ClimateChange : দৈনিক অগ্ৰদূত ডিজিটেল ডেস্ক : সমগ্ৰ বিশ্বৰে বতৰৰ ধৰণ সলনি কৰি দিব পাৰে ‘এল নিনো’ ৱে। বিগত কিছু বছৰত ‘এল নিনো’ৰ চৰম প্ৰভাৱ প্ৰত্যক্ষ কৰিছে পৃথিৱীয়ে। স্পেনিছ ভাষাত ‘এল নিনো’ৰ অৰ্থ হৈছে ‘সৰু ল’ৰা’। এই নামটো ১৬০০ৰ দশকত দক্ষিণ আমেৰিকাৰ স্পেনিছ মাছমৰীয়াসকলে প্রথমে ব্যৱহাৰ কৰিছিল।
মাছমৰীয়াসকলে লক্ষ্য কৰিছিল যে সাগৰৰ পানী উষ্ণ হৈ পৰিলে প্ৰৱল বৰষুণ আৰু ধুমুহা হয়। ফলত মাছ ধৰাৰ ক্ষেত্ৰত ব্যাঘাত জন্মে। ইয়াৰ প্ৰভাৱ সাধাৰণতে বৰদিনৰ সময়ত স্পষ্ট হয়।
অৱশ্যে বিগত কিছু দশকত এই বতৰৰ ঘটনাৰ স্থায়িত্ব বাঢ়িছে। আগন্তুক ডিচেম্বৰত ‘এল নিনো’ ৱে সর্বোচ্চ তীব্রতাত উপনীত হোৱাৰ পূর্বাভাসৰ আগতেই ই আৰু শক্তিশালী হৈ উঠিছে।
বিশ্ব বতৰ সংস্থাৰ মতে, ‘এল নিনো’ৰ প্ৰভাৱত বিশ্বৰ বিভিন্ন প্ৰান্তৰ বতৰত অস্বাভাৱিক আৰু চৰম পৰিৱেশৰ সৃষ্টি হৈছে। যেনে, চিলিৰ আটাকামা মৰুভূমিত ফুলৰ সমাহাৰ দেখা গৈছে। আনহাতে, জাপানৰ ৰাজধানী টকিঅ’ত একেৰাহে ৩৫ দিন বৃষ্টিপাত হৈছে।
এয়া ১৮৮৬ৰ পাছত দীর্ঘতম সময় ধৰি চলা বৰষুণৰ ঘটনা।ক্রমাৎ শক্তিশালী হৈ থকা ‘এল নিনো’ৰ প্ৰভাৱত যোৱা ছেপ্টেম্বৰত আটাকামা মরুভূমিত প্রায় দুশ প্ৰজাতিৰ লাখ লাখ ফুল ফুলা দেখা গ’ল। মনোৰম দৃশ্য প্রত্যক্ষ কৰিবলৈ অহা পর্যটকে সংগ্ৰহ কৰা ফটোত দেখা গৈছে যে পৃথিৱীৰ মেৰু-বহির্ভূত সবাতোকৈ শুকান মৰুভূমিখন যেন বেঙুনীয়া ৰঙৰ গালিচাৰে ঢাক খাই পৰিছে।
আটাকামা মরুভূমি প্রশান্ত মহাসাগৰ আৰু আণ্ডিজ পৰ্বতমালাৰ মাজত অৱস্থিত আৰু চিলিৰ উত্তৰ উপকূলৰ সমান্তৰালকৈ প্ৰায় ১,৬০০ কিলোমিটাৰ অঞ্চলজুৰি বিস্তৃত। যোৱা জুলাই আৰু আগষ্টত চিলিৰ বহু অঞ্চলত অভিলেখ সংখ্যক বৃষ্টিপাত হৈছে।
ইয়াৰ ভিতৰত কিছু অঞ্চলৰ বৰষুণৰ মাত্ৰা ১৯৫০ৰ দশকত জোখ লোৱাৰ পাছত আৰু কেতিয়াও দেখা পোৱা নাছিল। কোনো কোনো অঞ্চলত ১৮০ মিলিমিটাৰৰো অধিক বৃষ্টিপাত নথিভুক্ত কৰা হৈছে, যাৰ সম্পৰ্কে চিলিৰ বন বিভাগ ‘কোনাফ’ৰ আটাকামা জীৱবৈচিত্র্য বিষয়ক মুৰব্বী ছিজাৰ পিজাৰোৱে কয়, ‘এনেকুৱা আগতে কেতিয়াও নথিভুক্ত কৰা হোৱা নাছিল।’
এই অদ্ভুত ঘটনাটো এনে এক সময়ত ঘটিছিল, যেতিয়া টকিঅ’ই ‘এল নিনো’ৰ কাৰণে সৃষ্ট ‘বৃষ্টিজনিত ক্লান্তি’ত ভুগিছিল। জাপানৰ ৰাজধানীত বিগত এমাহৰো এধিক সময় ধৰি একেৰাহে বৰষুণ আহি আছে, যাৰ ফলত শাক-পাচলিৰ দাম ব্যাপক হাৰত বৃদ্ধি পাইছে আৰু পৰ্যটনত নেতিবাচক প্ৰভাৱ পৰিছে। ইয়াৰ সমান্তৰালকৈ টকিঅ’ৰ লাখ লাখ মানুহে ভাবিবলৈ বাধ্য হৈছিল যে তেওঁলোকে হয়তো আৰু কেতিয়াও সূর্যটো দেখা নাপাব।
‘মাইনিচি শ্বিমবুন’ নামৰ এক সংস্থাৰ তথ্য অনুসৰি, ছেপ্টেম্বৰত মধ্য টকিঅ’ত স্বাভাৱিকৰ তুলনাত প্রায় তিনি গুণ অধিক বৃষ্টিপাত হৈছে। সংস্থাটোৱে লগতে জনাইছে যে একে সময়তে য’ত মাত্র ৪৫.৮ ঘণ্টা সূৰ্যৰ পোহৰ পোৱা গৈছে, যিটো বিগত কিছু বছৰৰ ভিতৰত দ্বিতীয় সর্বনিম্ন। একেৰাহে ১৪ দিন টকিঅ’ৰ আকাশৰ পৰা অন্তর্ধান হৈ আছিল সূর্য। টকিঅ’ত এয়াই আছিল দীর্ঘতন বৰষুণৰ সময়কাল। ইয়াৰ আগৰ দীর্ঘতম সময়কাল আছিল ২০১৯ৰ ২৭ জুনৰ পৰা ২৯ জুলাই পর্যন্ত। মুঠ ৩৩ দিন।
বিশ্ব বতৰ সংস্থা (ডব্লিউএমঅ’) ৰ তৰফৰ পৰা সতৰ্ক কৰি দিছে যে চলিত অক্টোবৰৰ পৰা ডিচেম্বৰৰ ভিতৰত বিশ্বজুৰি সাগৰপৃষ্ঠৰ তাপমাত্রা অভিলেখ মাত্রাত উপনীত হ’ব পাৰে। ৰাষ্ট্ৰসংঘৰ অধীনস্থ এই সংস্থাটোৱে লগতে জনাইছে যে ১৯৫০ৰ পাছত দেখা পোৱা শক্তিশালী ‘এল নিনো’সমূহৰ ভিতৰত ই অন্যতম আৰু এই ‘এল নিনো’ ২০২৭ৰ ফেব্ৰুৱাৰী পর্যন্ত স্থায়ী হ’ব।
