Tinsukia Incident:
দৈনিক অগ্ৰদূত ডিজিটেল ডেস্ক: তিনিচুকীয়া চহৰৰ মাজমজিয়াৰ বৰদলৈ নগৰ অঞ্চলত এজন যুৱকৰ ৰহস্যজনক পৰিস্থিতিত মৃত্যু হোৱা ঘটনাক কেন্দ্র কৰি তীব্ৰ প্ৰতিক্ৰিয়াৰ সৃষ্টি হৈছে। মৃত যুৱকজনক বৰদলৈ নগৰৰ এটা ভাড়াঘৰত বাস কৰা সুনীল চাংমাইৰ ২৬ বছৰীয়া পুত্র চিন্ময়জ্যোতি চাংমাই বুলি চিনাক্ত কৰা হৈছে। পৰিয়ালৰ লোকে যুৱকজনক হত্যাৰ অভিযোগ উত্থাপন কৰিছে।
আৰক্ষী সূত্রই জনোৱা মতে, যোৱা নিশা চিন্ময়জ্যোতিক বৰদলৈ নগৰত অৱস্থিত ‘জেএছবি স্প্রিংফিল্ড’ নামৰ এটা বহুমহলীয়া আৱাসিক চৌহদৰ বাহিৰত সংকটজনক অৱস্থাত উদ্ধাৰ কৰা হয়। তেওঁক ততাতৈয়াকৈ তিনিচুকীয়া অসামৰিক চিকিৎসালয়ত ভর্তি কৰোৱা হয়। অৱস্থা সংকটজনক হোৱাত চিকিৎসকে উন্নত চিকিৎসাৰ বাবে তেওঁক ডিব্ৰুগড়স্থিত অসম চিকিৎসা মহাবিদ্যালয় হাস্পতাললৈ প্ৰেৰণ কৰে।
যদিও চিকিৎসাধীন অৱস্থাতে পুৱতি নিশা প্রায় দুই বজাত তেওঁৰ মৃত্যু হয়। ঘটনা সন্দৰ্ভত মৃতকৰ মাতৃ ঋতুৰাণী চাংমায়ে কালি তিনিচুকীয়া সদৰ আৰক্ষী থানাত এখন এজাহাৰ দাখিল কৰে। এজাহাৰত এগৰাকী যুৱতীসহ আৱাসিক চৌহদটোৰ নিৰাপত্তা ব্যৱস্থাৰ স’তে জড়িত লোকসকলৰ ভূমিকা সন্দৰ্ভত তদন্তৰ দাবী জনোৱা হৈছে। পৰিয়ালৰ লোকে সন্দেহ প্রকাশ কৰা অনুসৰি, এগৰাকী যুৱতীয়ে ফোন কৰি মতাৰ পাছত চিন্ময়জ্যোতিয়ে নিশা উক্ত আৱাসিক চৌহদটোলৈ গৈছিল। তাৰ পাছতে তেওঁৰ স’তে কোনো অপ্রীতিকৰ ঘটনা সংঘটিত হোৱাৰ আশংকা কৰিছে পৰিয়ালে। পৰিয়ালৰ লোকে অভিযোগ কৰে যে মৃত চিন্ময়জ্যোতিক জনৈক সেনাপতিৰ কোঠাত মাৰপিট কৰি ওপৰৰ মহলাৰ পৰা তললৈ পেলাই দিয়ে।
তাৰ পাছতো তললৈ আহি মৃতপ্রায় যুৱকজনক গুৰিয়াই থাকে। শেষত যুৱকজনৰ নিৰাপত্তাৰক্ষীৰ সহযোগত এপার্টমেণ্টৰ চৌহদৰ বাহিৰলৈ আনি এটা নলাত পেলাই দিয়ে। পৰিয়ালে দাখিল কৰা অভিযোগ পত্ৰত অভিযুক্ত যুৱতীগৰাকীৰ ম’বাইল নম্বৰো উল্লেখ কৰা হৈছে। ইপিনে, ঘটনাৰ সময়ত ঘটনাস্থলীত চাৰি-পাঁচজন লোক উপস্থিত থকাৰ কথাও পোহৰলৈ আহিছে। পৰিয়ালৰ লোকে আৱাসিক চৌহদটোৰ নিৰাপত্তাৰক্ষীসকলৰ ভূমিকাক লৈও প্রশ্ন উত্থাপন কৰিছে। তেওঁলোকৰ মতে, চৌহদটোত প্ৰৱেশৰ সময়ত পৰিচয় সম্পৰ্কীয় তথ্য সংগ্ৰহ আৰু নিৰাপত্তা পৰীক্ষাৰ ব্যৱস্থা আছে।
এনে পৰিস্থিতিত নিশাৰ সময়ত যুৱকজন কেনেদৰে চৌহদটোত উপস্থিত হৈছিল আৰু পৰৱৰ্তী সময়ত চৌহদৰ বাহিৰত সংকটজনক অৱস্থাত কেনেকৈ উদ্ধাৰ হ’ল, সেয়া সন্দেহজনক বুলি পৰিয়ালৰ লোকে অভিযোগ কৰে। মৃত যুৱকজনৰ পৰিয়ালে লগতে এই ঘটনা সাধাৰণ মৃত্যু নহয়, এক পৰিকল্পিত হত্যাকাণ্ড বুলি গুৰুতৰ অভিযোগ উত্থাপন কৰিছে। পৰিয়ালৰ দাবী, প্ৰেমিকাৰ পৰিয়ালৰ লোকেই পূর্ব পৰিকল্পনা অনুসৰি যুৱকজনক হত্যা কৰিছে। ঘটনাটোক লৈ বিভিন্ন সামাজিক সংগঠনৰ মাজতো ক্ষোভৰ সৃষ্টি হৈছে।
তিনিচুকীয়াৰ বিভিন্ন দল-সংগঠনে ঘটনাটোৰ নিৰপেক্ষ আৰু গুৰুত্বসহকাৰে তদন্ত কৰি দোষীক গ্ৰেপ্তাৰৰ দাবী জনাইছে। লগতে শীঘ্রে উপযুক্ত ব্যৱস্থা গ্রহণ নকৰিলে ব্যাপক আন্দোলন গঢ়ি তোলাৰ হুংকাৰ দিছে। তিনিচুকীয়া আৰক্ষীয়ে ইতিমধ্যে গোচৰ ৰুজু কৰি তদন্ত আৰম্ভ কৰিছে। আৰক্ষীয়ে ঘটনাটোৰ সকলো দিশ, ঘটনাস্থলীৰ পৰিস্থিতি আৰু ইয়াৰ স’তে জড়িত ব্যক্তিসকলৰ ভূমিকাৰ বিষয়ে তদন্ত চলাই আছে।
