EChallan : দৈনিক অগ্ৰদূত ডিজিটেল ডেস্ক : আপুনি নিজৰ বাহনৰ বিপৰীতে জাৰি হোৱা ই-চালান দীর্ঘদিন ধৰি আদায় দিয়া নাই নেকি? যদি আপোনাৰ বাহনৰ বিপৰীতে আদায় নিদিয়া কোনো ই-চালান আছে, তেন্তে সতর্ক হওক।
উচ্চতম ন্যায়ালয়ে এই বিষয়ত এক গোচৰৰ শুনানিত যানবাহন আইন উলংঘা কৰি ই-চালান আদায় নিদিয়া বাহনৰ গৰাকীৰ বিৰুদ্ধে কঠোৰ পদক্ষেপ গ্ৰহণৰ নির্দেশ দিলে। সর্বোচ্চ ন্যায়ালয়ে স্পষ্টভাৱে কয় যে কেৱল ই-আদায় কৰাৰ ক্ষেত্ৰতো প্রশাসনে চালান কাটিলেই নহ’ব, ই-চালান কঠোৰ পদক্ষেপ গ্ৰহণ কৰিব লাগিব।
উচ্চতম ন্যায়ালয়ে সকলো ৰাজ্য আৰু কেন্দ্ৰ শাসিত প্রদেশলৈ নির্দেশ দি কয় যে যিসমূহ গাড়ীৰ চালান দীর্ঘদিন ধৰি অনাদায় হৈ আছে, সেইসমূহ গাড়ী শীঘ্ৰে জব্দ কৰিব লাগিব।
গোচৰৰ শুনানিত ন্যায়াধীশ জে বি পাৰডিৱালা আৰু কে ভি বিশ্বনাথনৰ বিচাৰপীঠে কয় যে বিষয়াসকলে ই-চালান আদায় নিদিয়া বাহনৰ বিৰুদ্ধে আইনগত কঠোৰ পদক্ষেপ গ্রহণ কৰিব লাগিব।
যিসমূহ বাহনে দীর্ঘদিন ধৰি ই-চালান আদায় দিয়া নাই, তেনে বাহনক চিনাক্ত কৰি শীঘ্ৰে প্রশাসনে জব্দ কৰিব লাগিব। তদুপৰি বিচাৰপীঠখনে কয় যে চালানৰ ধন সম্পূৰ্ণ আদায় নিদিয়ালৈকে তেনে বাহনৰ পঞ্জীয়ন প্রমাণপত্র (আৰচি) ৰ নবীকৰণ, ডুপ্লিকেট আৰচি প্ৰস্তুত কৰা, ঠিকনা সলনি আৰু প্রদূষণ (পিইউচি) প্রমাণপত্র প্রদান বন্ধ ৰাখিব লাগিব।
এনে বাহনৰ ফিটনেছ প্রমাণপত্ৰ জাৰি কৰা বন্ধ ৰখা হ’ব আৰু প’র্টেলত ক’লা তালিকাভুক্ত কৰা হ’ব। প্রকাশিত বাতৰি অনুসৰি, ভাৰতত প্রায় ৪৯,১৯৪ কোটি টকাৰ ই-চালানৰ ধন অনাদায় হৈ আছে। এইসমূহ ই-চালানৰ মাত্ৰ ২৬,১৭৫ কোটি টকাহে কর্তৃপক্ষই উদ্ধাৰ কৰিবলৈ সফল হৈছে।