Israel attacks Syria:✒️অধিক অস্থিৰতাৰ দিশে অগ্ৰসৰ হৈছে মধ্য প্রাচ্য। ইৰানৰে যুদ্ধ অন্ত পৰাৰ পাছত কিছুদিন একপ্রকাৰ নিষ্ক্রিয় হৈ থকা ইজৰাইলে এইবাৰ ছিৰিয়া আক্ৰমণ কৰিলে।
বুধবাৰে ইজৰাইলী সামৰিক বাহিনীয়ে ছিৰিয়াৰ ৰাজধানী ডামাস্কাছস্থিত প্ৰতিৰক্ষা মন্ত্রণালয়ত ধাৰাসাৰে বোমাবর্ষণ কৰে। ইজৰাইলী সামৰিক বাহিনীয়ে বিমানৰে কৰা এই বোমাবর্ষণত কমেও তিনিজন লোকৰ প্ৰাণহানি ঘটাৰ লগতে ৩৪ জনৰো অধিক আহত হয়।
ইজৰাইলী বাহিনীৰ ধাৰাসাৰ বোমাবৰ্ষণৰ ফলত প্রায় সমগ্র ডামাস্কাছ চহৰ কঁপি উঠে। ইজৰাইলী বাহিনীয়ে ডামাস্কাছস্থিত ছিৰিয়াৰ এটা টিভি চেনেলৰ ওচৰতো বোমাবর্ষণ কৰে। এই বোমাবর্ষণৰ ফলত ভয়ানক জুই আৰু ধোঁৱাৰ কুণ্ডলী দেখা গ’ল।
স্বাভাৱিকতে চৌদিশে সৃষ্টি হয় তীব্র আতংকৰ। লক্ষ্যণীয় যে ছিৰিয়াৰ আন্তর্জাতিক এঘৰীয়াকৰণ ব্যৱস্থা প্রত্যাহাৰৰ প্রক্রিয়া মার্কিন প্রশাসনে অব্যাহত ৰখাৰ সময়তে ইজৰাইলী বাহিনীয়ে এই আক্রমণ সংঘটিত কৰে।
ছিৰিয়াৰ স্বাস্থ্য মন্ত্রণালয়ে প্রকাশ কৰা অনুসৰি, ইজৰাইলী বাহিনীয়ে এই আক্রমণত শক্তিশালী বোমা ব্যৱহাৰ কৰে। বিমানৰে কৰা এই বোমাবর্ষণত দেশখনৰ প্ৰতিৰক্ষা মন্ত্রণালয়ৰ অট্টালিকাৰ বৃহৎ ক্ষতিসাধন হয়।
অৱশ্যে ছিৰিয়া চৰকাৰে এই বোমা আক্ৰমণৰ ফলত হোৱা ক্ষয়-ক্ষতিৰ সবিশেষ তথ্য প্রকাশ কৰা নাই। আনহাতে, এই আক্ৰমণৰ ভিডিঅ’ ফুটেজ শ্বেয়াৰ কৰি ইজৰাইলৰ প্ৰতিৰক্ষা মন্ত্ৰী ইজৰায়েল কাজে সামাজিক মাধ্যমত কয়, ‘পীড়াদায়ক আঘাত আৰম্ভ হ’ল।’
একেদৰে ইজৰাইলী প্ৰতিৰক্ষা বাহিনী (আইডিএফ) ৰ এক সংবাদমেলত ইজৰাইলী সামৰিক বাহিনীয়ে কয় যে ছিৰিয়াৰ ৰাষ্ট্ৰপতিৰ প্রাসাদৰ কাষত অৱস্থিত প্ৰতিৰক্ষা মন্ত্রণালয় আৰু এক অঞ্চলক লক্ষ্য কৰি এই বোমাবর্ষণ কৰা হয়।
উল্লেখ্য যে ছিৰিয়াৰ পূৰ্বৰ শাসক বাছাৰ অল-আছাদৰ পতনৰ পাছৰ পৰা দেশখনক আক্ৰমণ কৰি আহিছে ইজৰাইলে। কাৰণ আছাদক ইজৰাইলে সমৰ্থন কৰিছিল। আছাদৰ পতনৰ পাছত ক্ষমতা দখল কৰা বাহিনীৰ স’তে আছাদৰ সমৰ্থক ড্ৰজ জনগোষ্ঠীৰ বিদ্ৰোহী সংগঠন যুদ্ধত লিপ্ত হৈ আহিছে।
ডুজ জনগোষ্ঠী হৈছে আৰবৰ এটা সংখ্যালঘু জনগোষ্ঠী। এই বিদ্রোহীসকলক সুৰক্ষা দিয়াৰ উদ্দেশ্যে ইজৰাইলী বাহিনীয়ে এই আক্রমণ সংঘটিত কৰা বুলি দাবী কৰিছে। উল্লেখ্য যে ছিৰিয়াৰ বৰ্তমানৰ শাসকক ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে চৰমপন্থী ইছলামিক শাসক আখ্যা দি আহিছে।
দেশখনৰ এই শাসকবর্গ ইজৰাইলৰ প্ৰতি ভাবুকি বুলিও ইজৰাইলী প্ৰধানমন্ত্ৰীয়ে বিবেচনা কৰি আহিছে। ইপিনে, ছিৰিয়াৰ বৰ্তমানৰ শাসকৰ স’তে তুৰস্কৰ সুসম্পর্ক থকাত মধ্যপ্রাচ্যৰ পৰিস্থিতি অধিক অগ্নিগর্ভ হোৱাৰ আশংকা প্রকট হৈছে।
তুৰস্কৰ স’তে ইৰানৰো সুসম্পর্ক আছে। গতিকে ইজৰাইলৰ বিৰুদ্ধে তুৰস্কয়ো কঠোৰ স্থিতি লোৱাৰ আশংকা আছে। আনহাতে, ইজৰাইলী প্ৰতিৰক্ষা বাহিনীয়ে ছিৰিয়াৰ প্ৰতিৰক্ষা মন্ত্রণালয়ত বোমাবর্ষণ কৰাৰ সময়ৰে পৰা ডামাস্কাছ চহৰৰ পৰিৱেশ ভয়ংকৰ হৈ উঠিছে।
এই সম্পর্কত এজন স্থানীয় লোকে কয়, ‘চহৰখনৰ অৱস্থা ভয়ংকৰ। কালি পুৱাৰ পৰা বিদ্যুৎ যোগান নাই। ম’বাইল ফোন সেৱাও অতি দুর্বল। ইণ্টাৰনেটে কাম প্রায় নকৰেই। লেণ্ডলাইন সেৱাসমূহ সম্পূৰ্ণৰূপে দুৰ্বল হৈ আছে। কালিৰ পৰা পানী যোগানো নাই। অৱশ্যে আজি পুৱা কিছু পানী যোগান ধৰে কৰ্তৃপক্ষই।’
আনহাতে, আজি ইজৰাইলী বাহিনীয়ে ছিৰিয়াত কৰা বোমাবর্ষণক লৈ উদ্বেগ প্রকাশ কৰিছে মার্কন প্রশাসনে। এই সম্পর্কত মার্কিন বৈদেশিক সচিব মার্কো ৰুবিঅ’ই সংবাদ মাধ্যমৰ আগত কয়, ‘আমি দুয়োপক্ষৰ স’তে আলোচনা অব্যাহত ৰাখিছো। আমি অচিৰে এই সমস্যাৰ অন্ত পেলাব পাৰিম বুলি আশা প্রকাশ কৰিছো। কিন্তু পৰিস্থিতিক লৈ আমি অতি উদ্বিগ্ন।’
আনহাতে, ইজৰাইলী বাহিনীৰ বোমা আক্ৰমণৰ পাছতো ড্ৰজ বিদ্রোহীৰ স’তে ছিৰিয়াৰ চৰকাৰী বাহিনীৰ সংঘৰ্ষ অব্যাহত আছে। সূত্ৰৰ মতে, এই সংঘৰ্ষতো বহু লোক হতাহত হৈছে।
অনুষ্ঠান পৰিবেশন কৰি থকা অৱস্থাতে বিস্ফোৰণৰ খবৰ সংগ্ৰহ কৰিবলৈ দৌৰ দিলে মহিলা টিভি এংকৰে ডামাস্কাছত ইজৰাইলী বাহিনীয়ে কৰা বোমাবর্ষণৰ ফলত এটা টেলিভিছন চেনেলৰ অট্টালিকাৰ পিছফালেও এক শক্তিশালী বিস্ফোৰণ সংঘটিত হয়। এই বিস্ফোৰণ সংঘটিত হোৱাৰ সময়ত টিভি চেনেলটোৰ এগৰাকী মহিলা এংকৰে অনুষ্ঠান পৰিৱেশন কৰি আছিল। বিস্ফোৰণৰ শব্দ শুনি তেওঁ অনুষ্ঠান আধাতে এৰি বিস্ফোৰণৰ খবৰ সংগ্ৰহ কৰিবলৈ দৌৰ দিয়ে। অট্টালিকাটোৰ পাছফালৰ পৰা জুই আৰু ধোঁৱা ওলোৱা দেখিবলৈ পোৱা গ’ল। ধোঁৱাৰ কুণ্ডলীয়ে চৌদিশ আগুৰি ধৰে।
