Iran War:✒️পশ্চিম এছিয়াত চলি থকা ইৰাণ-ইজৰাইল সংঘাতৰ প্ৰভাৱত ইজৰাইললৈ নিজৰ উৰণসমূহ অস্থায়ীভাৱে স্থগিত কৰিছে এয়াৰ ইণ্ডিয়াই । সংস্থাটোৱে নিশ্চিত কৰিছে যে নতুন দিল্লী-টেল আভিভ ৰুটৰ সকলো ফ্লাইট মে’ ৩১ তাৰিখলৈকে বন্ধ থাকিব।
তথ্য অনুসৰি, অঞ্চলটোত সুৰক্ষা পৰিস্থিতি অধিক জটিল হৈ পৰাৰ বাবেই এই সিদ্ধান্ত লোৱা হৈছে। বৰ্তমান টেল আভিভ অভিমুখী অধিকাংশ আন্তঃৰাষ্ট্ৰীয় বিমান সংস্থাই উৰণ বন্ধ কৰিছে আৰু কেৱল কিছুমান ইজৰাইলৰ নিজস্ব বিমান সংস্থাই সীমিত পৰিসৰত উৰণ চলাই আছে।
এই সিদ্ধান্তৰ ফলত ইজৰাইলত বসবাস কৰা ৪০ হেজাৰৰো অধিক ভাৰতীয় নাগৰিকৰ মাজত উৎকণ্ঠা বৃদ্ধি পাইছে। তেওঁলোকৰ মাজৰ বহুতে দেশলৈ উভতি আহিবলৈ বা সংঘাতৰ পৰা আঁতৰিবলৈ চেষ্টা কৰি আছে।
উৰণ বন্ধ হৈ পৰাৰ বাবে বহু ভাৰতীয়ই জৰ্ডান বা ইজিপ্তৰ ভূমিপথ ব্যৱহাৰ কৰি দেশ এৰি যাবলগীয়া হৈছে। একে সময়তে টেল আভিভস্থিত ভাৰতীয় দূতাবাসে সহায়ৰ বাবে ২৪ ঘণ্টীয়া জৰুৰী হেল্পলাইন আৰম্ভ কৰাৰ লগতে নিবন্ধন অভিযানো চলাইছে।
উল্লেখযোগ্য যে, ইৰাণ-ইজৰাইল সংঘাতৰ ফলত সমগ্ৰ অঞ্চলটোত বায়ু পৰিবহণ ব্যৱস্থা ব্যাহত হৈছে আৰু বহু দেশৰ বিমান সংস্থাই উৰণ বাতিল বা সীমিত কৰিছে।