10 people from Assam are also missing in Nepal:
দৈনিক অগ্ৰদূত ডিজিটেল ডেস্ক:প্রায় ছশ লোক মৃত্যুমুখত পৰা আৰু কে’বা সহস্র সন্ধানহীন হোৱা নেপালৰ সাম্প্ৰতিক জলপ্রলয়ত চিকিৎসক আৰু প্ৰাক্তন অধ্যাপিকাসহ অসমৰো ১০ জন লোক সন্ধানহীন হৈ থকাৰ তথ্য সম্প্রতি পোহৰলৈ আহিছে। কর্মসূত্রে বা কৈলাশ মানস সৰোবৰ যাত্ৰাত অংশগ্ৰহণৰ উদ্দেশ্যে নেপাললৈ গৈ এইসকল সন্ধানহীন হয়।
ৰাজ্যিক দুর্যোগ উপশম বিভাগে ইতিমধ্যে প্ৰকাশ কৰা অনুসৰি নেপাললৈ গৈ সন্ধানহীন হোৱা অসমৰ এই লোকসকল ৰাজ্যৰ বিভিন্ন স্থানৰ। এই লোকসকলৰ অন্যতম হৈছে গুৱাহাটী বিশ্ববিদ্যালয়ৰ পদার্থ বিজ্ঞান বিভাগৰ প্ৰাক্তন অধ্যাপিকা তথা গুৱাহাটীৰ লংকেশ্বৰৰ নিবাসী ড° দিপালী সৰকাৰ আৰু তেওঁৰ স্বামী মানস কুমাৰ ঘোষ, নলবাৰী চিকিৎসা মহাবিদ্যালয় হাস্পতালৰ চিকিৎসক ডাঃ তীর্থ চলিহা, নলবাৰীৰ অৰৰাৰ অৰুণ মহন্ত, গুৱাহাটীৰ ৰুক্মিণী গাঁৱৰ নিৱাসী পংকজ নৌগ, ডবকাৰ শতদল নাথ, গোলাঘাটৰ মেৰাপানীৰ জয়পুখুৰীৰ ৰাহুল দৈমাৰী, ডকমকাৰ সোণেশ্বৰ নাৰ্জাৰী, ডকমকাৰ দয়দাকৰ মন্ত্রি বসুমতাৰী আৰু ঋতুপর্ণ ব্রহ্ম।
সূত্রই জনোৱা মতে, গুৱাহাটী বিশ্ববিদ্যালয়ৰ অৱসৰপ্ৰাপ্ত অধ্যাপিকা ড° সৰকাৰে স্বামী ঘোষৰ স’তে কৈলাশ মানস সৰোবৰ যাত্ৰালৈ গৈছিল। যোৱা ২১ আগষ্টত তেওঁলোকে হাওৰা ৰেল ষ্টেছনৰ পৰা নেপাল অভিমুখে যাত্ৰা কৰে। ‘চলো জই ট্রেভেল’ নামৰ এটা সংস্থাৰ সহযোগত ১২ দিনীয়া ভ্রমণসূচীৰে নেপাললৈ ৰাওনা হোৱা এই দম্পতীৰ স’তে আন ২৮ জন লোকো আছিল। জলপ্ৰলয়ৰ ফলত যোৱা ২৬ আগষ্টৰ পুৱা ১০-৩০ বজাৰ পৰা তেওঁলোকৰ স’তে যোগাযোগ বিচ্ছিন্ন হয়। ঘোষৰ কন্যা অদ্রিজা এইমছ দিল্লীত অধ্যয়নৰত হৈ আছে। অদ্রিজাই পিতৃ-মাতৃৰ স’তে যোগাযোগৰ চেষ্টা অব্যাহত ৰাখিছে যদিও সফল হোৱা নাই বুলি সূত্রই প্রকাশ কৰিছে। সম্প্ৰতি ঘোষৰ লংকেশ্বৰৰ ঘৰ তলা বন্ধ হৈ আছে।
# নেপালৰ বিধ্বংসী বানত সন্ধানহীন কার্বি আংলং-ডবকাৰ তিনি যুৱক
নেপালৰ শেহতীয়া ভয়াৱহ বানত কাৰ্বি আংলং আৰু ডবকাৰো তিনিজন যুৱক সন্ধানহীন হৈ থকাৰ তথ্য পোহৰলৈ আহিছে। এই তিনি যুৱক দেশখনৰ জলবিদ্যুৎ প্রকল্পত কৰ্মৰত আছিল বুলি সূত্ৰই প্ৰকাশ কৰিছে। উল্লেখ্য যে শেহতীয়া জলপ্ৰলয়ত নেপালৰ ১৩টা জলবিদ্যুৎ প্রকল্পও বিধ্বস্ত হয়। সূত্রই জনোৱা মতে, ডবকাৰ হিন্দু ব্লক গাঁৱৰ শতদল নাথে আঠ মাহ পূর্বে নেপাললৈ যায়। ঘটনাৰ আগদিনা নিশা তেওঁ নৈশ ভাগৰ কৰ্তব্য পালন কৰি নিজৰ কোঠালৈ আহি শুই থকা অৱস্থাত তেওঁৰ কোঠা ভয়ংকৰ পানীৰ সোঁতে উটুৱাই লৈ যায়।
ফলত শতদলসহ আন ১৩ জন লোকো বানত উটি যায় বুলি সূত্রই জনায়। সৌভাগ্যবশতঃ এই ভয়ংকৰ দুৰ্যোগৰ পৰা ৰক্ষা পৰে ডবকাৰ আন এজন যুৱক তথা শতদলৰ সহকর্মী গৌতম দাস। ঘটনাৰ সময়ত গৌতম কৰ্তব্যস্থলীত উপস্থিত নাছিল। সেয়েহে তেওঁৰ দৈৱক্ৰমে প্ৰাণৰক্ষা পৰে। পাছত তেওঁ ঘটনাৰ বিষয়ে পৰিয়ালৰ লোকক ফোনযোগে অৱগত কৰে। স্বাভাৱিকতে এই খবৰ পোৱাৰ পাছতে শতদলৰ পৰিয়ালত হাহাকাৰ লাগিছে।
ইপিনে, কাৰ্বি আংলঙৰ লাংহিনৰ দয়দাক গাঁৱৰ দুই যুৱক ঋতুৰাজ ব্ৰহ্ম (২৪) আৰু মন্ত্রি বসুমতাৰী (২৮)-এ জীৱিকাৰ খাতিৰত দুসপ্তাহ পূর্বে নেপাললৈ যায়। পাছত তাত দুয়ো ত্রিশূল নদীৰ নিকটৱৰ্তী এটা জলবিদ্যুৎ প্রকল্পত নিয়োজিত হয়। ২৬ আগষ্টৰ মহাপ্ৰলয়ৰ পাছৰ পৰাই দুয়োজন যুৱকৰ স’তে পৰিয়ালৰ সম্পূৰ্ণ যোগাযোগ বিচ্ছিন্ন হৈ আছে। দুয়োৰে ম’বাইল ফোনৰ ছুইচ অফ হৈ আছে। সৌভাগ্যবশতঃ এই জলপ্ৰলয়ৰ পৰা কথমপি ৰক্ষা পৰে একেখন গাঁৱৰে সোণেশ্বৰ নাৰ্জাৰী (৩৭)ৰ। পাছত তেৱেঁই ফোনযোগে ঋতুৰাজ আৰু মন্ত্ৰি সন্ধানহীন হোৱাৰ কথা পৰিয়ালৰ লোকক জনায়। ঘটনাটোক লৈ গাঁওখনত শোকাকুল পৰিৱেশ বিৰাজ কৰি আছে।
