Ferry service between Kamalabari and Nimati resumed this morning:
ব্ৰহ্মপুত্ৰৰ জলৰাশি অস্বাভাৱিকভাবে শুকাই যোৱাৰ পৰিপ্ৰেক্ষিতত মাজুলীৰ কমলাবাৰীৰ পৰা নিমাতী ঘাটলৈ চলাচল কৰা ফেৰীসমূহ সঘন বালিচৰত আবদ্ধ হৈ পৰাত ফেৰী চলাচলৰ সমস্যা হোৱাত আভ্যন্তৰীণ জল পৰিবহণ বিভাগে বন্ধ ৰাখিছিল কমলাবাৰী ঘাটৰ পৰা চলাচল কৰা যাত্রীবাহী ফেৰীসমূহ।
যাৰ পৰিপ্ৰেক্ষিতত প্রায় ১০টা দিনে বন্ধ হৈ আছিল কমলাবাৰীঘাট। যাৰ ফলত সমস্যাৰ সৃষ্টি হৈছিল মাজুলীবাসীৰ। এটা পাৰঘাটৰ ওপৰতেই নিৰ্ভৰ কৰিব লগা হৈছিল মাজুলীবাসী। মাজুলীৰ ৰাস, পালনাম উৎসৱ সমাগত।
এই উৎসৱত মাজুলীলৈ হেজাৰ হেজাৰ লোকৰ সমাগম হয়। এনেদৰে এটা পাৰঘাটৰ ওপৰত নিৰ্ভৰ কৰাটো সম্ভৱ নহ’ব। পুনৰ কমলাবাৰী পাৰঘাটটো যাতায়াতৰ সুবিধাৰ প্রতি লক্ষ্য ৰাখি চলাচলৰ ব্যৱস্থা কৰিবলৈ দাবী জনায় আহিছিল মাজুলীবাসীয়ে।
ভাৰতীয় প্রযুক্তিবিদ্যা প্রতিষ্ঠান, মাদ্রাজ (In- dian Institute of Technology, Madras)ৰ এটা বিশেষজ্ঞ দলৰ তত্ত্বাৱধানত ২৬ অক্টোবৰৰ পৰা বিশেষ ড্ৰেজাৰৰে ফেৰী চলাচলৰ সুবিধা হোৱাকৈ ব্ৰহ্মপুত্ৰৰ বুকুৰ ফেৰীপথ খনন কাৰ্য আৰম্ভ কৰিছিল। আজি পাঁচটা দিনে এই খনন কার্য চলাই থকা হৈছে। ১০টা দিনে বন্ধ হৈ থকা কমলাবাৰী-নিমাতী ফেৰী সেৱা ৰাইজৰ সুবিধাৰ বাবে বুধবাৰৰ পৰা আৰম্ভ হয় বুলি আভ্যন্তৰীণ জল পৰিবহণ বিভাগৰ পৰা জানিবলৈ দিছে।
পূৰ্বৰ ঘাটটো স্থানান্তৰ কৰি ঘাটটো ব্ৰহ্মপুত্ৰৰ মাজৰ দৰবাৰ চাপৰিলৈ স্থানান্তৰ কৰিছে বুলি জানিব দিছে। কিয়নো ব্রহ্মপুত্র খনন কার্য চলি আছে এতিয়া যিটো অংশলৈ ঘাটটো নিয়া হৈছে উক্ত অংশয়েদি চলাচলৰ সহজ হ’ব। সেই বাবেই স্থানান্তৰ কৰা হৈছে বুলি বিভাগে জানিবলৈ দিছে। আনহাতে বুধবাৰে পুৱা সাত বজাৰৰ পৰা এই ফেৰী সেৱা ঘাটটোৰ পৰা নিমাতী ঘাটলৈ চলাচল হয়। ঘাটটোৰ পৰা পুনৰ ফেৰী সেৱা চলাচল কৰাৰ খবৰ লাভ কৰি সন্তোষ প্রকাশ কৰিছে মাজুলীবাসীয়ে।
