Deuraja:
দৈনিক অগ্ৰদূত ডিজিটেল ডেস্ক:ঐতিহাসিক দেওৰজা মৈদামৰ সমীপৱৰ্তী ধেনুচোচা গাঁৱৰ এটি পৰিয়ালৰ বাৰীত হঠাৎ বসুমতী ভেদি ওলোৱা এটি মহাদেৱ শিৱৰ মূৰ্তিক লৈ ৰাইজৰ মাজত কৌতূহল আৰু ব্যস্ততা সমানেই বৃদ্ধি পাব ধৰিছে। যোৱা ১৯ আগষ্টত গাঁওখনৰ সাংস্কৃতিক কৰ্মী তথা ভাওনা শিল্পী প্রশান্ত দত্ত ওৰফে বাছা নামৰ এজন ভাওনা শিল্পীৰ পদূলিমুখত এজোপা কল গছৰ গুৰিত আবিৰ্ভাৱ হোৱা এটি সৰু মহাদেৱৰ মূৰ্তিৰ সন্মুখত এতিয়া ধূপ-চাকি জ্বলাই একাংশ শিৱ ভক্তই দিনে-নিশাই ভক্তি নিবেদন কৰাৰ এই অলৌকিক ঘটনাক কেন্দ্ৰ কৰি সমগ্ৰ হৈছে বিশেষ চর্চা।
#কেনেকৈ উদ্ভৱ হ’ল উক্ত অলৌকিক ঘটনা
গাঁওখনৰ প্ৰখ্যাত ভাওনা শিল্পী প্রশান্ত দত্ত ওৰফে বাছা নামৰ ব্যক্তিজনে জনোৱা মতে, যোৱা বৃহস্পতিবাৰৰ নিশা সপোনত তিনিভাগ মহাদেৱৰ মূৰ্তি দেখিছিল তেওঁৰ বাৰীৰ চৌহদৰ পদূলিমুখৰ সমীপৰ এজোপা নতুনকৈ ৰোৱা কল গছৰ গুৰিত। এভাগ ভাওনাত ওলোৱা মহাদেৱৰ দৰে, এভাগ এবেগেত উচ্চতাৰ আৰু আনভাগ সোণৰ। চকুত চাট মাৰি ধৰা মূৰ্তি ভাগৰ সৰু মূর্তি ভাগ পদূলিমুখৰ নতুনকৈ ৰোৱা কল গছজোপাৰ গুৰিত আছে আৰু মহাদেৱ মন্দিৰ নিৰ্মাণ কৰাৰ আহ্বান জনাই অন্তর্ধান হয়। ইয়াৰ পাছতে দত্তই তেওঁৰ পত্নীসহ গৈ মূর্তি ভাগ প্রত্যক্ষ কৰে। লগে লগে মহাদেৱৰ মূৰ্তি আবিৰ্ভাৱৰ খবৰটো বিয়পি পৰাৰ পাছতে জনসাধাৰণৰ সোঁত বয় আৰু একাংশ শিৱভক্তৰ সহযোগত মূর্তি ভাগ মাংগলিক কৰ্মৰ মাজেৰে চৈতন্য ৰূপ দিয়ে।
# বাস্তৱ নে অন্ধবিশ্বাস
হৰ হৰ মহাদেৱৰ মূৰ্তি ভাগ দর্শন কৰিবলৈ কালিৰে পৰা ধেনুচোচা গাঁৱলৈ বিভিন্ন অঞ্চলৰ ভক্তৰ আগমন ঘটিছে। কিন্ত মূর্তি ভাগৰ থাপনাস্থলীত নিতৌ বিভিন্নজনে ধূপ-বন্তি জ্বলাই আশিস বিচাৰি সেৱা কৰিছে যদিও সাক্ষাৎ মহাদেৱ তুল্য প্রশান্ত ওৰফে বাছাই শৰাই অর্পনৰ বাবে এতিয়ালৈকে অনুমতি প্রদান কৰা নাই। ইফালে, সমগ্র বিষয়টো এতিয়া সচেতন সমাজে নেতিবাচক দৃষ্টিভংগীৰে গ্রহণ কৰিছে। প্রশ্ন উঠিছে এয়া বাস্তৱ নে অন্ধবিশ্বাস। বজাৰত এনে আৰ্হিৰ মূৰ্তি সহজতে উপলব্ধ হোৱাৰ সময়তো একে আৰ্হিৰ মূৰ্তিও মাটি ফালি আবিৰ্ভাৱ হ’ব পাৰেনে? মূর্তি ভাগৰ কাষত উদ্ধাৰ হোৱা ৰুদ্ৰাক্ষ মালাধাৰো বজাৰত উপলব্ধ সামগ্ৰীৰ লগত সম্পূর্ণ সাদৃশ্য থকাৰ অভিযোগ উঠিছে। বিজ্ঞান প্ৰযুক্তিৰ চূড়ান্ত উত্তৰণৰ সময়তো এচাম মানুহৰ চিন্তাধাৰা অন্ধবিশ্বাসৰ গ্ৰাসৰ পৰা মুক্ত হ’ব পৰা নাই।
