AsianGames2026 : দৈনিক অগ্ৰদূত ডিজিটেল ডেস্ক: দেশৰ প্রতিনিধিৰূপে তেওঁলোক গৈছে পদক জয় কৰিবলৈ। অথচ সেই এথলীটসকলেই শুবলগীয়া হৈছে জাপানৰ প্ৰব্ৰজন বিভাগৰ ছোফা বা হোটেলৰ লবীত। হোটেলৰ কোঠা পাবলৈ খেলুৱৈসকলে পুৱতি নিশা পর্যন্ত অপেক্ষা কৰিবলগীয়া হৈছে। জাপানত এছিয়ান গেমছত খেলিবলৈ গৈ ভাৰতীয় এথলীটসকলে সম্মুখীন হোৱা এনে চৰম দুৰ্যোগ দূৰ কৰাৰ বাবে উদ্যোগ ল’লে মোদী চৰকাৰে।
আয়োজক চহৰ আইচি-নাগোয়াৰ ব্যৰ্থতাৰ বাবে দেশৰ ক্রীড়াবিদসকলৰ যাতে চৰম বিপত্তি নঘটে, তাৰ বাবে একাধিক পদক্ষেপ লৈছে কেন্দ্রীয় ক্রীড়া মন্ত্রণালয়ে। অন্ততঃ খেলুৱৈসকলৰ থকা-খোৱা যাতে নিশ্চিত হয়, তাৰ বাবে জাপানত বাস কৰা ভাৰতীয় লোকসকলৰ সহায়ো বিচৰা হৈছে।
এইবাৰৰ এছিয়ান গেমছক ‘নিকৃষ্টতম’ আখ্যা দিছে দক্ষিণ কোৰিয়াই। আয়োজকৰ চূড়ান্ত অব্যৱস্থা তথা বিশৃংখলাৰ বাবে অনেক হাৰাশাস্তি হৈছে ইতিমধ্যে জাপানত উপস্থিত হোৱা বিভিন্ন দেশৰ এথলীটসকলৰ। অধিকাংশ এথলীটেই থাকিবলৈ কোঠা পোৱা নাই। ক’ৰবাত মাত্র এনিশাৰ বাবে হোটেলৰ কোঠা দিয়া হৈছে এথলীটসকলক।
প্রতিযোগিতাৰ পূর্বে দলসমূহে ক’ত অনুশীলন কৰিব, সেয়াও বহুতে গম পোৱা নাই। ভাৰতৰ এথলীটসকলৰ অর্ধেকে এতিয়াও জাপানত উপস্থিত হোৱা নাই, তাতো এই সমস্যাই দেখা দিছে।
বিগত প্রায় পাঁচদিন ধৰি এই বেমেজালি অব্যাহত থকা সত্ত্বেও আয়োজকৰ তৰফৰ পৰা সমস্যা সমাধানৰ সামান্য চেষ্টাও দৃষ্টিগোচৰ হোৱা নাই। বাধ্য হৈয়েই কেন্দ্ৰৰ সহায় বিচাৰিছিল ভাৰতীয় দলৰ চীফ দ্য মিছন আৰু অন্যান্য খেলৰ কর্তৃপক্ষই।
শুকুৰবাৰে জাপানত উপস্থিত হয় কেন্দ্রীয় ক্রীড়ামন্ত্রী মনছুখ মাণ্ডবীয়। এছিয়ান গেমছৰ আয়োজন কৰা চহৰ আইচি-নাগোয়াত কমেও দুহেজাৰ ভাৰতীয়ই বসবাস কৰে। তেওঁলোকলৈ আহ্বান জনাইছে কেন্দ্রীয় ক্রীড়ামন্ত্রীয়ে। ভাৰতীয় এথলীটসকলৰ বাবে যাতে তেওঁলোকৰ ঘৰৰ দুৱাৰ মুকলি কৰি দিয়ে।
প্রাপ্ত তথ্য অনুসৰি, এই মুহূৰ্তত এথলীটসকলৰ বাবে ১৫টা ঘৰ সাজু কৰি ৰখা হৈছে। তদুপৰি বিমানবন্দৰত থাকিব দুজন চীফ দ্য মিছন। তেওঁলোকে প্ৰব্ৰজনৰ প্রক্রিয়াত সহযোগ কৰিব। এথলীটসকলৰ বাবে বাছো ভাড়া কৰিছে কেন্দ্ৰীয় ক্রীড়া মন্ত্রণালয়ে, যাতে আয়োজকে প্ৰেৰণ কৰা গাড়ীৰ ওপৰত ভৰসা কৰি থাকিব নালাগে। এছিয়ান গেমছৰ ৱেলকাম চেণ্টাৰতো একাধিক বিষয়াক নিয়োজিত কৰা হৈছে যাতে সুস্থভাবে পঞ্জীয়ন প্রক্রিয়া সম্পন্ন হয়।
তাৰ পাছতো যদি এথলীটসকলে থকাৰ ঠাই লগে লগে নাপায়, তেতিয়া বিশ্রাম লোৱাৰ বাবে তেওঁলোকক সাধাৰণ জনতাৰ ঘৰলৈ প্ৰেৰণ কৰা হ’ব। ধাৰণা কৰা হৈছে যে আইচি-নাগোয়াত হোটেলৰ সংখ্যা অতি কম বাবেই থকাৰ সংকটৰ সৃষ্টি হৈছে।
আয়োজকে পৃথক গেমছ ভিলেজৰ ব্যৱস্থা কৰা নাই। ফলত হোটেলৰ উপৰি জাহাজ, শিক্ষানুষ্ঠান আদিত এথলীটক ৰখাৰ ব্যৱস্থা কৰিছে। আনকি কোনো কোনো খেলৰ এথলীটে তম্বু তৰি পতা শিবিৰতো থাকিবলগীয়া হৈছে। সেয়ে ভাৰতীয় লোকৰ ঘৰৰ ওপৰতে ভৰসা কৰিবলগীয়া হৈছে।
এনে চৰম বেমেজালিৰ বাবেই যথাযথ আন্তঃগাঁথনি নথকা সত্ত্বেও জাপানৰ এই চহৰখনক কিয় ইমান ডাঙৰ প্ৰতিযোগিতা আয়োজনৰ দায়িত্ব দিয়া হ’ল বুলিও প্রশ্ন উঠিছে।
