CaptainSmit :দৈনিক অগ্ৰদূত ডিজিটেল ডেস্ক : ফ্লাইদুবাইৰ বিমানৰ ভাৰতীয় পাইলট কেপ্টেইন স্মিত মচ্ছৰকক ইজৰাইলৰ স্বাধীনতা দিৱসৰ অনুষ্ঠানলৈ আমন্ত্ৰণ জনাইছে দেশখনৰ প্ৰধানমন্ত্ৰী বেঞ্জামিন নেতানিয়াহুৱে।শনিবাৰে স্মিতৰ স’তে কথা পাতে নেতানিয়াহুৱে।
বিমানৰ ককপিটত সংঘটিত ঘটনাৰ বিষয়ে তেওঁৰ পৰা বিস্তৃতভাৱে শুনাৰ পাছত আবেগিক হৈ পৰে ইজৰাইলৰ প্ৰধানমন্ত্ৰীগৰাকী। ইয়াৰ পাছতে তেওঁ স্মিতৰ লগতে ভাৰতৰ প্ৰধানমন্ত্ৰী নৰেন্দ্ৰ মোদীকো নিজ দেশলৈ আমন্ত্ৰণ জনায় ।
স্মিতৰ সাহসী পদক্ষেপৰ পূৰ্বেও প্ৰশংসা কৰিছিল নেতানিয়াহুৱে। শনিবাৰে পুনৰ তেওঁক ‘হিৰো’ বুলি অভিহিত কৰে ইজৰাইলৰ প্ৰধানমন্ত্ৰীগৰাকীয়ে। ঘটনাৰ বিষয়ে শুনি নেতানিয়াহুৱে স্মিতক কয়, ‘‘আপুনি ইজৰাইলৰ হিৰো, ভাৰতৰ হিৰো আৰু সমগ্ৰ বিশ্বৰ হিৰো।’’
ইয়াৰ পাছতে আনুষ্ঠানিকভাৱে স্মিতক আমন্ত্ৰণ জনায় নেতানিয়াহুৱে। ইজৰাইলৰ প্ৰধানমন্ত্ৰীগৰাকীয়ে জনোৱা মতে, স্বাধীনতা দিৱসত তেওঁৰ দেশে প্ৰদান কৰা সৰ্বোচ্চ সন্মান অহা বছৰ নৰেন্দ্ৰ মোদী আৰু কেপ্টেইন স্মিতক দিয়া হ’ব। তেওঁলোকক অনুষ্ঠানত পৰম্পৰাগত মশাল জ্বলোৱাৰ সুযোগ দিয়া হ’ব।
ইজৰাইলৰ স্বাধীনতা দিৱসৰ অনুষ্ঠানত প্ৰতি বছৰে ১২খন মশাল জ্বলোৱা হয়। সাধাৰণতে দেশ আৰু সমাজলৈ অসাধাৰণ অৱদান আগবঢ়োৱা ইজৰাইলৰ নাগৰিক বা বাসিন্দাসকলক এই সন্মান প্ৰদান কৰা হয়।
এইবাৰ ব্যতিক্ৰমীভাৱে ভাৰতৰ প্ৰধানমন্ত্ৰী নৰেন্দ্ৰ মোদী আৰু ফ্লাইডুবাইৰ ভাৰতীয় পাইলট কেপ্টেইন স্মিত মচ্ছৰককো অহা বছৰৰ অনুষ্ঠানত মশাল জ্বলাবলৈ আমন্ত্ৰণ জনাইছে নেতানিয়াহুৱে। অৱশ্যে নিৰ্দিষ্ট নিৰ্বাচনী প্ৰক্ৰিয়াৰ জৰিয়তে কোনে মশাল জ্বলোৱাৰ সুযোগ লাভ কৰিব, সেয়া নিৰ্ধাৰণ কৰা হয়। ২০২৭ চনৰ মে’ মাহত ইজৰাইলে স্বাধীনতা দিৱস পালন কৰিব।
উল্লেখ্য, যোৱা ৩০ ছেপ্টেম্বৰত ফ্লাইডুবাইৰ বিমানখন ডুবাইৰ পৰা তেল আভিভলৈ গৈ আছিল। সেই সময়তে হঠাৎ ককপিটৰ ভিতৰত কেপ্টেইন স্মিতক তেওঁৰ সহকাৰী পাইলটে আক্ৰমণ কৰে। ইয়াৰ ফলত বিমানখন কিছু সময়ৰ বাবে নিয়ন্ত্ৰণৰ বাহিৰলৈ গুচি গৈছিল আৰু ৩৪ হাজাৰ ফুট উচ্চতাৰ পৰা প্ৰায় ১৭ হেজাৰ ফুটলৈ নামি আহিছিল।
পৰিস্থিতিৰ মাজতে যাত্ৰীসকলে ককপিটত প্ৰৱেশ কৰি কোনোপ্ৰকাৰে অভিযুক্তক আটক কৰে আৰু বিমানখন ছৌদি আৰৱত জৰুৰী অৱতৰণ কৰোৱা হয়। ঘটনাটোক ইজৰাইল আৰু তদন্তকাৰী দেশ সংযুক্ত আৰব আমিৰশ্বাহীয়ে সন্ত্ৰাসবাদী আক্ৰমণৰ চেষ্টা বুলি উল্লেখ কৰিছে।
ককপিটৰ ভিতৰত ভাৰতীয় পাইলটগৰাকীয়ে দেখুওৱা উপস্থিত বুদ্ধি আৰু সাহসৰ প্ৰশংসা কৰে নেতানিয়াহুৱে। স্মিতক উদ্দেশ্যি তেওঁ কয়, ‘‘সঁচা কথা ক’বলৈ গ’লে, আপোনাৰ সাহস দেখি মই আচৰিত হৈছোঁ। সেই অসম্ভৱ পৰিস্থিতিত যিধৰণে মূৰ ঠাণ্ডা ৰাখি আপুনি কাম কৰিছে, সেয়া দেখি মই আচৰিত। আপুনি অত্যন্ত সাহসৰ পৰিচয় দিছে। বহু লোকৰ জীৱন ৰক্ষা কৰিছে। মোৰ আৰু মোৰ পত্নীৰ শুভেচ্ছা আপোনাৰ পত্নীলৈও জনাব। মই জানো আপোনাৰ পৰিয়াল আছে। অনুগ্ৰহ কৰি সোনকালে সুস্থ হৈ উঠক। সকলো কথাৰ বাবে আপোনাক ধন্যবাদ।’’
ইয়াৰ পাছতে নেতানিয়াহুৱে কয়, ‘‘কেপ্টেইন স্মিত আৰু প্ৰধানমন্ত্ৰী মোদী মোৰ অতি ভাল বন্ধু। মই তেওঁলোকক উৎসৱৰ মশাল জ্বলোৱাৰ বাবে আমন্ত্ৰণ জনাইছোঁ। এয়া স্বাধীনতা দিৱসত আমি প্ৰদান কৰা সৰ্বোচ্চ সন্মান।’’