Cm Himanta Viswa Sarma Reaction:
প্ৰদেশ কংগ্ৰেছৰ সভাপতি ৰূপে নিযুক্তি পোৱাৰ পিছত প্ৰথমবাৰৰ বাবে শনিবাৰে কাৰ্বিভূমিত ভৰি দিয়া গৌৰৱ গগৈয়ে ডিফুত উপস্থিত হৈ দলীয় নেতা- কৰ্মীৰে মতবিনিময় কৰাৰ লগতে বিশিষ্ট নাগৰিকৰো এক বাৰ্তালাপত মিলিত হয়।
ডিফুত থকা অৱস্থাতে গগৈয়ে ডিফু চহৰৰ মাজমজিয়াত নিৰ্মাণ হৈ থকা এটা অট্টালিকাৰ সন্মুখত থিয় হৈ কয়,ডিফুৰ এই অট্টালিকাটো দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱালৰ “শীশমহল”তকৈ দহগুণ ডাঙৰ। এইটো বিজেপিৰ মুখ্যমন্ত্ৰী হিমন্ত বিশ্ব শৰ্মাৰ কোনোবা অতি ঘনিষ্ঠ ব্যক্তিৰ বুলি বহুতে কয়। ক’ত তথ্য পাব পাৰি? কোন হ’ব পাৰে সেই ঘনিষ্ঠ ব্যক্তি ?
যোৰহাটৰ সাংসদ গৰাকীয়ে পোনপটীয়াকৈ নকলেও ঘৰটোৰ মালিক কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ কথাকে উল্লেখ কৰে ৷
আনহাতে তুলিৰামৰ বিৰুদ্ধে গৌৰৱ গগৈয়ে তিৰ্যক মন্তব্য কৰাৰ পিছতে মুখ্যমন্ত্ৰী ড:হিমন্ত বিশ্ব শৰ্মাই তাৎক্ষণিক প্ৰতিক্ৰিয়া প্ৰকাশ কৰে সামাজিক মাধ্যমত ৷ মুখ্যমন্ত্ৰীয়ে উল্লেখ কৰে তুলিৰাম ৰংহাং এগৰাকী সন্মানীয় নেতা, যি কাৰ্বি ভূমিৰ এখন অতি সাধাৰণ গাঁৱৰ পৰা নিজৰ যাত্ৰা আৰম্ভ কৰি কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্যৰ দৰে নেতা হৈ জনসাধাৰণৰ সেৱা কৰিবলৈ সুযোগ লাভ কৰিছে। তেখেতৰ নেতৃত্বত অঞ্চলটোৱে স্থায়ী শান্তিৰ লগতে অভূতপূর্ব উন্নয়নৰ সাক্ষী হৈছে। কাৰ্বি জনসাধাৰণৰ প্ৰতি তেখেতৰ দৃষ্টিভংগী আৰু নিষ্ঠাৰ বাবে আজি ডিফু অন্যতম উন্নত মুখ্য কেন্দ্র হিচাপে স্বীকৃত হৈছে।
পাকিস্তানৰ দৰে শত্ৰু ৰাষ্ট্ৰৰ নিৰ্দেশত কাম কৰা ব্যক্তিসকলে এনে এগৰাকী ব্যক্তিক বদনাম কৰাৰ প্ৰচেষ্টাই কাৰ্বি আংলঙৰ প্ৰগতি আৰু বিকাশক ম্লান কৰিব নোৱাৰে। কাৰ্বি আংলঙৰ জনসাধাৰণ সদায়ে এক হৈ আছে আৰু বহু কষ্টৰ বিনিময়ত লাভ কৰা কাৰ্বি ভূমিৰ শান্তি ৰক্ষা কৰি অধিক প্ৰগতিৰ দিশত যাত্রা অব্যাহত ৰাখিবলৈ জনসাধাৰণ দায়বদ্ধ হৈ আছে আৰু আগলৈও থাকিব।
