ULFI(I) Linkman arrested in kakapathar:
দৈনিক অগ্ৰদূত ডিজিটেল ডেস্ক:উগ্রপন্থীৰ চলোবা বিৰুদ্ধে অভিযানত তিনিচুকীয়া জিলাৰ তিনি নম্বৰ কাকপথাৰৰ কাঠবস্তি অঞ্চলত এক সমন্বিতে অভিযানৰ সময়ত ২০ নম্বৰ অসম ৰাইফলছ, সাত নম্বৰ ফিল্ড ৰেজিমেন্ট আৰু অসম আৰক্ষীৰ যৌথ দলে অৰ্তকিতে অভিযান চলাই আলফা (স্বা)ৰ এজন সন্দেহযুক্ত অভাৰ গ্রাউণ্ড ৱকাৰ লগতে অভিযুক্ত অস্ত্র সৰবৰাহকাৰীক আটক কৰিবলৈ সক্ষম হয়।
আৰক্ষীৰ সূত্ৰ অনুসৰি, আলফা (স্বা)ৰ এজন অভাৰ গ্ৰাউণ্ড ৱাকাৰ ৰূপে ধন দাবীৰে ব্যৱসায়ীক ভাবুকি দিয়া আৰু অবৈধ অস্ত্ৰৰ ব্যৱসায়ত জড়িত থকাৰ বিষয়ে এক গোপনে তথ্য লাভ কৰৰ পাছতে সেনা-আৰক্ষীৰ যৌথ অভিযানকাৰী দলটোৱে মঙলবাৰে নিশা প্রায় ১০ বজাত উক্ত অঞ্চলটোত অভিযান চলায়। এই অভিযানকাৰী সেনা আৰু আৰক্ষীৰ দলটোৱে বহু সময় ধৰি চলোৱা তালাচীত নগালেণ্ডৰ মন জিলাৰ আবোই মুখ্য কার্যলয়ৰ অস্থায়ী বাসিন্দা মহম্মদ চালাউদ্দিন (৫৩)ক গ্ৰেপ্তাৰ কৰে ৷
আটকাধীন ব্যক্তিজনৰ পৰা জাপানত নির্মিত এটা ৭.৬৫ মিমি পিষ্টল, এটা মেগজিন, চাৰিজাই সক্রিয় গুলি, এখন চোকা অস্ত্র, দুটা ম’বাইল ফোন, নগদ ১,৩২৯ টকা, এযোৰ জংগল বুট আৰু এক পেকেট ছার্জিকেল গ’ভছ জব্দ কৰে।
প্রাথমিক জেৰাত ধৃত চালাউদ্দিনে ধন দাবীঅবৈধ অস্ত্ৰ ব্যৱসায়ৰ লগত জড়িত থকাৰ কথা স্বীকাৰ কৰিছে বুলি আৰক্ষীয়ে জানিবলৈ দিছে। ইয়াৰ পূৰ্বে চৰাইদেউৰ সোণৰিতো এনে কাৰ্যকলাপ চলাই থকাৰ লগতে যোৱা তিনিমাহ ধৰি তিনিচুকীয়া জিলাৰ বিভিন্ন প্ৰান্তত সন্দেহজনক লোকক অস্ত্র যোগান ধৰি আহিছিল বুলি আৰক্ষীৰ সূত্ৰত প্ৰকাশ কৰিছে। সম্প্ৰতি এই ঘটনাই সমগ্র জিলাখনতে এটা সক্রিয় অস্ত্ৰ সৰবৰাহকাৰী চক্ৰ থকাৰ সন্দেহ ঘনীভূত হৈ পৰিছে।
ইফালে, জব্দকৃত অস্ত্র-শস্ত্রসহ ধৃত লোকজনক পৰৱৰ্তী আইনী ব্যৱস্থাৰ বাবে অভিযানকাৰী সেনাৰ দলটোৱে কাকপথাৰ আৰক্ষী থানাত চমজাই দিয়ে। উল্লেখ্য যে শেহতীয়া খবৰ অনুসৰি ধৃত চালাউদ্দিন বিহাৰৰ শিৱন জিলাৰ বচন্তপুৰ থানাৰ অন্তৰ্গত বালথাৰি গাঁৱৰ স্থায়ী বাসিন্দা।
ADVERTISEMENT