Gulab Chand Kataria Sworn In As Assam Governor :
আজি গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত এক শপত গ্ৰহণ অনুষ্ঠানত অসমৰ ৩১ সংখ্যক ৰাজ্যপাল হিচাপে শপত গ্ৰহণ কৰে গুলাব চান্দ কাটাৰিয়াই। গুৱাহাটী উচ্চ ন্যায়ালয়ৰ মুখ্য ন্যায়াধীশ সন্দীপ মেহতাই নতুন ৰাজ্যপালক শপত গ্ৰহণ কৰায়।
ৰাজ্যপালগৰাকীয়ে কয়, ‘অসমৰ সামাজিক-সাংস্কৃতিক আৰু আধ্যাত্মিক সমৃদ্ধিৰ বাবে অতিশয় দায়বদ্ধ বৈষ্ণৱ গুৰু শ্ৰীমন্ত শংকৰদেৱৰ নামেৰে নামাকৰণ কৰা স্থানত অসমৰ দৰে এখন সুন্দৰ ৰাজ্যৰ ৰাজ্যপালৰূপে শপত লোৱাটো এক গৌৰৱৰ কথা।
ভাৰতীয় সংবিধানৰ আদৰ্শৰ সেৱা কৰাৰ লগতে অসমৰ জনসাধাৰণৰ স্বাৰ্থৰ সেৱা আৰু প্ৰসাৰৰ বাবে মোৰ জীৱন উৎসৰ্গা কৰাৰ শপত খাইছো। মই নিশ্চিতভাৱে সংবিধান অনুসৰি নিজৰ দায়িত্ব পৰম সততা আৰু আন্তৰিকতাৰে পালন কৰিম।
আশাকৰোঁ ৰাজ্যখনৰ জনসাধাৰণে ৰাজ্যপালৰ কাৰ্যালয়টোক সৰ্বাধিক সমৰ্থন আগবঢ়াব যাতে ৰাজ্যখনৰ সৰ্বাংগীন বৃদ্ধিত সহায়ক হয়। ৰাষ্ট্ৰপতি দ্ৰৌপদী মুৰ্মু আৰু প্ৰধানমন্ত্ৰী নৰেন্দ্ৰ মোডীলৈ মোৰ আন্তৰিক কৃতজ্ঞতা জ্ঞাপন কৰিছোঁ।”
মনকৰিবলগীয়া যে গুলাব চান্দ কাটাৰিয়া ৰাজস্থানৰ উদয়পুৰৰ। ৰাজ্যপাল হিচাপে নিযুক্তি পোৱাৰ পূৰ্বে ৰাজস্থানৰ প্ৰাক্তন গৃহমন্ত্ৰী আৰু ৰাজস্থান বিধানসভাৰ বিৰোধী দলৰ নেতা আছিল।
২০০৪ ৰ ৩১ মে’ৰ পৰা ২০০৮ৰ ৮ ডিচেম্বৰলৈ আৰু পুনৰ ২০১৫ৰ পৰা ২০১৮ লৈকে ৰাজস্থান চৰকাৰৰ গৃহমন্ত্ৰী হিচাপে কাৰ্যনিৰ্বাহ কৰিছিল।
তেওঁ উদয়পুৰৰ বাসিন্দা আৰু নৱম লোকসভাত প্ৰতিনিধিত্ব কৰিছিল, ১৯৮৯-১৯৯১লৈকে। ২০০২ ৰ ২৪ আগষ্টৰ পৰা ২০০৩ৰ ডিচেম্বৰলৈ, পুনৰ ২০১৩ ৰ ২১ ফেব্ৰুৱাৰীৰ পৰা ২০১৩ ৰ ১০ ডিচেম্বৰলৈ, আৰু ২০১৯ ৰ ১৭ জানুৱাৰীৰ পৰা ২০২৩ লৈকে ৰাজস্থান বিধানসভাত বিৰোধী দলৰ নেতা হিচাপেও কাৰ্যনিৰ্বাহ কৰিছিল।
কাটাৰিয়াই ১৯৯৩ ৰ পৰা ১৯৯৮লৈ ৰাজ্যৰ শিক্ষামন্ত্ৰী হিচাপেও কাৰ্যনিৰ্বাহ কৰিছিল।২০০৩ চনৰ ৮ ডিচেম্বৰৰ পৰা ২০০৪ চনৰ ৩০ মে’লৈ ৰাজহুৱা কাম বিভাগৰ মন্ত্ৰী হিচাপেও কাৰ্যনিৰ্বাহ কৰিছিল।২০১৩ চনৰ পৰা ২০১৫ চনলৈ পঞ্চায়তী ৰাজ আৰু গ্ৰামোন্নয়ন, দুৰ্যোগ ব্যৱস্থাপনা আৰু সাহায্য বিভাগৰ মন্ত্ৰী হিচাপেও কাৰ্যনিৰ্বাহ কৰিছিল।
উদয়পুৰৰ মোহনলাল সুখাদিয়া বিশ্ববিদ্যালয়ৰ পৰা ভূগোলত স্নাতকোত্তৰ ডিগ্ৰী লাভ কৰে। উদয়পুৰৰ মোহনলাল সুখাদিয়া বিশ্ববিদ্যালয়ৰ পৰাও তেওঁ আইন অধ্যয়ন কৰিছিল।
অনিতা কাটাৰিয়াৰ সৈতে বিবাহপাশত আবদ্ধ হৈ তেওঁৰ ৫ গৰাকী কন্যা সন্তান আছে। ২০০৬ৰ ৫ ছেপ্টেম্বৰত নতুন দিল্লীৰ জীৱনমল নাহাটা মেম’ৰিয়েল ট্ৰাষ্টৰ পৰাও তেওঁ উৎকৃষ্ট শিক্ষক বঁটা লাভ কৰে।
মুখ্যমন্ত্ৰী ড: হিমন্ত বিশ্ব শৰ্মাই তেওঁৰ শপতগ্ৰহণ অনুষ্ঠানত অংশগ্ৰহণ কৰি কাটাৰিয়াক অসমৰ সৰ্বোচ্চ সাংবিধানিক পদ গ্ৰহণ কৰাৰ বাবে অভিনন্দন জনায় আৰু তেওঁৰ নেতৃত্বত ৰাজ্য চৰকাৰে জনসাধাৰণৰ সকলো শ্ৰেণীৰ পৰা বৃদ্ধিৰ গতি ত্বৰান্বিত কৰাটো কামনা কৰে।
অসমৰ প্ৰথম মহিলা অনিতা কাটাৰিয়া,অসম বিধানসভাৰ অধ্যক্ষ বিশ্বজিৎ দৈমাৰী, কেন্দ্ৰীয় সামাজিক ন্যায় আৰু সবলীকৰণ মন্ত্ৰী ৰামদাস আঠাৱালে, আৰু ৰাজ্য চৰকাৰৰ অন্যান্য মন্ত্ৰীসকল ক্ৰমে কেশৱ মহন্ত, ৰঞ্জিত দাস, কৃষি মন্ত্ৰী অতুল বৰা, অজন্তা নেওগ, নন্দিতা গোৰ্লোছা, জয়ন্ত মল্ল বৰুৱা, পৰিমল শুক্লবৈদ্য, ইউ.জি.ব্ৰহ্ম, মন্ত্ৰী বিমল বৰা, সংসদ সদস্য কুইন ওজা, বিটিচি প্ৰধান প্ৰমোদ বড়োও উপস্থিত থাকে।
ইয়াৰ উপৰিও শপত গ্ৰহণ অনুষ্ঠানত মুখ্য সচিব পবন কুমাৰ বৰঠাকুৰ আৰু প্ৰশাসনৰ অসামৰিক আৰু আৰক্ষী উভয়ৰে বহুকেইজন জ্যেষ্ঠ বিষয়া উপস্থিত থাকে।
ৰাজ্যৰ ৰাজ্যপাল হিচাপে দায়িত্ব লোৱাৰ পূৰ্বে কাটাৰিয়াই কামাখ্যা মন্দিৰ পৰিদৰ্শন কৰি ৰাজ্যৰ সকলো শ্ৰেণীৰ জনসাধাৰণৰ মংগলৰ বাবে কামাখ্যা দেৱীক পূজা আগবঢ়ায়।