিল চৰকাৰ গঠন কৰাত আৰু প্ৰমোদ বড়োৰ নেতৃত্বত গঠন হৈছিল ইউপিপিএল, বিজেপি আৰু জিএছপিৰ চৰকাৰ । কিন্তু আজি পৰ্যন্ত ক্ষমতা দখলৰ আশা নেৰিলে হাগ্ৰামা মহিলাৰীয়ে । তেনে ক্ষণতে বাগসাৰ কামাৰদৈছা লক্ষীবজাৰত বৰ্তমানৰ বিপিএফ নেতা তথা এনডিএফবিৰ প্ৰাক্তন সভাপতি ধীৰেণ বড়োৱে বিস্ফোৰক মন্তব্য কৰি কয়, ‘শীঘ্ৰেই বড়ো ভূমিত পট পৰিৱৰ্ত্তন হ’ব ।’
বিটিআৰ চুক্তিকাৰীৰ ভিতৰত অন্যতম ধীৰেন বড়োৱে কয় যে ভুৱা এনডিএফবি সৃষ্টি কৰি তিনি বা চাৰে তিনি হেজাৰৰ বিপৰীতে ১২ হেজাৰ দেখুওৱা হৈছে পুনৰ সংস্থাপনৰ নামত ৷ আনকি প্ৰমোদ বড়োৰ নেতৃত্বত সন্তুষ্ট নহয় এনডিএফবি সদস্যসকল ৷ ধীৰেন বড়োৱে কয়, ‘বৰ্তমান বিটিআৰৰ বিজেপি দলৰে এজন পাৰিষদে স্পষ্টভাৱে কৈছে যে বিপিএফে পুনৰ বিটিচি চৰকাৰ দখল কৰাৰ ক্ষেত্ৰত আগবাঢ়ি আছে আৰু যিকোনো সময়ত চৰকাৰ ৰদবদল হ’ব পাৰে ৷ পাৱাৰত আহিবলৈ বিজেপি, জিএছপি বা বিপিএফেই হওক চেষ্টা কৰিবই ৷ জিএছপিৰ নেতা হীৰা শৰণীয়াইও কৈ আছে যে বৰ্তমানো ২৭ খন পাৰিষদ বিপিএফৰ পিনে আছে ৷ বিপিএফে যে চৰকাৰ গঠন কৰিব তেনে ছিগনেল বিজেপিৰ পৰাও আহি আছে ৷ বিজেপি-বিপিএফৰ মাজত পূৰ্বৰ পৰাই ভাল সম্পৰ্ক এটা আছে ৷ মাজতে অলপ মনোমালিন্য হৈছিল যদিও আগৰ সেই সম্পৰ্ক পুনৰ ঘূৰি অহাৰ দিশত ৷ ৰাজনীতিত পাৰ্মানেণ্ট শত্ৰুও নাথাকে মিত্ৰও নাথাকে ৷ চৰকাৰ সলনি হ’বলৈ বেছি সময় নালাগিব পাৰে যিহেতু চেষ্টাতো চলিয়ে আছে ৷ পৰিস্থিতিও সলনি হৈছে ৷ ইউপিপিএল চৰকাৰে ৰাইজৰ বাবে জাতি জনগোষ্ঠীৰ বাবে একো এটাই কৰিব পৰা নাই আৰু সেয়া তেওঁলোকে নিজেই জানে ৷’
এনডিএফবিৰ সংস্থাপন সন্দৰ্ভত বড়োৱে কয়, ‘চুক্তিক লৈ ৰাজনীতি হ’ব নালাগিছিল ৷ বিটিআৰ চুক্তিত যি ধৰণে লিখা আছিল আজি প্ৰমোদ বড়োৱে গাদী দখল কৰি সেয়া পূৰণ কৰিব নোৱাৰিলে ৷ প্ৰমোদ বড়োৱে এনডিএফিৰ কেডাৰ বা নেতৃত্বৰ যি মনোভাব সেয়া বুজি নাপালে বা বুজিবলৈ চেষ্টাই নকৰিলে ৷ সেই কাৰণে আজি অসম বা বিটিচি অঞ্চলত অশান্তিৰ সৃষ্টি হৈয়ে আছে ৷ আজিৰ দিনতো এনডিএফবিসকল শান্তিত থাকিব পৰা নাই ৷ চুক্তি মতে এনডিএফবিৰ কোনো এটা সমস্যাৰে সমাধান নকৰিলে প্ৰমোদ বড়ো চৰকাৰে ৷ আজিলৈ কোন এনডিএফবি সঁচা অৰ্থত সদস্য হয় সেই সিদ্ধান্তও ল’ব পৰা অৱস্থাত নাই ৷ এনডিএফবি মাত্ৰ তিনি হেজাৰমান হ’ব ৷এতিয়া কিন্তু ১২ হেজাৰ এনডিএফবি আহি গ’ল ৷ ক’ৰ পৰা আহিল এইসকল ৷ নিশ্চয় কোনো এটা সংগঠনৰ পৰাই আহিছে বা চিভিল মানুহক সোমাই লৈছে ৷ আজি এনডিএফবিয়ে পাব লগা পইচা এনডিএফবিয়ে পোৱা নাই, আন কোনোৱে সেয়া ভোগ কৰি আছে ৷ মুঠতে ১৭ বছৰ শাসনভাৰ চলাই যোৱা নেতৃত্ব যদি পুনৰ শাসনলৈ আহে তেতিয়া মুখ্যত ৰাইজৰ কাম কৰিব ৷ বিটিচিৰ ৰাইজে আজি প্ৰমোদ বড়োক বিশ্বাসত ল’ব পৰা নাই ৷ প্ৰমোদ বড়ো এজন এবছু নেতা ৷ তেওঁ এবছুৰ বাবেহে কাম কৰিলে, কৰিব ৷ কোনো জাতি বা জনগোষ্ঠীৰ কাম কোনোদিনে নকৰিব ৷ বক্তব্যৰ জৰিয়তে শীঘ্ৰেই বিটিআৰত বৃহৎ ৰাজনৈতিক পৰিৱৰ্তনৰ ইংগিত দিলে ধীৰেন বড়োৱে ৷’
বিপিএফ সভাপতি হাগ্ৰামা মহিলাৰীৰ নেতৃত্বত শীঘ্ৰেই পট পৰিৱৰ্ত্তন হ’ব বুলি তাৎপৰ্যপূৰ্ণ মন্তব্য কৰে ধীৰেন বড়োৱে ৷ বড়োৰ চীফৰ চকী বেছি দিন নাই বুলি মন্তব্য কৰি এগৰাকী বিটিচি চৰকাৰৰ পাৰিষদে মুকলিভাৱে সমৰ্থন দিয়া বুলিও মন্তব্য কৰে ধীৰেন বড়োৱে ৷
আনহাতে, যুৱ বিপিএফৰ কেন্দ্ৰীয় সভাপতি তথা বিপিএফৰ এমএলএ চৰণ বড়োৱে মুকলি ঘোষণা কৰি কয় যে পাঁচ বছৰ সম্পূৰ্ণ কৰিব দিয়া নহ’ব প্ৰমোদ বড়োক ৷ ইতিমধ্যে প্ৰমোদ বড়োৰ সতীৰ্থ কে’বাগৰাকী পাৰিষদে সংগ দিছে হাগ্ৰামা মহিলাৰীক আৰু শীঘ্ৰেই মহিলাৰীয়ে দখল কৰিব নেতৃত্ব । বিটিচি চীফ প্ৰমোদ বড়োৰ লগত যিসকল এমচিএলএ আছে তেওঁলোকো দলটোত থাকি সন্তুষ্ট নহয় ৷ আমি বিটিচি চৰকাৰত নাথাকিব পাৰো কিন্তু এনডিএফিসকলৰ সমস্যা সমাধানৰ ক্ষেত্ৰত সদায় মাত মাতি আহিছো ৷ বিজেপিৰ স’তে এতিয়া সম্পৰ্ক আমাৰ বহুত ভাল ৷ যোৱা ৰাজ্যসভাতো আমি তেওঁলোকক ভোট দিলো ৷ বিজেপিয়ে আমাক সহায় কৰি আহিছে ৷ আমি বিজেপিৰ লগত ভাল বুজাবুজিত আছো ৷ প্ৰমোদ বড়োৱে বিটিচিৰ উন্নয়নৰ ক্ষেত্ৰত স্থবিৰতা আনিছে ৷ তেওঁ সম্পূৰ্ণ বিফল ৷ তেওঁ এগৰাকী মিছলীয়া ব্যক্তি ৷ বিটিচিত হাগ্ৰামা মহিলাৰীৰ দিনত উন্নয়নে যি গতি লৈছিল সেয়া প্ৰমোদ বড়োৰ দিনত বৰ বেয়াকৈ পিছপৰি গ’ল ৷
সভাত উপস্থিত থাকে বিপিএফৰ জ্যেষ্ঠ নেতা তথা তিনিবাৰকৈ ইএমৰ পদ দখল কৰা ডেৰহাচাত বসুমতাৰী, প্ৰাক্তন বিধায়ক থানেশ্বৰ বসুমতাৰী, মনেশ্বৰ ব্ৰহ্ম, হিতেশ বসুমতাৰী, প্ৰাক্তন ইএম বনমালী বড়োকে আদি কৰি কে’বাগৰাকী দলীয় নেতা ।
