Pahelgam:✒️কাশ্মীৰৰ জনপ্রিয় পর্যটন কেন্দ্র পহলগামত সন্ত্রাসবাদীৰ আক্ৰমণৰ পাছত পর্যটন উদ্যোগ কিছু বাধাগ্রস্ত হৈছিল। নিৰাপত্তাজনিত কাৰণত পর্যটকৰ ভিৰ পহলগামত হাস পাইছিল। পহলগামক পুনৰ উজ্জীৱিত কৰিবলৈ আৰু পর্যটকৰ নিৰাপত্তা নিশ্চিত কৰিবলৈ পদক্ষেপ গ্রহণ কৰিলে জম্মু-কাশ্মীৰ প্রশাসনে।
এতিয়াৰে পৰা অচিনাকি গাইড হওক বা ঘোঁৰাৱালা হওক, কাৰোবাক আস্থাত লোৱাৰ পূর্বে পর্যটকে ১০ বাৰ চিন্তা-চৰ্চা কৰিব লাগিব। ম’বাইল ফোনত এটি কিউআৰ ক’ড স্কেন কৰিলে সংশ্লিষ্ট ব্যক্তিৰ সম্পূর্ণ পৰিচয় আৰু তথ্য পর্যটকে লাভ কৰিব।
প্রশাসনৰ দাবী, এই পদক্ষেপৰ ফলত পর্যটকৰ নিৰাপত্তা পূর্বতকৈ বৃদ্ধি পাব। পহলগামসহ সকলো পর্যটন কেন্দ্র সেৱা প্রদানকাৰীৰ বাবে কিউআৰ ক’ড ভিত্তিক পৰিচয় পত্ৰৰ ব্যৱস্থা কৰা হৈছে।
স্থানীয় ঘোঁৰাচালক, দোকানী, হকাৰ আৰু বাহিৰৰ ৰাজ্যৰ পৰা অহা বিক্রেতাসকলৰো নথিপত্র বিস্তাৰিতভাৱে পৰীক্ষা কৰি আৰক্ষীয়ে পৰিচয় নিশ্চিত কৰিবলৈ কিউআৰ ক’ড জাৰি কৰিছে।
পর্যটকে কোনো সেৱা গ্রহণৰ পূর্বে সংশ্লিষ্ট ব্যক্তিৰ কিউআৰ ক’ড স্কেন কৰিলে ম’বাইল ফোনত উক্ত ব্যক্তিৰ নাম, ঠিকনা, ম’বাইল নম্বৰ, আধাৰ নম্বৰ, পঞ্জীয়ন নম্বৰ, কর্ম অঞ্চল আৰু আৰক্ষীৰ পৰীক্ষণৰ তথ্য লাভ কৰিব।
