Diwali:✒️পোহৰৰ উৎসৱ দীপাৱলী উপলক্ষে কামৰূপ আৰু নলবাৰী জিলাৰ সীমান্তবর্তী পশ্চিম বড়িগোগ মৌজাৰ পূৰ্ণঘুমদুম হীৰাপাৰাৰ লগতে বৰভাগ ৰাজহ চক্ৰৰ অধীনস্থ উত্তৰকুছি হীৰা চুবুৰিৰ সকলো মৃৎশিল্পী পৰিয়াল ব্যস্ত হৈ পৰিছে মাটিৰ চাকি তৈয়াৰ কৰাত।
সমাগত দীপাৱলীলৈ উক্ত স্থানৰ প্রায় ৬০টা মৃৎশিল্পী পৰিয়ালে কে’বা লক্ষাধিক মাটিৰ চাকি বিক্ৰীৰ বাবে বজাৰলৈ উলিয়াই দিয়াৰ পৰিকল্পনা কৰিছে। এইবাৰ দীপাৱলীৰ বাবে হীৰাপাৰাৰ প্ৰায় তিনিকুৰি মৃৎশিল্পী পৰিয়ালে কে’বা লক্ষাধিক মাটিৰ চাকি তৈয়াৰ কৰি বজাৰত উলিয়াই দিয়াৰ লক্ষ্য স্থিৰ কৰিছে।
ইফালে, হিয়াৰ আমঠু জুবিন গাৰ্গৰ মৃত্যুৰ বাবে এইবেলি দীপাৱলীৰ উৎসৱ কিছু ম্লান পৰিব যদিও মাটিৰ চাকিৰ চাহিদা পূৰ্বৰ তুলনাত কিছু বেছি হ’ব বুলি এইসকল শিল্পীয়ে আশা কৰিছে। ইফালে, গাঁৱে-ভূঞে চাকি বিক্রী কৰিবলৈ যোৱাত ক্ৰেতাৰ মুখত সহজে শুনিবলৈ পাইছে যে এইবেলি মিঠাতেলৰ অতিপাত চৰা দাম।
তথাপি ৰাইজে বছৰেকীয়া উৎসৱটোৰ বাবে মাটিৰ চাকি ক্রয় কৰিবই। ইফালে, প্রয়াত জুবিন গাৰ্গবিহীন দীপাৱলীৰ বাবে একাংশ সংগঠনে বোমা বা আতচবাজী প্রজ্বলনত বাধা আৰোপ কৰিছে যদিও মাটিৰ চাকি প্রজ্বলনত কোনো বাধা-বিঘিনি নাই। সেয়েহে পূৰ্বৰ বিক্ৰীৰ তুলনাত এইবেলি কিছু সৰহকৈ বিক্ৰী হ’ব পাৰে বুলি এইসকল মৃৎশিল্পীয়ে আশা কৰিছে।
সম্প্ৰতি পূৰ্ণঘুমদুম হীৰাপাৰাৰ এইসকল হীৰা সম্প্ৰদায়ৰ লোকে ‘দৈনিক অগ্রদূত’ক আক্ষেপ কৰি কয়, ‘আমি পোহৰৰ উৎসৱ দীপাৱলীলৈ হেঁপাহৰে মাটিৰ চাকি প্রস্তুত কৰো। ৰাইজেও আমাৰ বংশগত শিল্পকলাক সম্মান জনাই আহিছে। ৰাইজৰ আশীৰ্বাদত আমি আমাৰ পৰম্পৰাগত কর্মটোক জীয়াই ৰাখিছো।
ইয়াৰ মাজতে আন দেশৰ ৰংচঙীয়া লাইট আৰু ভিন্ন ৰঙী মাটিৰ চাকিয়ে আমাৰ নিচিনা শিল্পীসকলৰ কৰ্মত বাধাৰ প্রাচীৰ হৈ থিয় দিছে। সচেতন ৰাইজ তথা চৰকাৰখনে এই ক্ষেত্ৰত দৃষ্টি ৰাখি আমাৰ কৰ্মক উৎসাহিত কৰিলে আমি সুখী হ’ম।’
তেওঁলোকে পুনৰ কয়, ‘আমাৰ নিচিনা হীৰা সম্প্ৰদায়ৰ লোকসকলে কেনে ধৰণে জীয়াই আছে তাক খবৰ ল’বলৈ জনপ্রতিনিধি তথা চৰকাৰৰ আহৰি নাই। মাটিৰ বাচন বনাই জীবিকা নির্বাহ কৰা হীৰা সম্প্ৰদায়ৰ লোকসকলে বাচন বনোৱা মাটিখিনিও বহু কষ্টৰে যোগাৰ কৰিব লাগে। গাড়ী ভাড়া কৰি ছিণ্ডিকেট পদ্ধতিৰে আজিও মূল উপাদান হীৰা মাটি আনিব লগাটো সম্প্রদায়টোৰ বাবে অভিশাপ স্বৰূপ হৈ পৰিছে।’
এইসকল থলুৱা শিল্পীৰ ক্ষেত্ৰত চৰকাৰে সুদৃষ্টিবে সহায়ৰ হাত আগবঢ়ালে এই শিল্পটো ৰক্ষা পৰিব বুলি তেওঁলোকে দৃঢ়তাৰে কয়। অন্যথা বিকল্প চিন্তাৰে আন কৰ্মৰ সন্ধান কৰিবলগীয়া হ’ব। ইতিমধ্যে বহুতো পৰিয়ালে উক্ত কৰ্মৰ পৰা অব্যাহতি লৈছে। আমিও যাতে উক্ত পৰম্পৰাগত বৃত্তিটোক এৰি দিব লগা নহয় তাৰ বাবে চৰকাৰ তথা বেচৰকাৰী সংস্থাসমূহে গুৰুত্ব দিব লাগিব। তেতিয়া আমি আমাৰ বংশানুক্রমে কৰি অহা কর্মটোক জীয়াই ৰাখিব পাৰিম।’ এইদৰে কয় মৎশিল্পীয়ে।