Nepal Flood Update:
দৈনিক অগ্ৰদূত ডিজিটেল ডেস্ক:নেপালৰ বুধবাৰৰ ভয়াৱহ আকস্মিক বানত মৃতকৰ সংখ্যা চাৰি শতাধিকলৈ বৃদ্ধি পোৱাটো নিশ্চিত কৰিলে দেশখনৰ চৰকাৰে। বর্তমানেও দেশী বিদেশী পর্যটকসহ কে’বা সহস্ৰাধিক লোক সন্ধানহীন হৈ থকাত মৃতকৰ সংখ্যা বৃদ্ধিৰো আশংকা আছে। তিব্বতৰ পৰা বৈ অহা ভোটেকোশী নৈয়ে সৃষ্টি কৰা এই প্রৱল বানত সন্ধানহীন সহস্রাধিক লোকৰ মাজত কমেও তিনিশ ভাৰতীয় লোকো আছে। আজি ভাৰ তৰ বৈদেশিক মন্ত্রণালয়ে প্রকাশ কৰা অনুসৰি নেপলত বানত সন্ধানহীন সকলৰ মাজত ২৮৫ জন ভাৰতীয় লেক থকাটো নিশ্চিত কৰা হৈছে।
এইসকলৰ মাজত বহু সংখ্যক প্রবাসী ভাৰতীয়ও আছে। আনসকলে কৈলাশ মানস সৰোবৰ যাত্ৰাত অংশ লোৱাৰ উদ্দেশ্যে নেপালত উপস্থিত হৈছিল। তেওঁলোকৰ মাজত পশ্চিমবংগৰো ৩২ জন আছে। আনহাতে, কালিৰ বানৰ ভয়াৱহতা সম্পৰ্কত নেপাল চৰকাৰে প্ৰকাশ কৰা অনুসৰি এই বানত সর্বাধিক ক্ষতিগ্রস্ত হোৱা ৰাসুয়া জিলাত মূল বজাৰ অঞ্চলো বিধ্বস্ত হয়। এফালৰ পৰা ঢাঁহি মুহি অহা বানৰ পানীয়ে মানুহ, জীৱ-জন্তু, অট্টালিকা, গছ-গছনি আদি উটুৱাই নিয়ে।
এই বানত ৰাজহুৱা সম্পদৰো বিস্তৰ ক্ষতিসাধন হয়। বহু সংখ্যক দলং আৰু পথৰো বিস্তৰ ক্ষতিসাধন কৰে বানে। মুঠতে এই বানত মুঠ চাৰিখনকৈ জিলা বিধ্বস্ত হয়। ইয়াৰে ৰাসুয়া জিলাত বানে সর্বাধিক ধ্বংসলীলা সাধন কৰে। তদুপৰি ৰাসুয়া জিলাৰ নিকটৱৰ্তী ধাদিং, নুৱাকট আৰু চিতাৱন জিলাতো বানত অবর্ণনীয় ক্ষতিসাধন হয়। বানৰ পানীয়ে জিলাসমূহৰ কে’বা সহস্র লোকক উটুৱাই নিয়ে।
ইপিনে, ভাৰতৰ বৈদেশিক মন্ত্রণালয়ে প্রকাশ কৰা অনুসৰি বানত ক্ষতিগ্রস্ত নেপালৰ লোকসকলৰ বাবে ভাৰতীয় সামৰিক বাহিনীৰ দুখন বিমানে ৪৮ টন সাহায্য সামগ্রী নিছে। এই সাহায্য সামগ্ৰীসমূহৰ মাজত আঠ টনৰো অধিক খাদ্য সামগ্ৰী আৰু ঔষধ আছে। তদুপৰি ভাৰতে দেশখনলৈ বুজন পৰিমাণৰ সৌৰ চাকিও প্ৰেৰণ কৰিছে। আজিও বায়ুসেনাৰ এখন চি-১৭ বিমানে সাহায্য সামগ্রী লৈ নেপাললৈ উৰা মাৰে।
উল্লেখ্য যে ভোটেকোশী নৈয়ে সৃষ্টি কৰা এই ভয়াৱহ বানত তিব্বতৰো বিস্তৰ ক্ষতিসাধন হয়। চীন চৰকাৰে প্ৰকাশ কৰা অনুসৰি তিব্বতত বানত ডুবি দুই শতাধিক লোকৰ মৃত্যু হৈছে। একেদৰে তিব্বততো দুই শতাধিক ভাৰতীয় পর্যটক আৰু তীর্থযাত্রী আবদ্ধ হৈ আছে। তদুপৰি পাৰ্বত্য অঞ্চলটোত এই বানত কমেও ৫৫৮ জন লোক সন্ধানহীন হৈ আছে।
আনহাতে, ভাৰতৰ বৈদেশিক মন্ত্রণালয়ৰ মুখপাত্ৰ ৰণধীৰ জয়ছোৱালে প্রকাশ কৰা অনুসৰি নেপালৰ বানত সন্ধানহীন হোৱা সকলৰ স’তে সংযোগ স্থাপনৰ চেষ্টা চলি আছে। এই তিনি শতাধিক ভাৰতীয় লোক দেশৰ বিভিন্ন ৰাজ্যৰ। ইয়াৰে ৭৩ জন ভাৰতীয় নাগৰিক নেপালৰ ত্রিশূলী-১ শক্তি প্ৰকল্পত কৰ্মৰত হৈ আছিল। অৱশ্যে এইবাৰ কৈলাশ মানস সৰোবৰ যাত্ৰাত অংশগ্ৰহণৰ উদ্দেশ্যে ভাৰতৰ পৰা কিমান লোক গৈ নেপালত উপস্থিত হৈছিল তাৰ সঠিক তথ্য পোহৰলৈ অহা নাই।
তাৰ মাজতো চৰকাৰী সূত্ৰই প্ৰকাশ কৰা অনুসৰি তামিলনাডুৰ পৰাই দুটা গোটত ৮৬ জন লোক গৈছিল। ইয়াৰে এটা গোটত ৩৭ জন আৰু আনটো গোটত ৪৯ জন লোক আছিল। একেদৰে পশ্চিমবংগৰ পৰা ৩২ জন লোক গৈছিল বুলি ৰাজ্য চৰকাৰে প্ৰকাশ কৰিছে। এই লোকসকলে সম্রাট ট্রেভেলছ নামৰ এটা সংস্থাৰ সহযোগত নেপাললৈ যাত্ৰা কৰিছিল। পশ্চিমবংগৰ সন্ধানহীন এই লোকসকলৰ নাম তালিকাও ৰাজ্য চৰকাৰে প্ৰকাশ কৰিছে।
ইয়াৰে চাৰিজন হ’ল কলকাতাৰ। ইপিনে, দেশৰ বৈদেশিক মন্ত্রণালয়ে প্রকাশ কৰা অনুসৰি ৰিচা টুৰছ নামৰ আন এটা সংস্থাৰ জৰিয়তেও ৬১ জন ভাৰতীয় লোক নেপাললৈ গৈছিল। একেদৰে কেৰালাৰ পৰাও ৩৩ জন ভাৰতীয় লোকে মানস সৰোবৰ যাত্ৰাত অংশ লোৱাৰ উদ্দেশ্যে নেপালত উপস্থিত হৈছিল। এই সকলো সম্প্রতি সন্ধানহীন হৈ আছে। অৱশ্যে ইয়াৰ মাজতে জীৱন্তে ২১ জন ভাৰতীয় লোকক উদ্ধাৰ কৰা হৈছে বুলি বৈদেশিক মন্ত্রণালয়ৰ মুখপাত্র জয়ছোৱালে সদৰী কৰে। এই ২১ জন লোক হ’ল তামিলনাডুৰ। উদ্ধাৰ কৰাৰ পাছত এই ২১ জন লোকে কাঠমাণ্ডুস্থিত ভাৰতীয় দূতাবাসলৈ যাত্ৰা কৰে। তৎসত্ত্বেও তিনি শতাধিক সন্ধানহীন ভাৰতীয় লোকৰ স’তে সংযোগ স্থাপন সম্ভৱ হোৱা নাই বুলি উচ্চস্তৰীয় চৰকাৰী সূত্ৰই প্ৰকাশ কৰিছে।
নেপালৰ পৰিস্থিতি বর্তমানে জটিল হৈ থকাত ইংগিত দি জয়ছোৱালে কয়, ‘এই কঠিন পৰিস্থিতিত নেপালৰ স’তে কান্ধত কান্ধ মিলাই আমি আগবাঢ়িছো। দেশখনলৈ সকলো ধৰণৰ সাহায্য আগবঢ়াবলৈ আমি প্রস্তুত।’ অৱশ্যে বানত ক্ষতিগ্রস্ত অঞ্চলসমূহৰ বাট-পথ তথা টেলিফোন লাইন বিধ্বস্ত হোৱাৰ বাবে উদ্ধাৰ অভিযান বাধাগ্রস্ত হৈছে বুলিও জয়ছোৱালে জানিবলৈ দিয়ে। তেওঁ লগতে প্ৰকাশ কৰা অনুসৰি উদ্ধাৰ অভিযানত নেপালৰ উদ্ধাৰকাৰীসকলৰ স’তে ভাৰতীয় উদ্ধাৰকাৰীয়ে সহযোগিতাৰে কাম কৰি আছে। এই ক্ষেত্ৰত কাঠমাণ্ডুস্থিত ভাৰতীয় দূতাবাসে নেপাল চৰকাৰলৈ সম্ভৱপৰ সকলো সহযোগিতা আগবঢ়াইছে বুলিও জয়ছোৱালে সদৰী কৰে।