ClimateChange :দৈনিক অগ্ৰদূত ডিজিটেল ডেস্ক: জলবায়ু পৰিৱৰ্তনৰ গুৰুতৰ প্রভাৱ পৰিছে অসমতো। এই পৰিৱৰ্তনৰ ভয়াৱহতাৰ পৰিপ্ৰেক্ষিতত ভাৰত চৰকাৰৰ অনুকৰণত অসম চৰকাৰেও জলবায়ুৰ পৰিৱৰ্তনৰ বিষয়টো চৰকাৰী বিভাগৰ অন্তর্ভুক্ত কৰিবলগীয়া হৈছে। সেই অনুসৰি পূৰ্বৰ বন আৰু পৰিৱেশ বিভাগৰ নাম সলনি কৰি নতুনকৈ নামকৰণ কৰা হৈছে পৰিৱেশ, বন, আৰু জয়বায়ু পৰিৱৰ্তন বিভাগ।
ইয়াৰ জৰিয়তে জলবায়ু পৰিৱৰ্তন তথা বতৰ পৰিবৰ্তনৰ বিষয়টো গুৰুত্বসহকাৰে লোৱা হৈছে। ইয়াৰ অংশ হিচাপে জলবায়ুৰ পৰিৱৰ্তনৰ প্ৰভাৱ নিয়ন্ত্ৰণৰ বাবে অসম চৰকাৰে বিভিন্ন কাৰ্যসূচী গ্ৰহণ কৰিছে। কে’বাখনো নীতিও গ্ৰহণ কৰা হৈছে। কিয়নো অসমত বতৰৰ ভয়াৱহ পৰিৱৰ্তন হৈছে। কিন্তু তেনে পদক্ষেপ আৰু নীতি ৰূপায়ণৰ বিপৰীতে বাজেটত ধাৰ্য কৰা হৈছে অতি ন্যূনতম পৰিমাণৰ পুঁজি।
তাতোকৈও উদ্বেগৰ বিষয়টো হ’ল যে বাজেটত ধাৰ্য কৰা পুঁজি চৰকাৰে কেৱল নথি-পত্ৰতে আৱদ্ধ কৰি ৰাখিছে। ধাৰ্য কৰা পুঁজি মোকলাই নিদিয়াৰ ঘটনাও ঘটিছে। বিভাগৰ নাম সলনি কৰাৰ পাছত যোৱা ছটা বিত্তীয় বৰ্ষত জলবায়ুৰ পৰিৱৰ্তন ৰোধৰ বাবে ধাৰ্য কৰা হয় মাত্র তিনি কোটি ১৬ লাখ টকা। সেই অনুসৰি, ২০২০-২১৩ ২৪.৮ লাখ টকা, ২০২১-২২ত ৭৩.৬৬ লাখ টকা, ২০২২-২৩ত ৭১.৮ লাখ টকা, ২০২৩-২৪৩ ৫৮.৯৫ লাখ টকা, ২০২৪-২৫৩ ৪২.৮ লাখ টকা আৰু ২০২৫-২৬ত ৪৩.৮ লাখ টকা আৱণ্টন দিয়া হয়।
কিন্তু দুর্ভাগ্যজনকভাৱে পুঁজি মোকলাই দিয়াৰ ক্ষেত্ৰত বিষয়টো এটা সীমাৰ মাজত স্থবিৰ হৈ ৰৈছে। ২০২০-২১, ২০২১-২২ আৰু ২০২২-২৩ত আৱণ্টিত পুঁজিৰ এটা অংশহে মোকলাই দিয়া হয়। তাৰ বিপৰীতে ২০২৩-২৪ আৰু ২০২৪-২৫ত বাজেটত প্রস্তাৱিত পুঁজি চৰকাৰে আৱণ্টনে নিদিলে। ফলস্বৰূপে পুঁজিৰ অভাৱত বিভাগটোৰ কাম-কাজত যতি পৰিছে।
জলবায়ু পৰিৱৰ্তনৰ ভয়াৱহতাৰ প্ৰভাৱ অসমত কিদৰে পৰিছে তাৰ উল্লেখ স্বয়ং বিভাগটোৱে কৰিছে। বাজেটত পুঁজি বিচাৰি প্ৰস্তাৱ দাখিলৰ সময়ত অসমত পৰিস্থিতিৰ জটিলতাৰ প্রতিবেদনো বিভাগটোৱে বিত্ত বিভাগক দাখিল কৰে। সেই প্ৰতিবেদনত গভীৰ উদ্বেগেৰে উল্লেখ কৰা হৈছে যে বতৰ পৰিৱৰ্তনে অসমত অস্বাভাৱিক বৰষুণৰ মাত্ৰা অধিক হোৱাৰ বিপৰীতে আৱতৰীয়া বানপানীৰ তাণ্ডৱ বৃদ্ধি হৈছে।
বনাঞ্চলৰ বাহিৰৰ পৰিৱেশটো বাদেই ভিতৰত থকা জলাশয়ৰ পৰিসীমা আৰু জলস্তৰ হ্রাস হৈছে। বেক্টেৰিয়াজনিত ৰোগৰ প্ৰভাৱ অসমত বৃদ্ধি হোৱাৰ অন্যতম কাৰণ হৈছে জলবায়ুৰ পৰিৱৰ্তন। স্বাভাৱিক সময়ত বৰষুণৰ পৰিমাণ নিম্নগামী হোৱাত কৃষি উৎপাদনত প্ৰভাৱ পৰিছে। মানুহ আৰু বন্যপ্ৰাণীৰ মাজত অসমত সংঘাত বৃদ্ধিৰো অন্যতম কাৰণ জলবায়ুৰ পৰিৱৰ্তন বুলি বিভাগটোৰ প্ৰতিবেদনত উল্লেখ কৰা হৈছে।
গৰমৰ প্রকোপত অসমত মৃত্যু আৰু ৰোগজনিত হাৰ বৃদ্ধি হোৱাৰো উল্লেখ ইয়াত কৰা হৈছে। এনে কে’বাটাও কাৰণ উল্লেখ কৰি বিভাগটোৱে গ্ৰহণ কৰা নীতিৰ উল্লেখো বিত্ত বিভাগত দিয়া প্রতিবেদনত কৰা হৈছে। তাত উল্লেখ কৰা অনুসৰি জলবায়ু পৰিৱৰ্তন ৰোধৰ বাবে অসম চৰকাৰে এতিয়ালৈকে কে’বাখনো নীতি তথা আঁচনি গ্রহণ কৰিছে।
তেনে চাৰিখন নীতি হ’ল- অসম সৌৰ শক্তি উৎপাদন প্ৰসাৰ নীতি, অসম বৈদ্যুতিক বাহন নীতি, অসম কৃষি বনানীকৰণ নীতি আৰু আছাম এনার্জি কনজাৰভেচন বিল্ডিং কোড। এই মূল বিষয়বোৰ উল্লেখ কৰি বাজেটত পৰিৱেশ, বন আৰু জলবায়ুৰ পৰিৱৰ্তনৰ বিভাগে উপযুক্ত পৰিমাণৰ পুঁজি বিচাৰে। কিন্তু তাৰ পৰিৱৰ্তে চৰকাৰে বিষয়টোৰ জটিলতাৰ তুলনাত অতি কম পৰিমাণৰ পুঁজি বাজেটত ধার্য কৰে।
এই পুঁজিও আৱণ্টন দিয়াৰ পৰা বিত্ত বিভাগ বিৰত আছে। প্রসংগক্রমে উল্লেখ যে জলবায়ু পৰিৱৰ্তনৰ প্ৰভাৱসমূহৰ স’তে মোকাবিলা কৰিবলৈ আৰু ৰাজ্যৰ জলবায়ুৰ পৰিৱৰ্তনৰ ক্ষেত্ৰত স্থিতিস্থাপকতা শক্তিশালী কৰাৰ বাবে কেন্দ্ৰীয় চৰকাৰৰ পৰিৱেশ, বন, জলবায়ু পৰিৱৰ্তন মন্ত্রণালয়ৰ নিৰ্দেশাৱলী অনুসৰি অসম চৰকাৰে বিগত ২০১৫তে প্রথম অসম ৰাজ্যিক জলবায়ু পৰিৱৰ্তন কাৰ্যকৰী পৰিকল্পনা প্ৰস্তুত কৰিছিল।
ইয়াৰ পাছত ২০২১-৩০ৰ বাবে এই পৰিকল্পনা সংশোধন কৰা হয়। সংশোধিত পৰিকল্পনাখনত কৃষি আৰু সংলগ্ন খণ্ড, শক্তি, জলসম্পদ, অৰণ্য-জৈৱ বৈচিত্র্য, স্বাস্থ্য, নগৰীয়া-গাঁৱলীয়া আৱাস, দুর্যোগ প্রশমন আৰু পৰিকল্পিত শিক্ষা ক্ষেত্ৰক অন্তৰ্ভূক্ত কৰা হয়। এনেদৰে উদ্বেগজনক বিষয়টোৰ প্ৰসাৰতা অধিক বৃদ্ধি হোৱাৰ বিপৰীতে অসম চৰকাৰৰ বাজেটত ধাৰ্য কৰা পুঁজিৰ পৰিমাণ যথেষ্ট নিশকতীয়া হোৱা বুলি বিভাগটোৰ মজিয়াতে চর্চা হৈ আহিছে।
তাৰ ওপৰতে আকৌ পুঁজি মোকলাই দিয়াটো চৰকাৰে চূড়ান্ত কার্পণ্যতা প্রকাশ কৰাটো গভীৰ উদ্বেগৰ বিষয় হিচাপে পৰিগণিত হৈছে। পুঁজি আবণ্টন নিদিলেও প্রকৃতি ধ্বংস যজ্ঞ অসমত ব্যাপক ৰূপত চলিছে। প্রকৃতি ধ্বংসৰ পৰিণাম এমাহ পূর্বে পূৱ অসমত হোৱা বিধ্বংসী বান বুলিও সর্বত্র আলোচিত হৈছে।