Imran Khan:✒️এক দুর্নীতিৰ গোচৰত দোষী সাব্যস্ত হৈ কাৰাবাস খাটি থকা পাকিস্তানৰ প্ৰাক্তন প্রধানমন্ত্রী তথা প্রাক্তন ক্রিকেট তাৰকা ইমৰান খানে কাৰাৰুদ্ধ অবস্থাতে পাক সেনা আৰু আইএছআইৰ হাতত প্রাণ হেৰুৱায় বুলি বুধবাৰে ব্যাপক প্ৰচাৰ চলিছে।অৱশ্যে এই সংক্রান্তত মুখ খোলা নাই পাকিস্তানী সেনা তথা চৰকাৰে।
উল্লেখ্য যে কঠোৰপন্থী পাক সেনাৰ মুৰব্বী আছিম মুনীৰৰ হাতৰ পুতলাৰ দৰে কাৰ্যনিৰ্বাহ কৰি আছে দেশখনৰ শ্বাহবাজ শ্বৰিফ চৰকাৰে। তদুপৰি চৰকাৰে মুখ নোখোলাটো স্বাভাবিক বুলি চৰ্চিত হৈছে। ইয়াৰ বিপৰীতে বেলুচিস্তানৰ বিদ্ৰোহী চৰকাৰ আৰু আফগানিস্তান চৰকাৰে ব্যাপক প্ৰচাৰ চলাইছে যে ৰাৱালপিণ্ডিৰ আদিআলা কাৰাগাৰত বন্দী হৈ থকা প্ৰাক্তন প্রধানমন্ত্রী খান হত্যাৰ বলি হৈছে। আনহাতে, এই খবৰ বিয়পি পৰাৰ লগে লগে আদিআলা কাৰাগাৰৰ সম্মুখত প্রাক্তন প্রধানমন্ত্রী খান নেতৃত্বাধীন তেহৱিক-ই-ইনছাফৰ সহস্রাধিক নেতা-কর্মী উপস্থিত হৈ এক উত্তপ্ত পৰিস্থিতিৰ সৃষ্টি কৰে। দলৰ ক্ষুব্ধ কৰ্মীসকলৰ মাজত ইমৰানৰ তিনি ভগ্নী ক্রমে নবিন নিয়াজী, আলিমা খান আৰু ড° ওজমা খানো থাকে।
অভিযোগ অনুসৰি, কালি আদিআলা কাৰাগাৰৰ চৌহদত প্রাক্তন প্রধানমন্ত্রীজনৰ তিনি ভগ্নীক নিৰাপত্তাৰক্ষীয়ে নিৰ্মমভাবে প্রহাৰো কৰে।উল্লেখ্য যে ২০২৩ৰ পৰা পত্নী বুশ্ৰাসহ বিভিন্ন অভিযোগত গ্ৰেপ্তাৰ হৈ ইমৰানে কাৰাবাস খাটি আছে। তদুপৰি যোৱা বছৰ এক দুর্নীতিৰ গোচৰত খান দম্পতীক এখন আদালতে ১৪ বছৰৰ কাৰাবাসৰ শাস্তি বিহে।
সেই সূত্রে দুয়ো আদিআলা কাৰাগাৰত বন্দী হৈ আছে। দেশখনৰ কাৰাগাৰৰ নিয়ম অনুসৰি এজন কাৰাবন্দীক প্রতি সপ্তাহত পৰিয়ালৰ সদস্যক সাক্ষাৎ কৰিবলৈ দিয়া হয়; কিন্তু বিগত ২২ দিন ধৰি কাৰাগাৰত ভ্ৰাতৃক সাক্ষাৎ কৰিবলৈ উপস্থিত হৈয়ো ইমৰানৰ তিনি ভগ্নী বিমুখ হ’বলগীয়া হয়। অর্থাৎ তেওঁলোকক ভ্রাতৃক কাৰাগাৰ কৰ্তৃপক্ষই সাক্ষাতৰ অনুমতি নিদিলে। যোৱা ১৯ নৱেম্বৰতো তিনি ভগ্নী বিমুখ হৈ কাৰাগাৰৰ পৰা উভতি আহিবলগীয়া হয়।
এনে অৱস্থাতে ব্যাপক প্ৰচাৰ আৰম্ভ হয় যে ইমৰানে কাৰাবন্দী অবস্থাতে আইএছআই আৰু সেনাৰ ষড়যন্ত্রত প্রাণ হেৰুৱালে। ইয়াকে লৈ দেশখনৰ পৰিস্থিতি উত্তাল হৈছে। অৱশ্যে পাক সেনা আৰু চৰকাৰৰ দৰে খবৰটোক লৈ পাকিস্তানী সংবাদ মাধ্যম মৌন হৈ আছে। ইয়াৰ বিপৰীতে আফগান টাইমছ নামৰ আফগানিস্তানৰ কাকতখনে বাতৰি প্ৰকাশ কৰিছে যে ইমৰান আৰু জীৱিত থকা নাই।
বিগত তিনি দিন ধৰি খান ভগ্নীয়ে তেওঁক সাক্ষাৎ নোপোৱাক লৈয়ো কাকতখনে প্রশ্ন উত্থাপন কৰিছে। আনহাতে বেলুচিস্তানৰ নির্বাসিত বিদ্রোহী চৰকাৰৰ বিদেশ মন্ত্রণালয়ে সামাজিক মাধ্যমত হুংকাৰ দি কয়, ‘যদি সঁচাকৈয়ে খান হত্যাৰ বলি হৈছে, তেন্তে সন্ত্রাসবাদীৰ ৰাষ্ট্ৰ পাকিস্তানক নিশ্চিতভাৱে ধ্বংস কৰিম।’ আনহাতে, সূত্ৰৰ মতে, কালি বিয়লি সেনাৰ মুৰব্বী মুনীৰ আৰু আইএছআইয়ে ইমৰানক হত্যা কৰে।
উল্লেখ্য যে যোৱা ছেপ্টেম্বৰত ইমৰানে সামাজিক মাধ্যমৰ জৰিয়তে অভিযোগ উত্থাপন কৰে যে তেওঁ আৰু তেওঁৰ পত্নীৰ ওপৰত কাৰাগাৰত অমানুষিক নির্যাতন চলিছে। তেওঁ এই অভিযোগ উত্থাপন কৰাৰ পাছতে কাৰাগাৰৰ নীতি-নিয়ম কর্তৃপক্ষই অত্যন্ত কঠোৰ কৰি তোলে। উল্লেখ্য যে পাকিস্তানী সংবাদপত্র ‘ডন’ৰ এক বাতৰি অনুসৰি, প্ৰাক্তন প্রধানমন্ত্রী খানৰ বিৰুদ্ধে ১০৭টা গোচৰ আছে।