Parliament House:✒️বৰষুণৰ পৰিমাণ হ্রাস পোৱাৰ বাবে চৰকাৰে নির্বিচাৰে গছ কটা কার্যক বহুতে দোষাৰোপ কৰে। কাৰণ শেহতীয়াভাৱে ঘাইপথ নির্মাণকে ধৰি বিভিন্ন কাৰণত অসমতো ব্যাপক হাৰত গছ-বন ধ্বংস কৰা হৈছে। এনে অৱস্থাতে কেন্দ্রীয় চৰকাৰে সংসদত প্রকাশ কৰিছে এক উদ্বেগজনক তথ্য।
সংসদৰ চলিত বাজেট অধিবেশনত কেন্দ্রীয় পৰিৱেশ, বন আৰু জলবায়ু পৰিৱৰ্তনৰ ৰাজ্য মন্ত্রী কীর্তিবর্ধন সিঙে ৰাজ্যসভাত প্ৰকাশ কৰা এক তথ্য অনুসৰি মাথোঁ তিনি বছৰতে অসমকে ধৰি দেশৰ ১৩ খন ৰাজ্যত বন আৱৰণি ৩৫০ বর্গকিলোমিটাৰৰো অধিক হ্রাস পায়।
এনে উদ্বেগজনকভাবে বন আৱৰণি হ্রাস পোৱা এই ১৩ ৰাজ্য হৈছে হিমালীয় অঞ্চলৰ। মন্ত্রী সিঙে প্রকাশ কৰা অনুসৰি ২০২১ৰ পৰা ২০২৩ৰ সময়ছোৱাত এই ১৩ ৰাজ্যৰ বন আৱৰণিৰ পৰিসৰ পূৰ্বৰ ১৫,০৭৫.৭ বর্গকিলোমিটাৰৰ পৰা ১৫,৪২৭.১১ বর্গকিলোমিটাৰলৈ হ্রাস পায়।
অর্থাৎ মাথোঁ তিনিটা বছৰতে এই বাজ্যসমূহৰ বনভূমি ৩৫০ বর্গকিলোমিটাৰৰো অধিক হ্রাস পায়। এনেদৰে বন আৱৰণি হ্রাস পোৱা এই ১৩ ৰাজ্যৰ আনসমূহ হ’ল জম্মু-কাশ্মীৰ, লাডাখ (কেন্দ্রীয় শাসিত অঞ্চল), উত্তৰাখণ্ড, হিমাচল প্রদেশ, অৰুণাচল প্রদেশ, মণিপুৰ, মেঘালয়, মিজোৰাম, নগালেণ্ড, ছিকিম, ত্রিপুৰা আৰু পশ্চিমবংগ।
আনহাতে, মন্ত্রী সিঙে সংসদত প্রকাশ কৰা তথ্য অনুসৰি ২০২৪-২৫ত ৰেলৰ খুন্দাতে এই ৰাজ্যসমূহত ১২ টা হাতীৰ মৃত্যু হয়। লক্ষ্যণীয় যে যানবাহনৰ খুন্দাত মৃত্যু হোৱা হাতীৰ তথ্য কেন্দ্রীয় বন আৰু পৰিৱেশ মন্ত্রণালয়ে সংগ্ৰহ নকৰে।
দুর্ঘটনাৰ ক্ষেত্ৰত কেৱল বেলৰ খুন্দাত হতাহত হাতীৰ তথ্যহে এই মন্ত্রণালয়ে প্রকাশ কৰে। কেন্দ্রীয় বন আৰু পৰিৱেশ মন্ত্রণালয়ে সমগ্র দেশৰ স্পৰ্শকাতৰ ৰেলপথসমূহৰ ৰেলৰ খুন্দাত হাতী আৰু আন বন্যপ্রাণী হতাহত হোৱাৰ ঘটনা ৰোধক লৈ এক প্রতিবেদনো প্রকাশ কৰিছে।
ইপিনে, ভিন্ন কাৰণত বিগত সময়ত ভাৰততো তাপমাত্রা বৃদ্ধি পাবলৈ ধৰিছে। কেন্দ্ৰৰ শেহতীয়া তথ্য অনুসৰি ১৯০১ৰ পৰা ২০১৮ৰ ভিতৰত দেশত গড় তাপমাত্রা ০.৭ ডিগ্রী চেলচিয়াছ বৃদ্ধি পায়। অতি মাত্রা বৰষুণ, অতিমাত্রা গৰম প্ৰৱাহ আৰু ঘূর্ণী প্ৰতিৰোধৰ বাবে চৰকাৰে ব্যৱস্থা গ্রহণ কৰিছে বুলিও কোৱা হৈছে।
শেহতীয়াভাবে কেন্দ্রীয় ভূবিজ্ঞান মন্ত্রণালয়ে দেশত জলবায়ু পৰিবৰ্তনৰ প্ৰভাৱ সম্পর্কে এক প্রতিবেদন প্রকাশ কৰিছে। দেশত জলবায়ু পৰিৱৰ্তনৰ বাবে ঘাইকৈ সেউজ গৃহ নির্গমনক জগৰীয়া কৰা হৈছে।
ইপিনে, ৮,৭৮০ মেগাৱাট বিদ্যুৎ উৎপাদনক্ষম ২৪ টা পৰমাণু শক্তিকেন্দ্ৰ স্থাপনৰ কাম কেন্দ্ৰীয় চৰকাৰে কৰি আছে। এই প্রকল্পসমূহ ২০৩১-৩২ৰ ভিতৰত সম্পূৰ্ণ হ’ব বুলি আশা কৰা হৈছে। আনহাতে ২০২৫ৰ ভিতৰত দেশে পেট্র’লত ২০ শতাংশ ইথানল মিহলাই বুলিও কেন্দ্রই শেহতীয়াভাবে তথ্য প্রকাশ কৰিছে।