TinsukiaWaterSupply : দৈনিক অগ্ৰদূত ডিজিটেল ডেস্ক: সোণৰ কণী পৰা হাঁহত পৰিণত হৈছে তিনিচুকীয়া নগৰ পানীযোগান আঁচনি। ২০১৪৩ ৯৪ কোটি টকা ব্যয়েৰে আৰম্ভ হোৱা এই আঁচনিখন ১২ বছৰ পাৰ হোৱাৰ পাছতো আজি ২০২৬ত কার্যক্ষম হৈ নুঠিল। ফলত আজিও তিনিচুকীয়া চহৰৰ হেজাৰ হেজাৰ লোকে বিশুদ্ধ খোৱাপানীৰ পৰা বঞ্চিত হৈ থাকিবলগীয়া হৈছে। আঁচনিখনৰ কামৰ নামত বিগত কে’বাবছৰ ধৰি চহৰখনৰ অলিয়ে-গলিয়ে খান্দি-খান্দি কদর্য কৰি তোলা হৈছে।
অভিযোগ অনুসৰি গড়কাপ্তানি বিভাগৰ নীতি অনুসৰি মাটিৰ পৰা কমেও এক মিটাৰ তলত পানীৰ পাইপ স্থাপন কৰিব লাগে। কিন্তু ঠিকাদাৰী প্রতিষ্ঠানটোৱে কোনো নিয়ম নামানি চহৰৰ বিভিন্ন অঞ্চলত মাত্র এক ফুটৰ পৰা ডেৰফুট তলতে পাইপ পুতি দিছে। পাছত সেই পাইপসমূহ পুনৰ খান্দি পেলোৱাত ব্যস্ত হৈ পৰিছে। ইয়াৰ ফলত বৰদলৈ নগৰ, চলিহা নগৰকে ধৰি চহৰৰ প্ৰায়বোৰ উপ-পথ ভাঙি-ছিঙি যাতায়াতৰ অনুপযোগী হৈ পৰিছে।
প্রতিদিনাই স্কুল বাছ আৰু বিভিন্ন ব্যক্তিগত বাহন পাইপ স্থাপনৰ বাবে খন্দা গাঁতত সোমাই দুর্ঘটনাৰ সৃষ্টি হৈছে। এজাক বৰষুণতে সমগ্ৰ চহৰখন পানী আৰু বোকাৰে নিমজ্জিত হৈ জনজীৱন বিপর্যস্ত হোৱাৰো অভিযোগ উঠিছে। এই কেলেংকাৰিক লৈ তীব্র প্রতিক্রিয়া ব্যক্ত কৰিছে তিনিচুকীয়া জিলা ছাত্র সন্থাই।
সংগঠনটোৰ সাধাৰণ সম্পাদক কনচেং গগৈয়ে কয় যে যি ঠিকাদাৰী প্রতিষ্ঠানে প্রকল্পটোৰ ঠিকা লাভ কৰিছিল, তেওঁলোকৰ চৰম বেমেজালিৰ বাবেই আজি এই অৱস্থাৰ সৃষ্টি হৈছে। পথবোৰ নিয়মমতে খান্দি পাইপ পুতিব লাগিছিল, কিন্তু তেওঁলোকে গোটেই চহৰখন ধ্বংস কৰি পেলাইছে।
তেওঁ লগে লগে বিভাগীয় মন্ত্রী আৰু কৰ্তৃপক্ষই এই বিষয়ত বিহিত ব্যৱস্থা গ্রহণ কৰিব লাগে বুলি দাবী জনায়। জিলা ছাত্র সন্থাৰ সভাপতি প্রতিম নেওগে আৰু অধিক তীব্র ভাষাৰে কয় যে এই প্রকল্পটো চাবলৈ এতিয়া পর্যটক মাতিব লাগিব। চৰকাৰৰ কোটি টকীয়া প্রকল্প কেনেকৈ অপব্যয় কৰা হয় তাক চাবলৈ এতিয়া পৰ্যটনৰ ব্যৱস্থা কৰিব লাগিব।
তিনিচুকীয়া চহৰতেই যদি এই পৰ্যায়ৰ দুর্নীতি হয়, তেন্তে ভিতৰুৱা অঞ্চলত কি হৈ আছে তাক ভাবিবলগীয়া বুলিও তেওঁ মন্তব্য কৰে। লগতে প্ৰকল্পৰ বাবে এতিয়া মানুহে ঘৰৰ পৰা গাড়ী উলিয়াবলৈও ট্ৰেক্টৰ আৰু জেচিবিৰ সহায় ল’বলগীয়া হৈছে বুলি উল্লেখ কৰি সেই ক্ষতিপূৰণ কোনে দিব বুলি প্রশ্ন কৰে।
এই পৰিপ্ৰেক্ষিতত তিনিচুকীয়া জিলা ছাত্র সন্থাই প্রকল্পটোৰ কাম-কাজৰ ওপৰত মুখ্যমন্ত্ৰীৰ তদাৰকত তদন্ত কৰাৰ লগতে ঠিকাদাৰী প্ৰতিষ্ঠান চিভিন ইঞ্জিৰিয়াৰ্ছ এণ্টাৰপ্ৰাইজ প্রাইভেট লিমিটেক তৎক্ষণাত ব্লেকলিস্টেড কৰিবলৈ দাবী জনাইছে। লগতে সেই সময়ত চকু মুদি অনুমতি দিয়া অভিযন্তাসকলৰ বিৰুদ্ধে বিভাগীয় তদন্ত আৰু তিনিচুকীয়া জিলা প্রশাসন আৰু পৌৰসভাই ঠিকাদাৰৰ বিৰুদ্ধে কঠোৰ ব্যৱস্থা গ্রহণ কৰিব লাগে বুলি সংগঠনটোৱে কয়। ৯৪ কোটি টকা ব্যয় কৰিও জনতাই এটুপি বিশুদ্ধ পানী নোপোৱা এই ঘটনাই তিনিচুকীয়াবাসীৰ মাজত। ক্ষোভৰ সৃষ্টি কৰিছে।
