Kathmandu:
দৈনিক অগ্ৰদূত ডিজিটেল ডেস্ক:আকস্মিক বানে কোবাই যোৱা নেপালৰ উত্তৰাঞ্চলত এতিয়া চৌদিশে হৃদয় বিদাৰক পৰিৱেশ বিৰাজ কৰিছে। বানত সৰ্বস্ব হেৰুওৱা সকলৰ আৰ্তনাদে উদ্ধাৰকাৰী সকলৰো মৰ্মভেদ কৰি গৈছে।
এনে অৱস্থাতে বৃহস্পতিবাৰে উদ্ধাৰকাৰীয়ে বানৰ পানীৰ মাজৰ পৰা এটি সদ্যোজাতৰ মৃতদেহ উদ্ধাৰ কৰে। বানে ধ্বংসস্তূপত পৰিণত কৰা অঞ্চলৰ পৰা উদ্ধাৰ কৰা এই সদ্যোজাতটিৰ মৃতদেহ উলংগ অৱস্থাত উদ্ধাৰ হয়। হাহাকাৰ পৰিৱেশৰ মাজতে উদ্ধাৰকাৰীসকলে সন্ধানহীনসকলৰ উদ্ধাৰ অভিযান অব্যাহত ৰাখিছে। বুধবাৰে পুৱা ন বজাত আকস্মিকভাবে তিব্বতৰ পৰা অহা এই প্রৱল বানত চাৰিখনকৈ জিলা ক্রমে ৰাসুয়া, ধাদিং, নুৱাকট আৰু চিতারনক ধ্বংসস্তূপত পৰিণত কৰে।
বানত উছন হয় গাঁৱৰ পাছত গাঁও। ধ্বংসস্তূপত পৰিণত হয় কে’বাখনো নগৰ। এফালৰ পৰা ঢাঁহি মুহি অনা কে’বা শতাধিক লোকৰ প্ৰাণহানি কৰা কে’বা মিটাৰ উচ্চতাৰ এই বানে অনেক লোকৰ ঘৰ-দুৱাৰ, বাট-পথ, দলং, বিদ্যুৎকেন্দ্র, টেলিকম টাৱাৰ আদিৰ বিস্তৰ ক্ষতিসাধন কৰে। পুৱা দৈনন্দিন ব্যস্ততা আৰম্ভ হোৱাৰ সময়তে অহা এই বানৰ পৰা পৰিত্ৰাণ পাবলৈ হেজাৰ হেজাৰ লোকে প্রাণটাকি দৌৰিও ৰক্ষা নাপালে। বানৰ পানীয়ে উটুৱাই নিয়ে অনেক যানবাহনো।
আনহাতে, নেপাল সংসদত বৈদেশিক মন্ত্রী শিশিৰ খনালে জনোৱা মতে বুধবাৰৰ পুৱাৰ এই বান অহাৰ পূর্বে এটা ভূমিকম্পৰ জোঁকাৰণি অনুভূত হয়। ৰিখটাৰ স্কেলত ৪.৪ প্রাবল্যৰ এই ভূমিকম্পৰ জোঁকাৰণি পুৱা ৮-৩৭ বজাত অনুভূত হয়। অৱশ্যে মার্কিন ভূতাত্বিক জৰীপৰ মতে কালি আকস্মিক বান অহাৰ পূৰ্বে তিব্বতত কোনো ভূমিকম্প হোৱা নাছিল। গতিকে ভূমিকম্পৰ ফলত নহয়, হিমবাহৰ হ্ৰদ ফটাৰ ফলতহে এই ভয়াৱহ বানৰ উদ্ভৱ হয় বুলি মার্কিন ভূতাত্বিক জৰীপে দাবী কৰিছে।
আনহাতে, নেপালৰ উচ্চস্তৰীয় চৰকাৰী সূত্ৰই সদৰী কৰা অনুসৰি এই বানত ৫০ সহস্রোধিক লোক ক্ষতিগ্রস্ত হৈছে। একেদৰে সা-সম্পত্তিৰো বিস্তৰ ক্ষতিসাধন হৈছে। বানৰ ভয়াৱহতা লক্ষ্য কৰি বহুতে মন্তব্য কৰিছে যে এই বানত মৃতৰ সংখ্যা কে’বা সহস্র হোৱাৰ আশংকা আছে।
# এটা দৈত্যকায় শিলে চুৰৰ্মাৰ কৰিলে অনেক সা-সম্পত্তি
তিব্বত পৰ্বতৰ পৰা বানৰ পানীয়ে উটুৱাই অনা এটা দৈত্যকায় শিলে এফালৰ পৰা বহু সা-সম্পত্তি নষ্ট কৰে। শিলটোৰ খুন্দাত বহু ঘৰ-দুৱাৰ ভাঙি পৰে। স্বাভাৱিকতে এই দৈত্যকায় শিল কেনেদৰে পানীত ভাহি থাকিল তাক লৈ বহুতে আশ্চর্য প্রকাশ কৰিছে। ইয়াৰ লগতে একাংশই মন্তব্য কৰিছে যে নৈৰ সোঁত ভয়ংকৰ হ’লে প্রকাণ্ড শিলো পানীত ভাহি উঠে।
আনহাতে, প্ৰকৃতিৰ ৰোষত পৰা দেশখনৰ বান ক্ষতিগ্রস্ত অঞ্চলসমূহত এতিয়া মাথোঁ কান্দোনৰ ৰোলহে শুনিবলৈ পোৱা গৈছে। প্রাথমিক তদন্তত পোহৰলৈ অহা অনুসৰি এই বানত তিব্বত সীমান্তৰ স্থল বন্দৰ জিৰঙৰো বিস্তৰ ক্ষতিসাধন হয়। সর্বাধিক ক্ষতিগ্রস্ত হয় সীমান্তৰ অঞ্চলসমূহ। এই সম্পৰ্কত ইণ্টাৰনেচনেল ফেডাৰেছন অৱ বেড ক্ৰছ এণ্ড ৰেড ক্রেছেন্ট ছ’চাইটিৰ নেপাল শাখাৰ মুৰব্বী ডেভিদ ফিছাবে কয়, ‘এই ভয়াৱহ বানত অনেক গাঁও আৰু বজাৰ অঞ্চল সম্পূর্ণরূপে নিশ্ছিন্ন হয়।’ দেশখনৰ এই আকস্মিক বানৰ ভয়াৱহ অৱস্থাৰ বহু ফটো আৰু ভিডিঅ’ সামাজিক মাধ্যমতো শ্বেয়াৰ হৈছে।
এইসমূহত বানৰ ভয়াৱহতা কেনে আছিল সেয়া ফুটি উঠিছে। চৰকাৰী তথ্য মতে বানৰ কৱলত পৰা এই চাৰি জিলাৰ ভিতৰত সৰ্বাধিক ক্ষয়-ক্ষতি হয় বাসুয়া জিলাত। অবশ্যে নুৱাকট, ধাদিং আৰু চিতাৱন জিলাৰ ক্ষয়-ক্ষতিও প্ৰচুৰ বুলি উদ্ধাৰকাৰীয়ে প্ৰকাশ কৰিছে। আনহাতে এই বানৰ পাছত নৈপৰীয়া লোকসকলক নিৰাপদ স্থানলৈ আঁতৰি যাবলৈ নেপাল চৰকাৰে নিৰ্দেশ জাৰি কৰিছে।
# অহা মাহলৈকে দক্ষিণ এছিয়াত প্রাণঘাতী বানৰ আশংকা
কেৱল নেপালে নহয়, ভাৰতকে ধৰি সমগ্র দক্ষিণ এছিয়াবাসী অহা মাহলৈকে প্রাকৃতিক দুর্যোগক লৈ সতর্ক হৈ থকা উচিত বুলি একাংশ ভূতত্ত্ববিদে মন্তব্য কৰিছে। এই ভূতাত্ত্বিকসকলৰ মতে মৌচুমী বায়ুৰ প্ৰভাৱত অহা ছেপ্টেম্বৰলৈকে দক্ষিণ এছিয়াত প্রবল বৃষ্টিপাত অব্যাহত থকাৰ আশংকা আছে। গতিকে অহা মাহলৈকে এই বৃহত্তৰ অঞ্চলত প্রবল বান আৰু ভূস্খলনৰ ঘটনা সংঘটিত হ’ব পাৰে। জলবায়ু পৰিৱৰ্তনৰ ফলত পৰিৱেশ সলনি হৈছে। গতিকে দক্ষিণ এছিয়াৰ বিভিন্ন স্থানত অহা এমাহ পর্যন্ত বান-ভূস্খলনৰ দৰে ভয়াবহ প্রাকৃতিক দুর্যোগ সৃষ্টিৰ আশংকা আছে। উল্লেখ্য যে এইবাৰ মৌচুমী বতাহ পলমকৈ আহে।
যোৱা জুলাইত অহা মৌচুমী বায়ুৰ ফলত অসমকে ধৰি ভাৰতৰো বিভিন্ন স্থানত বৰষুণ অব্যাহত আছে। সম্প্রতি বতৰ বিজ্ঞানীসকলে ধাৰণা কৰিছে যে এই মৌচুমী বায়ু প্ৰৱাহ অহা মাহলৈকে অব্যাহত থাকিব। অৰ্থাৎ বৰষুণ হৈ থকাৰ প্ৰবল সম্ভাৱনা আছে। লক্ষ্যণীয় যে অসমকে ধৰি দেশৰ বিভিন্ন স্থানত বাৰিষাৰ মাহকেইটাত মৌচুমী বায়ুৰ ফলত বৰষুণ হয়।