Kailash Manas Sarovar Yatra:
দৈনিক অগ্ৰদূত ডিজিটেল ডেস্ক:ভগৱান শিৱৰ আশীৰ্বাদ ল’বলৈ গৈছিল দলটো; কিন্তু হঠাতে নামি আহিছিল মৃত্যুদূত। অৱশ্যে এই মৃত্যুমিছিলত তেওঁলোক যুক্ত নহ’ল। দৈৱক্ৰমে পৰিত্ৰাণ পালে সেই দলৰ প্ৰতিজন পূণ্যার্থীয়েই। তাৰ পাছতে তামিলনাডুৰ পৰা কৈলাস মানস সৰোবৰলৈ যাত্রা কৰা সেই ভক্তৰ দলটোৱে দাবী কৰিছে যে পাহাৰৰ গাত তেওঁলোকে ভগৱান শিৱৰ মুখ দেখা পাইছিল। স্বয়ং ভোলানাথেই তেওঁলোকক ৰক্ষা কৰা বুলিও দলটোৱে দাবী কৰিছে।
বিপদৰ পাছত উদ্ধাৰ পোৱাৰ পাছতে কাঠমাণ্ডু বিমানবন্দৰত সংবাদ মাধ্যমৰ স’তে কথা পতাৰ সময়ত দলটোৰ এগৰাকী মহিলা তীর্থযাত্রীয়ে কয়, ‘আমি ভগৱান শিৱৰ আশীৰ্বাদ ল’বলৈ গৈছিলো; কিন্তু দুর্যোগৰ বাবে সেই স্থানত উপস্থিত হ’ব নোৱাৰিলো। অৱশ্যে দুৰ্যোগৰ সময়ত যেতিয়া বান ঢাঁহি-মুহি আহিল, তেতিয়া পাহাৰৰ গাত আমি ভগৱান শিৱৰ মুখ দেখা পাওঁ। ভগৱানে আমাক ৰক্ষা কৰিবলৈ আহিছিল।’ তীর্থযাত্ৰীৰ দলটোৱে এখন ম’বাইলত তোলা ফটো দেখুৱাই দাবী কৰে যে পাহাৰৰ গাত জমা হৈ থকা বোকা আৰু ধ্বংসস্তূপৰ আকৃতি প্রায় ভগৱান শিৱৰ দৰে আছিল।
কৈলাস পর্বতত তীর্থযাত্রাত যোৱা শ শ মানুহৰ ভিৰতে আছিল তামিলনাডুৰ তীৰ্থযাত্ৰীৰ দলটো। দক্ষিণ-পশ্চিম তিব্বতত অৱস্থিত হিমালয়ৰ এই পৰ্বত শৃংগক হিন্দু শাস্ত্রমতে, শিৱৰ বাসস্থানৰূপে গণ্য কৰা হয়। চীন সীমান্তৰ দিশে আগুৱাই যোৱা এজন তীর্থযাত্রীয়ে ঘটনাটোৰ বৰ্ণনা দি কয়, ‘আমি আছিলো ৬০জনৰ এটা দল। তিনিখন বাছত আহিছিলো ইয়ালৈ। হঠাৎ নদীৰ পাৰত বিশাল ধোঁৱা দেখিবলৈ পাওঁ। ভাবিছিলো হয়তো কোনো বিস্ফোৰণ ঘটিছে।
ইয়াৰ পাছতে বোকা আৰু বালিসহ পানীৰ সোঁত ঢাঁহি-মুহি আহিল। চালকৰ আসনৰ দিশেৰে বাহিৰ ওলাই আমি সকলোৱে এখন সৰু পাহাৰৰ ওপৰত আশ্রয় লওঁ।’ সেইদৰে প্ৰাণৰক্ষা পোৱাৰ পাছত তেওঁলোকে জনাইছে কিদৰে পাহাৰৰ গাত শিৱৰ আকৃতিয়ে তেওঁলোকক বুজাই দিছিল যে তেওঁৰ আশীৰ্বাদতে এই যাত্রাত তীর্থযাত্রী দলটোৰ প্ৰাণ ৰক্ষা পৰিল।
