Nepal: দৈনিক অগ্ৰদূত ডিজিটেল ডেস্ক: নেপালৰ যোৱা মাহৰ জলপ্ৰলয়ত মৃতকৰ সংখ্যা ১০ হেজাৰৰো অধিকলৈ বৃদ্ধিৰ আশংকা আছে। স্বয়ং দেশখনৰ বিত্তমন্ত্রী স্বর্মিন বাগেলে এই আশংকা প্রকাশ কৰিছে। শনিবাৰে নতুন দিল্লীত নেপালী বিত্তমন্ত্রীজনে উন্নয়নশীল দেশসমূহৰ গৱেষণা আৰু তথ্য ব্যৱস্থা (আৰআইএছ) শীর্ষক এক আলোচনাচক্রত অংশ লৈ দেশখনৰ শেহতীয়া এই ভয়াৱহ প্রাকৃতিক দুৰ্যোগৰ ক্ষয়-ক্ষতিৰ বিষয়ে ব্যাখ্যা কৰে।
১১ বছৰ পূর্বে কমেও ন হেজাৰ মানুহ মৃত্যুমুখত পৰা ২০১৫ৰ দেশখনৰ ভয়াৱহ ভূমিকম্পৰ স্মৃতি সোঁৱৰণ কৰি বিত্তমন্ত্রী ৱাগেলে আশংকা কৰে যে শেহতীয়া এনে জলপ্রলয়তো এনে বৃহৎ সংখ্যক লোকৰ প্ৰাণহানিৰ আশংকা আছে। তিব্বতৰ পৰ্বতৰ পৰা নামি অহা ভোটেকোশী আৰু ত্রিশূলী নৈয়ে সৃষ্টি কৰা এই ভয়াৱহ আকস্মিক বানে বিস্তৰ বোকা-মাটিও কঢ়িয়াই আনে।
এই বোকা-মাটিয়ে পুতি পেলোৱা স্থানসমূহত বর্তমানেও উদ্ধাৰ অভিযান অব্যাহত আছে বুলি সদৰী কৰে। এই উদ্ধাৰ অভিযানৰ সময়ত আজিলৈকে ১,৪১১ জনৰ মৃতদেহ উদ্ধাৰ কৰা হৈছে। চৰকাৰীভাৱে এতিয়াও কমেও ছহেজাৰ লোক সন্ধানহীন হৈ আছে বুলি নিশ্চিত কৰা হৈছে।
তৎসত্ত্বেও মন্ত্রী ৱাগেলে আশংকা কৰিছে যে এই ভয়ানক বানত মৃতকৰ সংখ্যাই ১০ হেজাৰৰ ঘৰক অতিক্ৰম কৰিব পাৰে। এই সম্পর্কত তেওঁ আৰু কয়, ‘বান কিছু অঞ্চলতে সীমাবদ্ধ আছিল যদিও ইয়াৰ ক্ষয়-ক্ষতি ২০১৫ৰ ভূমিকম্প সদৃশ হৈছে। ব্যাপক প্রাণহানি হৈছে।’
মৃত আৰু সন্ধানহীনসকলৰ মাজত দেশী-বিদেশী পর্যটক, তীর্থযাত্রী, সাধাৰণ লোক আৰু সৰু-বৰ ব্যৱসায়ী আছে বুলিও তেওঁ সদৰী কৰে। আনহাতে, ভাৰতে এই দুৰ্যোগৰ সময়ত আগবঢ়োৱা সহায়ৰ বাবে তেওঁ নৰেন্দ্ৰ মোদী চৰকাৰক ধন্যবাদ জনায়। আনহাতে নেপাল আৰক্ষীৰ মতে যোৱা ২৬ আগষ্টত সৃষ্ট এই ভয়াৱহ আকস্মিক বানত সর্বাধিক সংখ্যক লোক মৃত্যুমুখত পৰিছে চিতাৱান জিলাত।
জিলাখনৰ বিভিন্ন স্থানৰ পৰা এই পর্যন্ত ৩৬৭ জনৰ মৃতদেহ উদ্ধাৰ কৰা হৈছে। ইয়াৰ পাছতে ৰাছুৱা জিলাৰ পৰা ২৩৬ জনৰ, নাৱালপাৰাছি পূবৰ পৰা ২৩২ জনৰ আৰু নাৱালপাৰাছি পশ্চিমৰ পৰা ২২২ জনৰ মৃতদেহ উদ্ধাৰ কৰা হৈছে।
এই জলপ্রলয়ত ত্রিশূলী অৱবাহিকাত কমেও আঠশ মেগাৱাট বিদ্যুৎ উৎপাদন বন্ধ হৈ আছে বুলিও নেপালী বিত্তমন্ত্ৰীয়ে সদৰী কৰে। এই বানত দেশখনৰ কমেও ১৩টা জলবিদ্যুৎ প্রকল্প ক্ষতিগ্রস্ত হয়। এনে পৰিস্থিতিত দেশখনে ভাৰতৰ পৰা বিদ্যুৎ আমদানি কৰিবলৈ বিচাৰিছে। সেই অনুসৰি যোৱা ১৩ ছেপ্টেম্বৰৰ পৰা ভাৰতে নেপালক বিদ্যুৎ যোগান ধৰিবলৈ লৈছে।
এনেদৰে অহা ৩১ ডিচেম্বৰলৈ প্ৰতিদিনে ১৮ ঘণ্টাকৈ ভাৰতে ৬৫৪ মেগাৱাটকৈ নেপালক বিদ্যুৎ যোগান ধৰিব। ভাৰতৰ এই সহায়ক নেপালে আদৰণি জনাইছে। উল্লেখ্য যে পূর্বে নেপালেহে ভাৰতক বিদ্যুৎ বিক্ৰী কৰিছিল।
