Vitamin A:✒️শিশুৱে কেতিয়াও নিজৰ সমস্যাৰ কথা বুজাই ক’ব নোৱাৰে। অলপ ডাঙৰ ল’ৰা-ছোৱালীৰ পৰা কিছু জানিব পৰা গ’লেও একেবাৰে কম বয়সীয়াবোৰে একোৱেই ক’ব নোৱাৰে। সেয়ে শিশুটি অস্বস্তিত থকা দেখিলেই লক্ষণবোৰ চাই প্ৰতিকাৰৰ ব্যৱস্থা কৰিব লাগে।
শিশুৰ বিভিন্ন সমস্যাৰ ভিতৰত অন্যতম হ’ল ‘এ’ ভিটামিনৰ অভাৱ। ইয়াৰ ফলত নিম্নলিখিত সমস্যাবোৰে দেখা দিব পাৰে।
ক) চকুঃ কুকুৰীকণা ৰোগ হয়। যেতিয়াই দেখিব যে শিশুটিয়ে নিশাৰ ভাগত ভালদৰে দেখা পোৱা নাই, ওচৰৰে কিবা বস্তু হাতেৰে খেপিয়াই বিচাৰি থাকে, তেতিয়াই বুজিব যে শিশুটিৰ শৰীৰত ‘এ’ ভিটামিনৰ অভাৱ ঘটিবলৈ আৰম্ভ কৰিছে। চকুৰ ভিতৰৰ অংশ শুকান হৈ পৰে। আনকি কান্দিলেও কেতিয়াবা চকুপানী নোলায়।
চকুৰ পৰ্দা ঘোলা পৰে আৰু ক’লা মণিৰ ওপৰত বগা বগা দাগ পৰিলক্ষিত হয়। ‘এ’ ভিটামিনৰ অভাৱ প্ৰকট হৈ পৰি শিশুৰ চকুৰ মণি লাহে লাহে সম্পূৰ্ণৰূপে বগা হৈ পৰে আৰু শিশুটি অন্ধ হৈ পৰে। ইয়াক জেৰপথেলমিয়া বুলি কোৱা হয়।
খ) ছাল শুকান আৰু খচখচীয়া হৈ কেতিয়াবা ভেকুলীৰ ছালৰ দৰে হৈ পৰিব পাৰে।
গ) ঘনাই সংক্রমণত আক্রান্ত হোৱাৰ আশংকা থাকে। বিশেষকৈ শ্বাসনলী আৰু মূত্ৰনলীৰ সংক্ৰমণ।
ঘ) শিশুটি স্বাভাবিকভাবে ডাঙৰ হ’ব নোৱাৰে। আনকি শিশুৰ মৃত্যুৰ আশংকাও থাকে।
‘এ’ ভিটামিনৰ অভাৱত অন্ধ হৈ পৰা প্ৰতি দুটি শিশুৰ ভিতৰত এটিৰ মৃত্যু ঘটে। পৰিসংখ্যাতে এই তথ্য প্রকাশ পাইছে।
চিকিৎসা
কুকুৰীকণা বা জেৰপথেলমিয়া ৰোগত আক্রান্ত শিশুটিৰ বয়স যদি এবছৰৰ বেছি হয়, তেন্তে প্রতিটো দুই লাখ ইউনিটৰ তিনিটা ভিটামিন ‘এ’ কেপচুল খুৱাব লাগিব। প্রথম ড’জ-প্রথম দিনা, দ্বিতীয় ড’জ-দ্বিতীয় দিনা আৰু তৃতীয় ড’জ-দুসপ্তাহৰ পাছত।
এবছৰৰ কম বয়সীয়া শিশুরেও একে নিয়মত তিনি দিন ঔষধ খাব, কিন্তু প্রতিটো ড’জ হ’ব অর্ধেক মাত্রা (এক লাখ ইউনিট অর্থাৎ প্রতিবাৰত চাৰি টোপালকৈ) ৰ। এটা কেপচুলত মুঠ আঠ টোপাল ঔষধ থাকে। মিজেছ বা হেমৰোগত আক্রান্ত শিশুকো একে নিয়মৰে ভিটামিন ‘এ’ কেপচুল খুৱাব লাগিব।
প্ৰতিৰোধ
নিম্নলিখিত ৰোগসমূহত এক ড’জ (এবছৰৰ বেছি বয়সীয়া শিশুৰ বাবে দুই লাখ ইউনিট, এবছৰৰ তলৰ শিশুৰ বাবে এক লাখ ইউনিট অর্থাৎ চাৰি টোপাল) ‘এ’ ভিটামিন খুৱাব।
⇨ প্রত্যেকবাৰ ডায়েৰিয়াত আক্রান্ত হোৱাৰ পাছত ভিটামিন ‘এ’ কেপচুল খুৱাব।
⇨ আমিষশক্তি ঘাটতিজনিত অপুষ্টিত আক্রান্ত প্রত্যেক শিশুকো খুৱাব পাৰি।
⇨আজিকালি ইউনিছেফৰ সাহায্যত গাঁও অঞ্চলৰ সকলো শিশুকে ছমাহ বয়সৰ পাছত প্রতি ছমাহৰ ব্যৱধানত ছবছৰ বয়স পর্যন্ত এটাকৈ ‘এ’ ভিটামিনৰ কেপচুল খাবলৈ দিয়া হয়।
⇨ভিটামিন ‘এ’ সমৃদ্ধ খাদ্য শিশুক খাবলৈ দিব লাগে। মাতৃদুগ্ধৰ উপৰি সেউজীয়া আৰু ৰঙীন শাক-পাচলি, ৰঙীন ফল, ৰঙাশাক, কচুশাক, গাজৰ, অমিতা, মিঠা কোমোৰা, আম, কণীৰ কুহুম আদি খাদ্যত বহু পৰিমাণে ‘এ’ ভিটামিন পোৱা যায়।