AssamFloods : দৈনিক অগ্ৰদূত ডিজিটেল ডেস্ক : অবাধে বনাঞ্চল ধ্বংস আৰু পৰিকল্পনাবিহীন দ্রুত নগৰীকৰণেই হৈছে পূব অসমৰ তিনি জিলাৰ শেহতীয়া বিধ্বংসী বানৰ কাৰণ। ভাৰত, আমেৰিকা যুক্তৰাষ্ট্ৰ, ছুইডেন, নেদাৰলেণ্ড, ব্রিটেইন আদিৰ ২০ জন আন্তর্জাতিক বিজ্ঞানীয়ে এই কথা প্রকাশ কৰিছে।
বিশ্ব বতৰৰ কাৰণ নির্ণয় (ডব্লিউডব্লিউএ) শীর্ষক সংস্থাৰ অধীনত এই কৃতবিদ্য বিজ্ঞানীসকলে পূব অসমৰ এই বিধ্বংসী বানৰ কাৰণ নিৰ্ণয়ৰ বাবে শেহতীয়াভাৱে এক অধ্যয়ন সম্পন্ন কৰে। বিজ্ঞানীসকলে প্ৰকাশ কৰা অনুসৰি, এই অধ্যয়নত দেখা গ’ল যে শিৱসাগৰ,যোৰহাট আৰু চৰাইদেউ জিলাৰ শেহতীয়া জলপ্ৰলয়ৰ কাৰণ বহু চর্চিত জলবায়ু পৰিৱৰ্তন নহয়। তাৰ পৰিৱৰ্তে ইয়াৰ কাৰণ হৈছে অবাধে বনাঞ্চল ধ্বংস আৰু অপৰিকল্পিতভাবে দ্রুততৰে কৰা নগৰীকৰণ।
উল্লেখ্য যে এই অধ্যয়ন সম্পন্ন কৰা ২০ জনীয়া বিজ্ঞানীৰ দলটোত আইআইটি মুম্বাই আৰু ভাৰতীয় বতৰ বিজ্ঞান বিভাগৰ দৰে প্রতিষ্ঠানৰ গৱেষকো আছে। অধ্যয়নটোৰ সম্পৰ্কত লণ্ডনৰ ইম্পেৰিয়েল কলেজৰ পৰিৱেশ নীতি কেন্দ্ৰৰ গৱেষিকা মৰিয়ম জাকাৰিয়াই কয়, ‘পূব অসমত জলবায়ু পৰিৱৰ্তনৰ ফলত চৌপাশৰ পাহাৰত প্ৰৱল বৰষুণ হৈ এই দুৰ্যোগৰ উৎপত্তি হ’ল নেকি সেয়া আমি জুকিয়াই চালো। কিন্তু দেখা গ’ল যে এই দুৰ্যোগৰ কাৰণ জলবায়ু পৰিৱৰ্তন নহয়। কাৰণ এনে পৰিমাণৰ বৰষুণ পূর্বেও অসম তথা উত্তৰ পূবত হৈছে।’
একেদৰে এই অধ্যয়ন সম্পৰ্কত ভাৰতীয় বতৰ বিজ্ঞান বিভাগৰ সঞ্চালকপ্ৰধান মৃত্যুঞ্জয় মহাপাত্রই কয়, ‘প্রতিটো দুৰ্যোগৰ বাবে জলবায়ু পৰিৱৰ্তনক দায়ী কৰা উচিত নহয়। তথ্যই কয় যে অসম তথা উত্তৰ পূবত সামগ্রিকভাৱে ঋতুকালীন বৰষুণৰ ঘাটি আছে।’
আনহাতে, উক্ত অধ্যয়নত কোৱা হয়, অপৰিকল্পিত নগৰীকৰণ, দ্রুততৰে বনাঞ্চল ধ্বংস, জলাভূমি ধ্বংস, খহনীয়া আদি হৈছে পূব অসমৰ এই বিধ্বংসী বানৰ কাৰণ।’ অধ্যয়নটোৰ সম্পৰ্কত ইম্পেৰিয়েল কলেজৰ পৰিৱেশ নীতি কেন্দ্ৰৰ জলবায়ু বিজ্ঞানৰ অধ্যাপক ফ্রেডৰিক অট্ট’বেও কয়। জলবায়ু পৰিৱৰ্তনে অধিকাংশ ভাৰতীয়ৰ জীৱন যাত্ৰা কঠিন কৰি তুলিলেও প্রতিটো দুৰ্যোগৰ বাবে জলবায়ু পৰিৱৰ্তন দায়ী নহয়। অসমৰ বিধ্বংসী বানৰ কাৰণ হৈছে পৰিৱেশ ধ্বংস আৰু আন্তঃগাঁথনিৰ সীমাবদ্ধতা।’
লক্ষ্যণীয় যে এই অধ্যয়নত লগতে আঙুলিয়াই দিয়া হৈছে যে যোৱা ১৯ জুলাই বা তাৰ পূৰ্বে যি পৰিমাণত পূব অসম বা নগালেণ্ডত বৰষুণ হৈছিল তেনে হাৰৰ বৰষুণ দুবছৰৰ পাছত আকৌ হোৱাৰ সম্ভাৱনা আছে। কেনেদৰে এনে দুর্যোগ প্রতিহত কৰিব পাৰি!
শতাধিক লোকৰ প্ৰাণহানি কৰা আৰু বিস্তৰ সা-সম্পত্তি ধ্বংস কৰা পূব অসমৰ বিধ্বংসী বানৰ লেখীয়া ভয়ংকৰ দুৰ্যোগৰ পুনৰাবৃত্তি ৰোধৰো দিহা দিছে বিশ্ব বতৰ কাৰণ নিৰূপণ সংস্থাই। সংস্থাৰ বিজ্ঞানীসকলৰ মতে, পৰম্পৰাগত মথাউৰি নিৰ্মাণ কৰি এনে বান দুর্যোগ প্রতিহত কৰিব নোৱাৰি। এনে মথাউৰিৰ বাবে ক্ষয়-ক্ষতিৰ অধিক বৃদ্ধিৰহে আশংকা আছে।
গতিকে মথাউৰি নিৰ্মাণ বা নৈক নিয়ন্ত্ৰণ কৰাৰ পৰিৱৰ্তে জলাভূমি সংৰক্ষণ, বানে ডুবুওৱা অঞ্চলসমূহত পকী উন্নয়নৰ কাম হ্রাস কৰা, নলা-নর্দমাৰ উন্নতি সাধন আদি কৰা উচিত।
আনহাতে, এই বিধ্বংসী বানে ৰাজহুৱা স্বাস্থ্য ব্যৱস্থা অধিক দুর্বল অৱস্থা তুলি ধৰিলে বুলিও এই বিজ্ঞানীসকলৰ প্রতিবেদনত কোৱা হৈছে। এনে অৱস্থাত সংক্রমণশীল ৰোগৰ প্ৰচণ্ড প্রার্দুভাৱ ঘটাৰো আশংকা কৰিছে বিজ্ঞানীসকলে।
মুঠতে এই বানে লাখ লাখ লোকৰ জীৱন-জীৱিকালৈ ভাবুকি সৃষ্টি কৰা বুলিও এই বিজ্ঞানীসকলে আঙুলিয়াই দিছে। অসমৰ ভূমি ঔপনিবেশিক কালৰ পৰাই বানৰ ক্ষেত্ৰত স্পৰ্শকাতৰ বুলিও বিজ্ঞানীসকলৰ প্ৰতিবেদনত কোৱা হৈছে। বিশেষকৈ ব্ৰহ্মপুত্ৰই বছৰি বানৰ সৃষ্টি কৰি আহিছে। ফলত ব্ৰহ্মপুত্ৰ নৈ বাহিনীৰ বাবে বিগত এটা দশকত ৰাজ্যত ১০ৰ পৰা ১৫ হেজাৰ কোটি টকাৰ ক্ষয়-ক্ষতি হ’ল বুলিও এই বিজ্ঞানীসকলে উল্লেখ কৰিছে।