Manipur Situation:
দৈনিক অগ্ৰদূত ডিজিটেল ডেস্ক: পুনৰ উত্তপ্ত মণিপুৰ। ৰাজ্যখনৰ সেনাপতি জিলাত এইবাৰ কুকি আৰু নগাৰ সংঘৰ্ষত চিআৰপিএফৰ ৩৪ বেটেলিয়নৰ উপ-অধীক্ষক প্রদীপ সিং আহত হয়। সোমবাৰে পুৱা এই সংঘর্ষত দুই পক্ষই বহু সংখ্যক ধৰত অগ্নিসংযোগ কৰাক লৈ তীৱ উত্তেজনা বৃদ্ধি পায়। মণিপুৰৰ সেনাপতি জিলাৰ উপৰি সংলগ্ন কাংগ’কপি জিলালৈ উত্তেজনা বিয়পি পৰে। পুৱতি নিশা প্রায় ২-৪০ বজাত প্ৰথমটো অগ্নিসংযোগৰ ঘটনা সংঘটিত হয়। স্থানীয় সূত্ৰত প্রকাশ যে দাওদাওকৈ জ্বলি উঠা ঘৰবোৰৰ জুই নুমাবলৈ পুরা প্রায় ৩-৩০ বজাত অহা অগ্নিনির্বাপক বাহিনীৰ বাহনৰ প্ৰবেশতো একাংশ লোকে বাধা দিয়ে। পুৱা চাৰি বজাৰ পাছত পুনৰ অগ্নিসংযোগৰ ঘটনা সংঘটিত হয়। আৰক্ষীয়ে জনোৱা মতে, নগা সম্প্ৰদায়ৰ লোকক ইয়াৰ লক্ষ্য কৰি লোৱা হয়। পুরা প্রায় ৯-২০ বজাত পৰিস্থিতি অধিক উত্তপ্ত হৈ উঠে আৰু গুলিচালনাৰ ঘটনাও সংঘটিত হয়।
এই সংঘৰ্ষত ৩৬ চিআৰপিএফ বাহিনীৰ ৫৪ বছৰীয়া জোৱানজন আহত হয়। সম্প্রতি তেওঁ চিকিৎসাধীন হৈ আছে। পৰিস্থিতি নিয়ন্ত্ৰণ কৰিবলৈ ইতিমধ্যে ব্যাপক নিৰাপত্তা বাহিনী নিয়োগ কৰা হৈছে। পৰিস্থিতি অধিক শোচনীয় হোৱাৰ আশংকাত বহু স্থানীয় বাসিন্দাই ঘৰ-বাৰী এৰি পলায়ন কৰিছে। স্থানীয় বাসিন্দাৰ অভিযোগ অনুসৰি কুকিসকলৰ সশস্ত্র সংগঠনে নগা অধ্যুষিত গাঁৱত প্রথমে আক্রমণ কৰে। ইয়াৰ বিপৰীতে কুকি সংগঠনসমূহে অগ্নিসংযোগৰ ঘটনাত তীব্র নিন্দা কৰি দোষীক গ্ৰেপ্তাৰৰ দাবী জনাইছে।
প্রশাসনৰ সূত্র মতে, পুৱাৰ ভাগত দুষ্কৃতিকাৰীয়ে প্ৰথমতে নগা জনগোষ্ঠীৰ এজন লোকৰ ঘৰত অগ্নিসংযোগ কৰিছিল। একে সময়তে কুকি জনগোষ্ঠীৰ এজন লোকৰ ঘৰতো অগ্নিসংযোগ কৰা হয়। ইয়াকে লৈ দুয়োপক্ষৰ মাজত উত্তেজনা বিয়পে আৰু গুলিচালনাও হয়। এই গুলিচালনাৰ ঘটনাতে চিআৰপিএফৰ ৩৪ বেটেলিয়নৰ জেনেৰেল ডিউটিৰ উপ-অধীক্ষক প্রদীপ সিং আহত হয়। ইপিনে, সমান্তৰালভাৱে নগা সম্প্ৰদায়ৰ একাংশ লোকে ইম্ফল-ডিমাপুৰ সংযোগী ৰাষ্ট্ৰীয় ঘাইপথ ২ অৱৰোধ কৰে।
আনহাতে, কালি ২০২১ত অসম ৰাইফলছৰ কমান্ডিং বিষয়া, তেওঁৰ পত্নী আৰু সন্তানক গুলীয়াই হত্যা কৰাৰ অভিযোগত মণিপুৰৰ ঘৌবাল জিলাত এজন উগ্রপন্থীক গ্ৰেপ্তাৰ কৰা হয়। চূড়াচান্দপুৰ জিলাৰ চেহকেন গাঁৱত অসম ৰাইফলছৰ কনভয়ৰ ওপৰত ২০২১ৰ ১৩ নৱেম্বৰত উগ্রপন্থীৰ আক্ৰমণত প্রাণ হেৰুৱাইছিল কর্ণেল বিপ্লৱ ত্রিপাঠি, তেওঁৰ পত্নী অনুজা আৰু সন্তান আবিৰে। ২০২১ৰ ২৬ নৱেম্বৰত এই ঘটনাৰ তদন্তৰ দায়িত্ব অর্পণ কৰা হয় কেন্দ্রীয় তদন্তকাৰী সংস্থা এনআইএক।