AnilKapoorFitness: দৈনিক অগ্ৰদূত ডিজিটেল ডেস্ক: বয়স এতিয়া ৬৯ বছৰ; কিন্তু অভিনেতা অনিল কাপুৰক দেখিলে বয়সৰ হিচাপ মিলোৱাটো কঠিন। এই বয়সতো প্রবীণ অভিনেতাজনে যিকোনো একচন দৃশ্যত সমানে অভিনয় কৰি গৈছে। এতিয়াও নিয়মিত শৰীৰচৰ্চা, নিয়ন্ত্রিত জীৱন-যাপন আৰু কামৰ ক্ষেত্ৰত এনে ধৰণৰ এনার্জি; সকলো মিলাই তেওঁ বলিউদৰ অন্যতম ফিট তাৰকা।
অনিল কাপুৰৰ এই ফিটনেছৰ ৰহস্য আচলতে কোনো যাদু নহয়, বৰঞ্চ দীর্ঘদিনৰ শৃংখলিত জীৱন-যাপন আৰু নিয়মিত পৰিশ্ৰম।
অনিল কাপুৰৰ ফিটনেছ কটিনত আছে জিম, বেইট ট্রেইনিঙৰ সমান্তৰালকৈ কার্ডিঅ’। চাইক্লিং, জগিং তথা অন্যান্য কার্ডিঅ’ভাস্কুলাৰ ব্যায়ামো তেওঁৰ কটিনৰ অংশ। জনা যায় যে অনিল কাপুৰে প্ৰতিদিনে প্রায় দুইৰ পৰা তিনি ঘণ্টা পর্যন্ত শৰীৰচৰ্চাত সময় দিয়ে।
অৱশ্যে তেওঁৰ ওচৰত কেৱল কঠিন ৱৰ্কআউটেই গুৰুত্বপূৰ্ণ নহয়, বৰঞ্চ নিয়ম মানি সেইবোৰ চলাই যোৱাটোহে আচল।
সম্প্রতি ৬৯ বছৰ বয়সত তেওঁৰ এটা ৱৰ্কআউটৰ ভিডিঅ’ই সকলোৰে দৃষ্টি আকর্ষণ কৰিছিল। তাত তেওঁক অতি মনোযোগেৰে হাই-ইনটেনচিটি ব্যায়াম কৰা দেখা যায়। সেই প’ষ্টত তেওঁ বুজাব বিচাৰিছিল যে জীৱনত ডাঙৰ ফল পোৱাৰ বাবে ধাৰাবাহিকতাৰ কোনো বিকল্প নাই।
প্রতিদিনে অলপ অলপকৈ কৰা পৰিশ্রমেই শেষত বৃহৎ পৰিৱৰ্তন আনে।কেৱল ব্যায়ামেই নহয়, খাদ্যক কেন্দ্ৰ কৰিও অভিনেতাজন যথেষ্ট সচেতন। ২০২২ত এক সাক্ষাৎকাৰত অনিল কাপুৰে কৈছিল যে শৰীৰচৰ্চাৰ সমান্তৰালকৈ খাদ্যও অতি গুৰুত্বপূর্ণ।
তেওঁ কৈছিল যে খাদ্য কেৱল স্বাদৰ বাবে নহয়; শৰীৰৰ শক্তি, ষ্টেমিনা তথা মানসিক আৰু শাৰীৰিক ক্ষমতা ধৰি ৰখাৰ বাবেও খাব লাগে। অর্থাৎ প্রয়োজন বুজি, পৰিমিত আৰু পুষ্টিকৰ খাদ্য খোৱাই তেওঁৰ ফিটনেছ দৰ্শনৰ অন্যতম অংশ।
অনিল কাপুৰৰ আৰু এক ডাঙৰ অভ্যাস হৈছে ধূমপান আৰু মদ্যপানৰ পৰা দূৰত থকা। তেওঁৰ অভিনেত্রী কন্যা ছোনম কাপুৰেও পিতৃৰ এই নিয়ন্ত্রিত জীৱন-যাপনৰ কথা সদৰী কৰিছিল। অৱশ্যে একাংশ বিশেষজ্ঞৰ মতে, অনিল কাপুৰৰ ৰুটিন হুবহু অনুসৰণ কৰাৰ প্রয়োজন নাই।
বয়স, শাৰীৰিক সক্ষমতা আৰু স্বাস্থ্যৰ পৰিস্থিতি অনুসৰি ব্যায়াম আৰু খাদ্যৰ পৰিকল্পনা কৰা উচিত। এই ক্ষেত্রত নিয়মিত শৰীৰ চৰ্চা আৰু স্বাস্থ্যকৰ জীৱন-যাপনেই দীর্ঘদিন ফিট থকাৰ সবাতোকৈ নিৰাপদ পথ।
