DelhiSIR : দৈনিক অগ্ৰদূত ডিজিটেল ডেস্ক: পৰিহাস! নতুন ভোটাৰ তালিকাত নাম অন্তর্ভুক্তিৰ বাবে যোগ্যতা প্রতিপন্ন কৰাৰ ভাৰ পৰিল বিজেপিৰ প্রতিষ্ঠাপক নেতা তথা প্রাক্তন উপ-প্রধানমন্ত্রী এল কে আদবানী, দেশৰ প্ৰাক্তন উপ-ৰাষ্ট্ৰপতি জগদ্বীপ ধনখড়সহ অনেক বিখ্যাত ৰাজনীতিক তথা ব্যক্তিৰো। সম্প্রতি দিল্লীকে ধৰি দেশৰ বিভিন্ন স্থানত নির্বাচন আয়োগৰ বহু বিতর্কিত ভোটাৰ তালিকাৰ বিশেষ গভীৰ পুনৰীক্ষণ (এছআইআৰ) প্রক্রিয়া চলি আছে। এই প্ৰক্ৰিয়াৰ অংশৰূপে আদৱানী-ধনখড়সহ দিল্লীৰ ৩২ লাখ বাসিন্দালৈ নির্বাচন আয়োগে জাননী জাৰি কৰিছে।
এই জাননীৰ জৰিয়তে তেওঁলোকক নতুন ভোটাৰ তালিকাত নাম অন্তর্ভুক্তিব বাবে যোগ্যতা প্রতিপন্ন কৰিবলৈ কোৱা হৈছে। এই জাননী পোৱা সকলৰ মাজত আনকি দেশৰ বৈদেশিক মন্ত্রী এছ জয়শংকৰ, বৈদেশিক সচিব বিক্রম মিষি, নৌসেনাৰ শীর্ষ বিষয়া ভাইচ এডমিৰেল চি আৰ প্রবীণ নায়াৰ আৰু প্ৰাক্তন বায়ুসেনা মুৰব্বী এনএকে ব্রাউনো আছে। তদুপৰি দিল্লীৰ মুখ্যমন্ত্ৰী ৰেখা গুপ্তা, প্রাক্তন মুখ্যমন্ত্রী তথা আম আদমী পাৰ্টিৰ মুৰব্বী অৰবিন্দ কেজৰিৱাল, কংগ্ৰেছ সাংসদ অভিষেক মনু সিংভী, জ্যেষ্ঠ অধিবক্তা কপিল শিবাল, দিল্লীৰ প্ৰাক্তন উপ-মুখ্যমন্ত্রী মনীষ ছিছ’দিয়া, প্রাক্তন কেন্দ্রীয় কেবিনেট সচিব ৰাজীৱ গৌবা আদিয়েও আয়োগৰ এই জাননী পাইছে।
২০০২ৰ ভোটাৰ তালিকাৰ স’তে সংযোগ স্থাপন কৰিব নোৱৰাৰ অজুহাতত আয়োগে এইসকল বিখ্যাত ব্যক্তিসহ দিল্লীৰ মুঠ ৩২ লাখ লোকলৈ জাননী জাৰি কৰিছে। স্বাভাৱিকতে আয়োগৰ এই কাণ্ডই দেশজুৰি আলোড়ন তুলিছে।
উল্লেখ্য যে বিজেপিৰ পিতামহ আদৱানীৰ বয়স সম্প্ৰতি ৯৮ বছৰ। এনে বয়সতো তেওঁৰ লগতে তেওঁৰ কন্যা প্রতিভা আৰু বোৱাৰীয়েক গীতিকালৈ নির্বাচন আয়োগে এছআইআৰৰ নামত জাননী জাৰি কৰিছে। আয়োগে দাবী কৰা অনুসৰি কন্যা আৰু বোৱাৰীসহ আদৱানীৰ ২০০২ৰ ভোটাৰ তালিকাৰ স’তে সংযোগ স্থাপন কৰিব পৰা হোৱা নাই।
আশ্চর্যজনকভাৱে আদৱানীৰ পুত্র জয়ন্ত আদৱানীৰ এনে ত্রুটি নাই বুলি আয়োগে প্রকাশ কৰিছে। আদৱানীৰ পৰিয়াল হৈছে নতুন দিল্লী বিধানসভা সমষ্টিৰ ভোটাৰ।
এছআইআৰৰ এই জাননীৰ ক্ষেত্ৰত আন এক লক্ষ্যণীয় দিশ হ’ল যে প্ৰধানমন্ত্ৰীৰ আৰ্থিক উপদেষ্টা পৰিষদৰ প্রাক্তন মুৰব্বী প্রয়াত বিবেক দেবৰয়কো ২০০২ৰ ভোটাৰ তালিকাৰ স’তে সংযোগ স্থাপন কৰিব পৰা হোৱা নাই বুলি নির্বাচন আয়োগে প্রকাশ কৰিছে।
একেদৰে কাৰ্যকাল আধৰুৱা কৰি পদত্যাগ কৰা উপ-ৰাষ্ট্ৰপতি ধনখড় আৰু তেওঁৰ পত্নী সুদেশলৈও একে কাৰণতে নির্বাচন আয়োগে জাননী জাৰি কৰিছে। সেই অনুসৰি জাননী পোৱা সকলে নতুন ভোটাৰ তালিকাত নাম অন্তর্ভুক্তিৰ বাবে যোগ্যতা প্রতিপন্ন কৰিব লাগিব। অহা চাৰি নৱেম্বৰত দিল্লীৰ চূড়ান্ত ভোটাৰ তালিকা প্রকাশ পাব।
এই জাননী দেশৰ প্ৰাক্তন বৈদেশিক পৰিক্ৰমা মন্ত্ৰী প্ৰয়াত সুষমা স্বৰাজৰ কন্যা তথা নতুন দিল্লীৰ সাংসদ বাঁশুৰী স্বৰাজেও পাইছে। তেওঁকো ২০০২ৰ ভোটাৰ তালিকাৰ স’তে সংযোগ স্থাপন কৰিব পৰা নগ’ল বুলি নির্বাচন আয়োগে যুক্তি প্ৰদৰ্শন কৰিছে। আনকি জাননী পোৱাসকলৰ মাজত দেশৰ প্ৰাক্তন মুখ্য ন্যায়াধীশ বি এন কিপাল, উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ এ এম খানৱিলকাৰ, প্ৰাক্তন ৰাষ্ট্ৰপতি ৰামনাথ ক’বিন্দৰ কন্যা স্বাতী, প্রাক্তন প্রধানমন্ত্রী আই কে গুজৰালৰ পুত্ৰ নৰেশ গুজৰাল, প্রাক্তন সেনা মুৰব্বী উপেন্দ্র দ্বিবেদী, ষষ্ঠদশ বিত্ত আয়োগৰ অধ্যক্ষ অৰবিন্দ পানাগাৰিয়া আৰু বিশ্ববিদ্যালয় অনুদান আয়োগ (ইউজিচি) ৰ প্ৰাক্তন অধ্যক্ষ এম জগদেশ কুমাৰো আছে।
মুখ্যমন্ত্ৰী ৰেখা গুপ্তাৰ পিতৃৰ স’তে বয়সৰ ব্যৱধান মাথোঁ ১৫ বছৰ!
নির্বাচন আয়োগে দিল্লীৰ মুখ্যমন্ত্ৰী ৰেখা গুপ্তালৈও এছআইআৰৰ জাননী জাৰি কৰিছে। এই সম্পর্কত সূত্রই প্ৰকাশ কৰা অনুসৰি পিতৃৰ স’তে মুখ্যমন্ত্রী গুপ্তাৰ বয়সৰ ব্যৱধান ১৫ বছৰ হোৱাত তেওঁলৈ এই জাননী জাৰি কৰা হৈছে। অৱশ্যে মুখ্যমন্ত্ৰীৰ ক্ষেত্ৰত এই বিসংগতি দূৰ কৰা হৈছে বুলি প্ৰকাশ কৰি নিৰ্বাচন আয়োগে বিবৃতিযোগে সদৰী কৰিছে যে অহা চাৰি নৱেম্বৰত প্ৰকাশ পাবলগীয়া চূড়ান্ত ভোটাৰ তালিকাত তেওঁৰ নাম থাকিব। উল্লেখ্য যে যোৱা ৩১ আগষ্টত দিল্লী খচৰা ভোটাৰ তালিকা আয়োগে প্রকাশ কৰিছিল। এই তালিকাত এক কোটি ৪৫ লাখ ভোটাৰৰ ৪৭ লাখৰ নাম বাদ পৰে। এইসকলে চূড়ান্ত ভোটাৰ তালিকাত নাম অন্তর্ভুক্তিৰ বাবে আবেদন জনাব পাৰিব।
