NepalMinister : দৈনিক অগ্ৰদূত ডিজিটেল ডেস্ক : মাতৃৰ মন সদায় অনন্য। সন্তান যাৰেই নহওক কিয়, কণমানি শিশুৰ কান্দোন শুনিলে সকলো মাতৃৰে মন উতলা হৈ পৰে। আপোন-পৰ পাহৰি তেতিয়া সেই শিশুক চম্ভালাত ব্যস্ত হৈ পৰে তেওঁলোক। তেনে এক মমতাময়ী মাতৃৰ উদাহৰণ সীতা বাদি।
এই মহিলাৰ পৰিচয়, তেওঁ এখন দেশৰ মন্ত্ৰী। অথচ এটি ক্ষুধার্ত শিশুৰ ক্ৰন্দন শুনি নিজৰ পদ মর্যাদাক পাহৰি গ’ল তেওঁ। আগুৱাই গৈ কোলাত লৈ স্তনপান কৰালে সেই মন্ত্ৰীগৰাকীয়ে। সম্প্ৰতি সেই ভিডিঅ’ সামাজিক মাধ্যমত ভাইৰেল হৈ পৰিছে।
এই ঘটনা নেপালৰ এক শিশু গৃহত। বিভিন্ন অঞ্চলৰ পৰা অনাথ বা আশ্রয়হীন শিশুক উদ্ধাৰ কৰি সেই গৃহত ৰখা হয়। সেই শিশু গৃহটোৱেই পৰিদৰ্শন কৰিবলৈ গৈছিল নেপালৰ মহিলা, শিশু আৰু প্রবীণ নাগৰিক বিভাগৰ মন্ত্রী সীতা বাদিয়ে।
কাঠমাণ্ডুৰ সেই শিশু গৃহত অত্যন্ত অস্বাস্থ্যকৰ পৰিৱেশৰ মাজত নৱজাতকসকলক ৰখাৰ অভিযোগ উঠিছিল। লেতেৰা বিছনা, মজিয়াত বৰষুণৰ পানী জমা হৈ থকা আদি ভয়াৱহ পৰিস্থিতিৰ মাজতে মন্ত্ৰীগৰাকীয়ে গৃহটো পৰিদৰ্শন কৰিবলৈ গৈছিল। প্রাপ্ত তথ্য অনুসৰি, গৃহটোত থকা অধিকাংশ শিশুৱেই অসুস্থ।
মন্ত্ৰীগৰাকীয়ে ভিতৰত প্ৰৱেশ কৰাৰ সময়তে এটি ১৭ দিন বয়সৰ শিশুৱে কান্দি উঠে। কণমানি শিশুটিয়ে ভোকতে কান্দিছিল; কিন্তু শিশু গৃহটোত তেতিয়া এটোপালো সংৰক্ষিত স্তনদুগ্ধ নাছিল। লগে লগে আগুৱাই গ’ল মন্ত্ৰীগৰাকী। কন্যা শিশুটিক কোলাত লৈ সেই গৃহৰে বিছনাত বহি তেওঁ গাখীৰ খুৱাবলৈ ধৰে।
মন্ত্ৰীৰ মাজতে যেন মাতৃৰ স্নেহ অনুভৱ কৰিছিল সেই অবুজ শিশুটিয়ে। গাখীৰ খোৱাৰ পাছত শিশুটি সেই অচিন মহিলাগৰাকীৰ কোলাতেই পৰম স্বস্তিত নিদ্রাত ঢলি পৰে। মন্ত্ৰীগৰাকীয়ে কয়, ‘শিশুটিক যেতিয়া কোলাত লৈছিলো, এনে লাগিছিল যে তাই মোৰ নিজৰেই সন্তান। এতিয়াৰ পৰা ময়েই তাইৰ মাতৃ।’
সেই মুহূৰ্তৰ ভিডিঅ’ লগে লগে সামাজিক মাধ্যমত ভাইৰেল হৈ পৰিছে। উক্ত শিশু গৃহত ১৫ দিনৰ পৰা আৰম্ভ কৰি দুবছৰ পৰ্যন্ত বয়সৰ প্ৰায় ২০টি শিশু আছে। এই শিশুসকলক সঠিকভাৱে চোৱাচিতা কৰিবলৈ নিৰ্দেশ দিছে মন্ত্ৰীগৰাকীয়ে। তাৰ পাছতে শিশু গৃহটো ভালদৰে সজাই তোলাৰ কাম আৰম্ভ হৈছে। উল্লেখ্য যে মন্ত্রী বাদি নিজেও এনে এক শিশু গৃহৰ পৰাই মানুহ হৈছে। ১২ বছৰ বয়সৰ পৰা তেওঁ শিশু গৃহত থাকিয়েই পঢ়া-শুনা কৰি আজি নেপালৰ মন্ত্রীপদত অধিষ্ঠিত হৈছে।
