AssamPoet : দৈনিক অগ্ৰদূত ডিজিটেল ডেস্ক : কৃত্রিম খাদ্য নলী, অক্সিজেন মাস্ক, থিয় হ’ব নোৱাৰা দেহৰ অৱস্থা। সৌ সিদিনালৈকে এমেচাৰ নাট্য গোষ্ঠীৰ মঞ্চ কঁপাই ৰখা নলবাৰীৰ পানীগাঁৱৰ নাৰায়ণ বৈশ্যৰ এয়া শেহতীয়া অৱস্থা। প্রকৃতার্থত এজন ভেমহীন শিল্পী তেওঁ।
কাব্য চর্চা, আবৃত্তি আৰু অভিনয়ৰ লগতে পেটৰ ভাতৰ বাবে কাৰো ওচৰত হাত নাপাতি বিস্কুটৰ ফেৰী কৰিবলৈ কুণ্ঠাবোধ নকৰা নাৰায়ণ বৈশ্য। এনেবোৰ গুণৰ বাবে তেওঁ সকলোৰে প্রিয়। পত্নী আৰু এগৰাকী কণমানিক লৈ তেওঁৰ আছিল এখন ৰঙৰ সংসাৰ। কিন্তু দুৰাৰোগ্য কৰ্কটৰ কবলত পৰি সেইজন নাৰায়ণ বৈশ্যই সকলোৰে ওচৰত প্ৰাৰ্থনা জনাইছে অলপ সহায়ৰ বাবে। থৰক-বৰক খোজ, হাউলি পৰিব খোজা দেহাটোৰে দুদিন পূৰ্বে তেওঁ নলবাৰীৰ এটা ষ্টুডিঅ’ত উপস্থিত হৈ ৰেকর্ডিং কৰিলে জীৱনৰ শেষ?
কবিতা- মইতো যাম গুচি জীৱনৰ ভাও এৰি। অতি হৃদয়স্পর্শী নাৰায়ণ বৈশ্যৰ এই কবিতা সামাজিক মাধ্যমত সম্প্ৰচাৰ হোৱাৰ লগে লগে ব্যাপক চর্চালৈ আহিছে।কবিতাটোৰ লগতে তেওঁ সামাজিক মাধ্যমত প্ৰথমবাৰৰ বাবে লিখিছে- কেমোথেৰাপীয়ে
মোৰ শৰীৰটো একেবাৰে ধ্বংস কৰি দিলে, এতিয়া অন্তত এবাৰ অসমৰ বাহিৰত গৈ অলপ টেষ্ট কৰি চাবৰ মন, আর্থিকভাৱে যাব পৰা নাই। আশা কৰো আপোনাসৱৰ পৰা আৰু অকণমান সহায় পালে মৃত্যুৰ আগতে হ’লেও অলপ মনৰ আশা পূৰ হ’ব।
লগতে তেওঁ এই কবিতাটো শেষ কবিতা বুলি প্রকাশ কৰিছে। তেওঁ কৈছে- ‘এইটো হ’ল মোৰ জীৱনৰ অন্তিম কবিতা। উদ্দেশ্য এটা আছিল নৱ প্ৰজন্মক এটা বার্তা দিয়া। এজন ল’ৰা বা ছোৱালী কেনেদৰে বাট এৰি অবাটে যায়, তাৰ বাবে দায়ী কোন, ঘৰখনৰ লগতে সমাজ ব্যবস্থাও জড়িত হৈ থাকে যদিহে সৰুতে মৰমৰ বাহিৰে অন্যখিনিত গুৰুত্ব নিদিওঁ। যদি মানৱসম্পদ ধ্বংস হয় সমাজ কেতিয়াও উন্নত নহয় । আশা কৰো এই বাৰ্তাৰ সার্থকতা আহিলে মোৰ কবিতাটো সম্পূর্ণ হ’ব। মইটো যাম গুচি জীৱনৰ ভাও এৰি ‘গুৱাহাটীত মোৰ আৰু চিকিৎসা নাই। তেওঁলোকে আৰু নোৱাৰে। শেষত মই মৃত্যু ভয় নকৰো, যাৰ যেতিয়া যাব লগা থাকে তেতিয়া যাবই, কেৱল মনৰ কৰণীয়খিনি কৰিব পাৰিলে ভাল।’
উল্লেখ্য যে নাৰায়ণ বৈশ্য কেৱল কবিতাৰ বাবে কবিতা লিখা বা শিল্পৰ বাবে অভিনয় কৰা শিল্পী নহয়। তেওঁ নিজৰ ঘৰ আৰু জীৱনক সদায় কবিতা আৰু নাটকৰ পৰা অভিন্ন কৰি চলি আহিছে। নাৰায়ণৰ ঘৰত এবাৰৰ বাবে ভৰি থোৱাজনেও উপলব্ধি কৰিব তেওঁৰ সংস্কাৰৰ কথা।
সেইজন কবি- শিল্পীয়ে যোৱা কেইবছৰ মানৰ পৰা দুৰাৰোগ্য কৰ্কট ৰোগত যুঁজি যুঁজি চাৰিও দিশত সৰ্বস্বান্ত। সেইজন কবি- শিল্পীয়ে সহায়ৰ বাবে জনোৱা কাতৰ আহ্বানক অকণমান সঁহাৰি দিয়াৰ আহ্বান জনাইছে নলবাৰীৰ শিল্পী, নাৰায়ণ অনুৰাগী, পৰিয়াল আৰু স্থানীয় ৰাইজে।
