GST evasion of Rs 1400 crore in Assam :
ৰাজ্যত সামগ্ৰী আৰু সেৱা কৰ (জিএছটি)ৰ নামত বৃহৎ কেলেংকাৰি সংঘটিত হৈছে। এই কেলেংকাৰিৰ পৰিণাম স্বৰূপে অসমে শ শ কোটি টকা ৰাজহ হেৰুওৱাটো নিশ্চিত কৰিছে কৰ বিভাগে। এই পর্যন্ত উদ্ধাৰ হোৱা তথ্য অনুসৰি, জিএছটি প্ৰৱৰ্তনৰ পাছৰে পৰা অসমে কমেও ১২শ কোটি টকা কৰ হেৰুৱাইছে আৰু এই ধন দেশৰ বিভিন্ন বাজ্যলৈ প্রেৰণ কৰা হৈছে। বাকী ২০০ কোটি টকাও অসম চৰকাৰে পোৱা নাই। সেই ধনব লুন্ঠনকাৰী কোন? ইয়াৰ তদন্ত সম্প্রতি অব্যাহত আছে।
শেহতীয়াকৈ ৰাজ্যিক জিএছটি বিভাগে কৰ ফাকিৰ কে’বাটাও ঘটনা ধৰা পেলাবলৈ সক্ষম হয়। ইয়াৰ লগত জড়িতৰ অভিযোগত কে’বাজনো লোকক গ্রেপ্তাৰ কৰা হৈছে। বুধবাৰে কৰ ভৱনত আয়োজিত এক সংবাদমেলত ৰাজ্যৰ যুটীয়া কৰ আয়ুক্ত অকণিমা চৌধুৰীয়ে সদৰী কৰে যে এই ধৰণৰ অভিযান আগন্তুক দিনবোৰত অধিক তীব্রতৰ হ’ব।
ৰাজ্যৰ ৰাজকোষত মাধমাৰ শোধোৱা কোনো লোককে ৰেহাই দিয়া নহয়। তেওঁ জনায় যে মুঠ নজন লোকক গ্রেপ্তাৰ কৰা হৈছে। তাৰে দুজনক ৰাজ্যিক জিএছটি বিভাগে আৰু সাতজনক আৰক্ষীয়ে গ্ৰেপ্তাৰ কৰিছে। যুটীয়া কৰ আয়ুক্তগৰাকীয়ে সদৰী কৰা তথ্য অনুসৰি, কৰ ফাকি দিয়াৰ বাবে ৰাজ্যত গণ্ডাই গণ্ডাই জিএছটি ফার্ম গঢ়ি উঠিছে। তেনে ৩২৫ খনৰ পঞ্জীয়ন বাতিল কৰা হৈছে।
কৰ বিভাগৰ শেহতীয়া অভিযানতে জিএছটি প্রৱর্তনৰ পাছত ৰাজ্যত প্রথমজন অভিযুক্তক ৰাজ্যিক জিএছটি বিভাগে গ্রেপ্তাৰ কৰা বুলিও তেওঁ উল্লেখ কৰে। গ্ৰেপ্তাৰ হোৱা প্রথমজন লোক হ’ল মহানগৰীৰ ফাঁচীবজাৰৰ বৰুণ গোৱেল। ইনপুট টেক্স ক্রেডিট (আইটিচি) তথা ৰছিদ জালিয়াতিৰে এই সমগ্র কেলেংকাৰি সংঘটিত কৰাটোও কৰ বিভাগৰ এই অভিযানত পোহৰলৈ আহে।
গ্রেপ্তাৰ কৰা লোককেইজনৰ সন্দৰ্ভত যুটীয়া কৰ আয়ুক্ত গৰাকীয়ে সদৰী কৰে যে বৰুণ গোৱেলক যোৱা ১০ জুনত গ্রেপ্তাৰ কৰা হয়। জাল ৰছিদৰ জৰিয়তে এই লোকজনে ২০২৩-২৪ৰ পৰা ২০২৫-২৬ৰ গ্ৰেপ্তাৰ হোৱা দিনটোলৈকে কমেও ৯.৯ কোটি টকা জিএছটি ফাকি দিয়ে। গোৱেলৰ মেচাৰ্ছ শিৱ ট্রেডাৰ্ছ নামৰ প্রতিষ্ঠানটোত অভিযান চলোৱাত জালিয়াতিৰ সমগ্র তথ্য পোহৰলৈ আহে। জেৰাৰ সময়ত জালিয়াতিৰ আশ্রয় লোৱাৰ কথা ধৃত গোৱেলে স্বীকাৰ কৰে।
আজাৰা ৰেলৰে য়ার্ড আৰু পল্টন বজাৰ ৰেলৰে য়ার্ডত যোৱা ২৫ জুনত তালাচী অভিযান চলোৱা হয় আৰু এই তালাচীত ৰেলেৰে আমদানি কৰা সামগ্রীক লৈ কে’বাটাও বৃহৎ চক্রই কৰ ফাকিৰ বৃহৎ কেলেংকাৰি চলাই অহাটো ধৰা পৰে। বহিঃৰাজ্যৰ পৰা অহা সামগ্রী নমোৱাৰ পৰ্যায়তে সংঘটিত কৰা এই কেলেংকাৰিত লিপ্ত নজনক গ্রেপ্তাৰ কৰা হয়।
গ্ৰেপ্তাৰ হোৱাসকলৰ ভিতৰত সামগ্রী পৰিবহণ প্রতিষ্ঠানৰ লগত জড়িত ব্যৱসায়িক প্রতিষ্ঠানৰ কে’বাজনো স্বত্বাধিকাৰী আছে। ধৃত লোককেইজন হ’ল- মেচাৰ্ছ বাবা ল’জিষ্টিকৰ স্বত্বাধিকাৰী মহম্মদ নেছাৰ, মেচাৰ্ছ ভাৰত কনভেয়াৰৰ স্বত্বাধিকাৰী ত্ৰিপুৰাৰী পাঠক আৰু ভাৰপ্রাপ্ত অভিষেক সিং, মেচাৰ্ছ ফাষ্ট এণ্ড ছেফ ট্রেন্স’লুছনৰ ভাৰপ্ৰাপ্ত মিঠুন কুমাৰ, ছুপাৰ ট্রেন্স’লুছনৰ ভাৰপ্ৰাপ্ত ফকৰুল ইছলাম আৰু সুনীল যাদৱ, মেচাৰ্ছ ডি এম এছ’চিয়েটছৰ ভাৰপ্ৰাপ্ত বিশ্বজিৎ বৰগোহাঁই, মেচাৰ্ছ বাইট চইছ ল’জিস্টিকছৰ ট্রেন্সপ’ৰ্ট অপাৰেটৰ কবুল শইকীয়া আৰু এছবিজিচি ল’জিষ্টিকছ অ’পাৰেছনছৰ ভাৰপ্ৰাপ্ত সুবেশ স্বামী।
এইসকলে সম্মিলিতভাৱে ৰে’লযোগে অহা সামগ্রীক লৈ জাল নথিৰে জিএছটি ফাকি দিছিল। যোৱা ১৭ জুনত গ্রেপ্তাৰ কৰা হয় ইছাক আহমেদ নামৰ এজনক। ২০১৯-২০ৰ পৰা ২০২৪-২৫লৈ এই লোকজনে মেচার্জ খুচি ডিজিটেল পেইমেন্ট প্রাইভেট লিমিটেড নামৰ জিএছটি পঞ্জীয়ন থকা এটা প্রতিষ্ঠানৰ মাধ্যমৰে জাল নথিৰ সহায়ত ১০০,১৬,৯২,১২৬ কোটি টকা ফাকি দিয়াটো বিভাগে নিশ্চিত কৰিছে।